మేక రక్తం ఎక్కువ తింటున్నారా, మీ శరీరంలో ఏం జరుగుతుందో తెలుసా

మనలో చాలా మంది నాన్ వెజ్ ఇష్టంగా తింటుంటారు. చికెన్, మటన్, చేపలు, రొయ్యలు ఇలా రకరకాలుగా తింటుంటారు. ఇక, సండే వచ్చిందంటే చాలు కక్కా- ముక్కా ఉండాల్సిందే అంటారు. మటన్‌తో పాటు బోటీ, రక్తం కూడా వండుకుని తింటారు. తెలుగు రాష్ట్రాల్లో చాలా మంది మేక రక్తాన్ని వండుకుని తింటారు. మేక రక్తాన్ని కొని చిన్న ఉల్లిపాయలు, పచ్చిమిర్చి, తురిమిన కొబ్బరితో కలిపి ఫ్రైలా చేసి తింటారు. కొంతమంది బోటి కూరతో కలిపి ఫ్రై చేసుకుని రక్తం తింటారు. అసలు మేక రక్తం తినడం ఆరోగ్యానికి మంచిదేనా? మేక రక్తం తినడం వల్ల ఏం జరుగుతుందో డాక్టర్ సంతోష్ జాకబ్ చెప్పారు. తన ఇన్‌స్టాగ్రామ్ ఓ వీడియో షేర్ చేశారు. ఆ పూర్తి వివరాలు ఇప్పుడు చుద్దాం.

మేక రక్తంతో ఆరోగ్య ప్రయోజనాలు

మానవ రక్తంలాగే.. మేక రక్తం కూడా హిమోగ్లోబిన్‌తో సమృద్ధిగా ఉంటుంది. ఇందులో ప్రోటీన్, ఐరన్, విటమిన్ బి12, అమైనో ఆమ్లాలు పుష్కలంగా ఉంటాయి. మేక రక్తంలో 17 రకాల అమైనో ఆమ్లాలు ఉంటాయని డాక్టర్ చెబుతున్నారు. ఇది కండరాల పెరుగుదలకు, వివిధ శరీర కదలికలకు సాయపడుతుంది.మేక రక్తం ఎర్ర రక్త కణాల సంఖ్యను పెంచుతుంది. రక్తహీనతను నివారిస్తుంది. జింక్, సెలీనియం, ఫాస్ఫరస్ వంటి ఇతర ముఖ్యమైన ఖనిజాలు కూడా ఉంటాయి. ఇవి శరీరానికి ఎంతో మేలు చేస్తాయి.

మేక రక్తం తింటే సైడ్ ఎఫెక్ట్స్

మేక రక్తంలో ఐరన్ ఎక్కువగా ఉంటుందని డాక్టర్ చెబుతున్నారు. ఇది ఎక్కువగా తినడం వల్ల శరీరంలో ఐరన్ స్థాయిలు గణనీయంగా పెరుగుతాయి. దీంతో హీమోక్రొమాటోసిస్ అనే వ్యాధి వచ్చే అవకాశం ఉంటుంది. ఈ వ్యాధి లివర్, గుండె అవయవాల పనితీరుపై ఎక్కువ ప్రభావం చూపించవచ్చు. అంతేకాకుండా మేక రక్తాన్ని అధికంగా తినడం వల్ల జీర్ణ సమస్యలు వస్తాయి. జీర్ణసమస్యలతో బాధపడేవారు దీనిని తినే విషయంలో అప్రమత్తంగా ఉండాలి.

యూరిక్ యాసిడ్ ఉన్నవారు జాగ్రత్త

ఈ రోజుల్లో చాలా మంది యూరిక్ యాసిడ్‌తో బాధపడుతున్నారు. అలాంటి వారు మేక రక్తం ఎక్కువగా తీసుకోకూడదు. మేక రక్తంలో ప్యూరిన్ ఎక్కువగా ఉంటుంది. అందువల్ల, ఇది గౌట్ సమస్యలు ఉన్నవారికి సమస్యలను కలిగిస్తుంది. ఇది గౌట్ సమస్యను మరింత తీవ్రతరం చేస్తుంది. దీంతో కీళ్ల నొప్పులు ఇంకా ఎక్కువయ్యే ప్రమాదం ఉంది. అందుకే గౌట్ సమస్యలతో ఉన్నవారు మేక రక్తం తినే విషయంలో జాగ్రత్తగా ఉండాలని నిపుణులు సూచిస్తున్నారు.

మేక రక్తం వండేటప్పుడు తీసుకోవాల్సిన జాగ్రత్తలు

మేక రక్తం కూడా ఇన్ఫ్లమేషన్ స్థాయిలు, ఇన్ఫెక్షన్లను కలిగి ఉంటుంది. దీంతో, దానిని తినడానికి ముందు బాగా శుభ్రం చేసి ఉడికించాలి. శుభ్రత లేని రక్తాన్ని సేకరించి దాన్ని వండుకుని తింటే ఇన్ఫెక్షన్లు, వైరస్, బ్యాక్టీరియాలతో ముప్పు కలగవచ్చు. అవి శరీరంలోకి ప్రవేశిస్తే వైరల్ ఫీవర్లు, జీర్ణ సమస్యలు, ఇతర అనారోగ్య సమస్యలు తలెత్తవచ్చు. అందుకే మేక రక్తాన్ని శుభ్రంగా సేకరించండి. అంతేకాకుండా దాన్ని ఎక్కువ ఉష్ణోగ్రత వద్ద ముందుగా ఉప్పు వేసి ఉడికించండి. దీంతో, దానిలోని ఇన్ఫెక్షన్లు, వైరస్, బ్యాక్టీరియాలు చనిపోతాయి. బాగా ఉడికించిన తర్వాత మాత్రమే దానిని ఫ్రై చేసుకుని తినాలని నిపుణులు సూచిస్తున్నారు.

మేక రక్తాన్ని తినడం వల్ల లాభాలు, సైడ్ ఎఫెక్ట్స్ ఉండవచ్చు. అయితే, దీనిని మితంగా తినాలని నిపుణులు సూచిస్తున్నారు. అంతేకాకుండా బాగా వేడి పద్దతిలో ఉడికించి వండుకోవాలి. దీంతో సూక్ష్మజీవులు చనిపోతాయి. బాగా ఉడికించి వండితేనే దానిని జీర్ణించుకోవడం కూడా సులభంగా ఉంటుంది. ఏదైనా ఆరోగ్య సమస్యతో బాధపడేవారు దీన్ని తినే ముందు వైద్యుణ్ని సంప్రదించి తగిన సలహా తీసుకోవడం ముఖ్యం.