SA20లో చరిత్ర సృష్టించిన బ్రెవిస్ – వేలానికి ఆల్‌టైమ్ రికార్డు ధర!

సౌతాఫ్రికా యువ క్రికెటర్, జూనియర్ ఏబీడీగా పేరొందిన డెవాల్డ్ బ్రెవిస్, SA20 లీగ్‌లో చరిత్ర సృష్టించాడు. సౌతాఫ్రికా టీ20 ఫ్రాంచైజీ లీగ్ SA20 వేలంలో ఇప్పటివరకు ఎన్నడూ లేని విధంగా ఆల్‌టైమ్ రికార్డు ధర పలికింది.మంగళవారం జరిగిన వేలంలో, అప్‌కమింగ్ సీజన్ కోసం డెవాల్డ్ బ్రెవిస్‌ను ప్రిటోరియా క్యాపిటల్స్ జట్టు ₹8.3 కోట్లకు కొనుగోలు చేసింది. ఇది SA20 లీగ్ చరిత్రలో ఇప్పటి వరకు నమోదైన అత్యధిక బిడ్డింగ్. బ్రెవిస్ తర్వాత ఎయిడెన్ మార్క్‌రమ్ అత్యధిక ధరకు అమ్ముడుపోయిన రెండో ఆటగాడిగా నిలిచాడు. ఆయనను డర్బన్ సూపర్ జెయింట్స్ ₹7 కోట్లకు తమ జట్టులోకి తీసుకున్నారు.ఈ లీగ్‌లో ఐపీఎల్ ఫ్రాంచైజీలు భాగస్వాములుగా ఉన్నట్లు ఇప్పటికే తెలుసు. SA20 లీగ్ 2023లో మొదలయ్యింది. తొలి రెండు సీజన్లలో కూడా సన్‌రైజర్స్ ఈస్టర్న్ కేప్ టైటిల్ గెలుచుకుంది. మూడో సీజన్‌లో ఫైనల్‌కు చేరినా, ఎంఐ కేప్‌టౌన్ చేతిలో ఓటమి పాలై హ్యాట్రిక్ టైటిల్‌ను కోల్పోయింది.ఈ మూడు సీజన్లలో సన్‌రైజర్స్ జట్టుకు కెప్టెన్‌గా మార్క్‌రమ్ సేవలందించాడు. కానీ, అనూహ్యంగా ఈసారి జట్టును విడిచి పెట్టాడు. ఈ కారణంగా, అతన్ని లక్నో సూపర్ జెయింట్స్‌కు చెందిన డర్బన్ సూపర్ జెయింట్స్ భారీ ధరకు సొంతం చేసుకుంది. కానీ అతని రికార్డును ఎక్కువ సమయం నిలుపుకోకుండా బ్రెవిస్ తిరగరాసాడు.కేవలం 22 ఏళ్ల వయసులోనే బ్రెవిస్‌కు ఈ రేంజ్‌లో ధర పలకడం విశేషమే. 2022లో ఐపీఎల్ అరంగేట్రం చేసిన బ్రెవిస్ ఇప్పటి వరకు 16 మ్యాచ్‌లు ఆడి 455 పరుగులు చేశాడు. గత సీజన్‌లో రిప్లేస్‌మెంట్ ప్లేయర్‌గా చెన్నై సూపర్ కింగ్స్ తరపున ఆడాడు.విధ్వంసకర బ్యాటింగ్ శైలితో గుర్తింపు పొందిన బ్రెవిస్, 2023లో అంతర్జాతీయ క్రికెట్‌లోకి అడుగుపెట్టాడు. టీ20లతో కెరీర్ ప్రారంభించి, ఆపై వన్డేలు, టెస్ట్‌ల్లోనూ తన స్థానాన్ని సంపాదించాడు.ఇప్పటివరకు:10 టీ20లు – 318 పరుగులు ,6 వన్డేలు – 110 పరుగులు,2 టెస్ట్‌లు – 84 పరుగులు అంటూ, అన్ని ఫార్మాట్లలో బ్రెవిస్ తన ప్రభావాన్ని చూపించాడు. ఇప్పుడు SA20 వేలంలో అతనికి పలికిన రికార్డు ధర, భవిష్యత్తులో అతని కెరీర్‌ ఎంత దూసుకెళ్తుందో సంకేతంగా నిలుస్తోంది.