Asia Cup 2025: బంగ్లాదేశ్ దూకుడు.. హాంగ్ కాంగ్ టోర్నీకి గుడ్‌బై!

ఆసియా కప్ 2025 టోర్నీలో బంగ్లాదేశ్ శుభారంభాన్ని నమోదు చేసింది. గురువారం హాంగ్ కాంగ్‌తో జరిగిన గ్రూప్ మ్యాచ్‌లో అన్ని విభాగాల్లో మెరుగ్గా రాణించిన బంగ్లా జట్టు 8 వికెట్ల తేడాతో విజయం సాధించింది.మ్యాచ్‌లో ముందుగా బ్యాటింగ్ చేసిన హాంగ్ కాంగ్ నిర్ణీత 20 ఓవర్లలో 7 వికెట్లకు 143 పరుగులు చేసింది. కెప్టెన్ యసిమ్ ముర్తాజా (19 బంతుల్లో 28; 2 ఫోర్లు, 2 సిక్సులు), ఓపెనర్ జీషన్ అలీ (34 బంతుల్లో 30; 3 ఫోర్లు, సిక్స్), నిజకత్ ఖాన్ (40 బంతుల్లో 42; 2 ఫోర్లు, సిక్స్) లు బాగానే ఆడారు. బంగ్లాదేశ్ బౌలింగ్ విభాగంలో టస్కిన్ అహ్మద్, తంజీమ్ హసన్ షకీబ్, రిషద్ హొస్సేన్‌లకు చెరో రెండు వికెట్లు లభించాయి.తరువాత లక్ష్యచేధనలో బంగ్లాదేశ్ 17.4 ఓవర్లలో 3 వికెట్లు మాత్రమే కోల్పోయి 144 పరుగులు చేసి గెలుపొందింది. కెప్టెన్ లిటన్ దాస్ (39 బంతుల్లో 59; 6 ఫోర్లు, 1 సిక్స్) అర్ధశతకం నమోదు చేస్తూ జట్టుకు విజయ బాటలో నడిపాడు. టౌహిడ్ హృదయ్ (36 బంతుల్లో 35 నాటౌట్; 1 ఫోర్) చక్కటి మద్దతు అందించాడు. ఈ ఇద్దరి మధ్య మూడో వికెట్‌కు 95 పరుగుల కీలక భాగస్వామ్యం ఏర్పడింది.విజయం దాదాపు దగ్గరగా ఉన్న సమయంలో లిటన్ దాస్ క్లీన్ బౌల్డ్ అయ్యాడు. అనంతరం టౌహిడ్ హృదయ్, జాకెర్ అలీ (0 నాటౌట్) కలిసి జట్టును విజయతీరాలకు చేర్చారు. హాంగ్ కాంగ్ బౌలర్లలో అయుష్ శుక్లా, అతీక్ ఇక్బాల్ తలో వికెట్ పడగొట్టారు.ఇప్పటికే వరుసగా రెండు మ్యాచ్‌ల్లో ఓటమి పాలైన హాంగ్ కాంగ్.. ఈ పరాజయంతో సూపర్-4 దశకు చేరే అవకాశాలను కోల్పోయింది. ఇంకా శ్రీలంకతో ఒక మ్యాచ్ మిగిలి ఉన్నప్పటికీ, తమ ప్రయాణాన్ని కొనసాగించాలంటే గొప్ప అద్భుతం జరిగితేనే సాధ్యం.