ఆ 11 అలవాట్లు వింతగా అనిపించాయి..రష్యన్ మహిళ

భారత్ అంటే ప్రపంచంలోని చాలా దేశాల ప్రజలు ఎంతో అభిమానం చూపిస్తారు. ఇక భారత సంస్కృతులు, సంప్రదాయాలు నచ్చి.. అక్కడ ఆచరించేవారు కూడా ఉంటారు. మరికొందరు భారత యువతీయువకులను పెళ్లిళ్లు చేసుకుని.. మన సంప్రదాయాలను పాటిస్తూ ఉంటారు. ఇక కొందరు వివిధ దేశాల నుంచి వచ్చి భారత్‌లోనే స్థిరపడుతూ ఉంటారు. ఇలా కొన్ని రోజులు, కొన్నేళ్లు ఉన్న తర్వాత భారత్‌లో తమ అనుభవాలను వివిధ మార్గాల ద్వారా ప్రపంచానికి చెబుతూ ఉంటారు. ఇలాగే ఓ రష్యన్ మహిళ .. కొంత కాలం కింద రష్యా నుంచి భారత్‌కు వచ్చేసి ఇక్కడే స్థిరపడిపోయారు. ఈ నేపథ్యంలోనే భారత్‌లో తాను గమనించిన విషయాలు, ఇక్కడ తనను ఆశ్చర్యపరించిన విషయాలు, తన జీవనం గురించి.. ఆ రష్యన్ మహిళ చేసిన సోషల్ మీడియా పోస్ట్ ఇప్పుడు ఆసక్తికరంగా మారింది.

రష్యాకు చెందిన పారిశ్రామిక వేత్త అనస్తాసియా షారోవా.. భారత్‌కు వచ్చి ఇక్కడ గ్రామీణ ప్రాంతంలో నివసిస్తున్నారు. ఈ క్రమంలోనే ఆమె పూర్తిగా భారతీయ జీవనశైలిని అలవాటు చేసుకున్నారు. ఈ క్రమంలోనే అనస్తాసియా షారోవా.. తాను భారత్‌లో నేర్చుకున్న 11 వింత అలవాట్లను సోషల్ మీడియాలో పంచుకున్నారు. దీంతో ఆమె చేసిన పోస్ట్‌కు లక్షలాది వ్యూస్ రావడంతో ఇప్పుడు నెట్టింట ఆ పోస్ట్ బాగా ట్రెండ్ అవుతోంది. రష్యాలో పుట్టి పెరిగిన అనస్తాసియా షారోవా.. భారత్‌లోని కొన్ని అలవాట్లు తనను మొదట్లో చాలా విచిత్రంగా అనిపించాయని పేర్కొన్నారు.

హారన్ కొట్టడం: ఇరుకైన రోడ్లు, ట్రాఫిక్ కారణంగా మూల మలుపుల వద్ద హారన్ కొట్టడం.

ఇంటిని పొగ వేయడం: ఇంట్లో నుంచి దోమలను వెళ్లగొట్టేందుకు, దుష్టశక్తులను పారదోలేందుకు పొగ వేయడం.

చెప్పులు, బూట్లు బయట తీయడం: ఇంటిని పరిశుభ్రంగా ఉంచుకునేందుకు చెప్పులు, బూట్లను ఇంటి బయటే వదిలి లోపలికి వెళ్లడం.

తలకు నూనె పెట్టుకోవడం: భారత్‌లోని చాలా మంది తలకు నూనె పెట్టుకోవడం.

ఊరగాయ: భోజనం చేసేటపుడు ప్లేటు పక్కనే ఊరగాయ పచ్చడి డబ్బాను పెట్టుకోవడం.

తల ఊపడం: ఏదైనా మాట్లాడేటపుడు తల ఊపడం.

నీళ్లు తాగే పద్ధతి: ఎవరైనా మంచి నీళ్లు తాగేటపుడు బాటిల్‌ను నోట్లో పెట్టుకోకుండా కనీసం పెదాలకు తాకకుండా చూసుకోవడం.

వాటర్ బాటిల్: దాహం అయినపుడు తాగడానికి స్టీల్ బాటిల్‌ను వెంట పెట్టుకోవడం.

నోటి శుభ్రత: భోజనం చేసిన తర్వాత సోంపు లేదా యాలకులు తినేసి.. నోటిని శుభ్రం చేసుకోవడం.

నమస్కారం: ఇతరులను కలిసినప్పుడు చేతులు జోడించి నమస్కారం చేయడం.

బూట్లలో తనిఖీ: బూట్లు వేసుకునే ముందు వాటిలో ఏవైనా ఉన్నాయా అని చూసుకోవడం.

పైన చెప్పిన విషయాలకు సంబంధించిన వాటితో అనస్తాసియా షారోవా.. ఇటీవల ఇన్‌స్టాగ్రామ్‌లో ఒక పోస్ట్ చేశారు. దీంతో ఆ పోస్ట్ నెటిజన్లను విపరీతంగా ఆకట్టుకుంది. ఈ క్రమంలోనే ఆ పోస్ట్‌కు 2.5 మిలియన్లకు పైగా వ్యూస్, వేల సంఖ్యలో కామెంట్స్ వచ్చాయి. ఇక అనస్తాసియా షారోవా చేసిన పోస్ట్‌పై చాలా మంది నెటిజన్లు ప్రశంసలు కురిపించారు. మరికొందరు అనస్తాసియా షారోవాకు ఆధార్ కార్డు ఇవ్వండి అంటూ ఫన్నీగా కామెంట్ చేశారు. రష్యాలోని మాస్కో యూనివర్సిటీలో గ్రాడ్యుయేషన్ పూర్తి చేసిన అనస్తాసియా షారోవా.. ఆ తర్వాత భారత్‌కు వచ్చి ఇక్కడే స్థిరపడ్డారు.