"ఫుల్ ట్యాంక్ అంటే హ్యాపీ కాదురా బాబూ!"

నారాయణ బంకుకెళ్లిన ఓ వ్యక్తి తన కారుకు ట్యాంక్ ఫుల్ చేయించాడు. బంకు సిబ్బంది ముందే మీటర్‌ను సున్నా చేసి, మొత్తం 42 లీటర్ల ఇంధనం నింపారు. అయితే ఆ కారు మాన్యువల్ ప్రకారం ట్యాంకు సామర్థ్యం 37 లీటర్లే. దీంతో ఆ వ్యక్తి ఆశ్చర్యపోయాడు. "37 లీటర్ల ట్యాంకులో 42 లీటర్లు ఎలా పోతాయ్?" అంటూ మోసం జరిగిందని అనుమానంతో గొడవకు దిగాడు.కానీ వాస్తవానికి, కార్ల తయారీ సంస్థలు మాన్యువల్‌లో పేర్కొనే సామర్థ్యం కంటే ట్యాంకు అసలు పరిమాణం కొంచెం ఎక్కువగానే ఉంటోంది. ఇది భద్రతా పరంగా ఉంచే అదనపు స్థలం, దీనిని "బఫర్" స్పేస్ అంటారు. ఇది వాహనం భద్రత కోణంలో అవసరమయ్యే ఎక్స్‌పాంశన్ స్పేస్‌కి ఉపయోగపడుతుంది. కానీ ఈ విషయం తెలియని చాలామంది వాహనదారులు బంకుకు వెళ్లగానే "ఫుల్ ట్యాంక్ పెట్టండి" అని అంటారు. ట్యాంకులో ఒక్క బొట్టు ఖాళీ ఉండకూడదన్నట్టు, వాహనాన్ని ముందుకు వెనక్కు ఊపి మరీ నింపించేస్తారు.ఈ అలవాటును ఇకనైనా మానేయాలి. ఎందుకంటే ట్యాంకును పూర్తిగా నింపడం పెట్రోలియం మంత్రిత్వశాఖ నిబంధనలకు వ్యతిరేకం మాత్రమే కాకుండా, భద్రతా పరంగా కూడా ప్రమాదకరం. ట్యాంకులో కొంత ఖాళీ స్థలం ఉండాల్సిందే.కార్ల మాన్యువల్‌లో చూపించే సామర్థ్యం కంటే వాస్తవ ట్యాంకు సామర్థ్యం 15 నుంచి 20 శాతం ఎక్కువగా ఉంటుంది. ఉదాహరణకి, మాన్యువల్‌లో 37 లీటర్ల సామర్థ్యం చూపించినా, ట్యాంకు నిజంగా 42 లీటర్లకే సరిపోతుంది. అందుకే “ఫుల్ ట్యాంక్” చేయించేటప్పుడు ఎక్కువగా పోసినట్టు అనిపిస్తుంది. దీన్ని బట్టి బంకు సిబ్బందిపై అనుమానం పెట్టుకోవడం సరైంది కాదు.బంకుల్లో భూగర్భ ట్యాంకుల్లో ఇంధనం చల్లని ఉష్ణోగ్రతలో నిల్వ చేస్తారు. వాహన ట్యాంకులోకి నింపిన తర్వాత, వాతావరణ వేడి వల్ల ఇది విస్తరించే అవకాశం ఉంటుంది. ఆవిరి ఏర్పడే సందర్భాల్లో, వోలటైల్ ఆర్గానిక్ కాంపౌండ్స్ (VOCs) లీక్ అవ్వకుండా నిరోధించేందుకు ట్యాంకులో ఖాళీ స్థలం అవసరం. ఈ ఖాళీని స్పేర్ కెపాసిటీ లేదా బఫర్ జోన్ అంటారు.ట్యాంకును పూర్తిగా నింపితే, ఇంజిన్ పనితీరు తగ్గే అవకాశముంది. పైగా హైడ్రోకార్బన్ కాలుష్యం పెరుగుతుంది. అలాగే, ట్యాంకులో ఒత్తిడి పెరిగి లీకేజీ ప్రమాదం తలెత్తొచ్చు. వాహనం ప్రయాణిస్తుండగా, ట్యాంకులోని పెట్రోలు ఉష్ణోగ్రత కారణంగా విస్తరించాలి. కానీ ట్యాంక్ నిండిపోయి ఉన్నప్పుడు ఆ స్థలం లేకపోవడం వల్ల అది ప్రమాదాలకు దారి తీస్తుంది. ఇదే విషయం LPG ట్యాంకులకు కూడా వర్తిస్తుంది. అందుకే వాటిని కూడా పూర్తిగా నింపొద్దని సూచిస్తారు.ఇంధనం నింపే సమయంలో కొన్ని ముఖ్యమైన జాగ్రత్తలు తీసుకోవాలి. వాహనం ఇంజిన్‌ను ఆపి మాత్రమే నింపించాలి. వాహనం వేడి అయ్యి ఉన్నప్పుడు వెంటనే నింపకూడదు. ఫ్యూయెల్ క్యాప్‌ను నెమ్మదిగా తీయాలి. “హిస్” అనే శబ్దం వచ్చే వరకూ వేచి ఉండాలి. వాహనం సమతల స్థలంలో ఉన్నప్పుడు మాత్రమే ఇంధన స్థాయిని చెక్ చేయాలి.