గ్రీన్ ట్యాక్స్ భారీగా తగ్గింపు.. అసెంబ్లీలో ఆమోదం

ఏపీలో వాహనదారులకు గుడ్ న్యూస్.. వాహనాలపై గ్రీన్ ట్యాక్స్ భారీగా తగ్గనుంది. పాత వాహనాలపై గ్రీన్ ట్యాక్స్ తగ్గింపు బిల్లుకు ఆంధ్రప్రదేశ్ శాసనసభ ఆమోదం తెలిపింది. మోటారు వాహనాల ట్యాక్సేషన్ చట్టంలో సవరణలు చేస్తూ ఏపీ రవాణా శాఖ మంత్రి మండిపల్లి రాంప్రసాద్ రెడ్డి ఈ బిల్లును ఏసీ అసెంబ్లీలో ప్రవేశపెట్టారు. అనంతరం ఏపీ అసెంబ్లీ ఈ బిల్లును ఆమోదించింది. ఈ బిల్లు చట్ట రూపం దాల్చితే ఏపీలో పాత వాహనాలపై గ్రీన్ ట్యాక్స్ రూ.20 వేల నుంచి రూ.3000లకు తగ్గనుంది. మరోవైపు తాము అధికారంలోకి వస్తే గ్రీన్ ట్యాక్స్ తగ్గిస్తామని ఎన్నికల సమయంలో టీడీపీ కూటమి హామీ ఇచ్చింది. ఇక ఇచ్చిన మాట ప్రకారం.. గ్రీన్ ట్యాక్స్ తగ్గిస్తూ ఆర్డినెన్స్ కూడా జారీ చేశారు. తాజాగా చట్టంలో సవరణలు చేస్తూ బిల్లు అసెంబ్లీ ముందు పెట్టగా..శాసనసభ ఆమోదం లభించింది.

సాధారణంగా లారీలు, బస్సులు లాంటి వాహనాలకు ఏడేళ్ల తర్వాత ఫిట్‌నెస్ సర్టిఫికెట్ పొందాలంటే గ్రీన్ ట్యాక్స్ చెల్లించాల్సి ఉంటుంది. అయితే వాహనం రకం, వయసును అనుసరించి గ్రీన్ ట్యాక్స్ కనిష్టంగా రూ.800 నుంచి గరిష్టంగా రూ.15000 నుంచి రూ.20 వేల వరకుఉంటుంది. ఈ గ్రీన్ ట్యాక్స్ ద్వారా ప్రభుత్వానికి కూడా ఆదాయం సమకూరుతూ ఉంటుంది. 2018-2019, 2019-2020 ఆర్థిక సంవత్సరాల్లో గ్రీన్ ట్యాక్స్ (హరిత పన్ను) ద్వారా ఏపీ రవాణా శాఖకు ఏటా రూ.5 కోట్ల వరకు ఆదాయం సమకూరింది. 2022-23లో రూ.89.96 కోట్లు, 2023-2024లో రూ.102.94 కోట్ల వరకూ ఆదాయం వచ్చింది.

అయితే పొరుగున ఉన్న తెలంగాణ, తమిళనాడుతో పోలిస్తే ఏపీలో గ్రీన్ ట్యాక్స్ ఎక్కువగా ఉందంటూ లారీల యజమానులు, వాహనదారులు వాపోయారు. ఈ నేపథ్యంలోనే గత ఎన్నికల సమయంలో టీడీపీ అధినేత చంద్రబాబు, జనసేనాని పవన్ కళ్యాణ్‌లను కలిసి అధికారంలోకి వస్తే హరిత పన్ను తగ్గించాలని కోరారు. నారా లోకేష్ యువగళం పాదయాత్రలోనూ వాహనదారులు, లారీల యజమానుల నుంచి ఇవే అభ్యర్థనలు వచ్చాయి. దీంతో తాము అధికారంలోకి వస్తే గ్రీన్ ట్యాక్స్ తగ్గిస్తామని చంద్రబాబు, లోకేష్, పవన్‌ కళ్యాణ్ గ్రీన్ ట్యాక్స్ తగ్గిస్తామని హామీ ఇచ్చారు..హామీ ప్రకారం తగ్గిస్తూ ఆర్డినెన్స్ తెచ్చారు. తాజాగా మోటార్ వాహనాల ట్యాక్సేషన్ చట్టంలోనూ సవరణలు తెచ్చేందుకు అసెంబ్లీలో బిల్లు ఆమోదించారు.