బాలకోట్ దాడుల అనుభవంతోనే 'ఆపరేషన్ సిందూర్' విజయం

ఆరేళ్ల క్రితం జరిగిన బాలాకోట్ వైమానిక దాడుల అనంతరం ఎదురైన విమర్శలు, ప్రశ్నలే ఇటీవలే నిర్వహించిన ఆపరేషన్ సిందూర్' విజయానికి బలమైన పునాది వేశాయని భారత వాయుసేన అధిపతి  ఎయిర్ చీఫ్ మార్షల్ అమర్ ప్రీత్ సింగ్ అన్నారు. శుక్రవారం ఢిల్లీలో జరిగిన వార్షిక సమావేశంలో ఆయన మాట్లాడుతూ బాలకోట్ అనుభవాల నుంచి నేర్చుకున్న పాఠాలు తాజా ఆపరేషన్‌ను పక్కాగా అమలు చేయడానికి ఎంతగానో దోహదపడ్డాయని స్పష్టం చేశారు.2019 నాటి బాలాకోట్ దాడిని గుర్తుచేసుకుంటూ ఆపరేషన్ విజయవంతమైనప్పటికీ మనవాళ్లే మమ్మల్ని పదేపదే ప్రశ్నలు అడిగారు. నష్టం జరిగినట్టు అక్కడేమీ కనిపించలేదని అన్నారు. మనం మనవాళ్లనే ఎక్కువగా అడుగుతాము. పక్క వాళ్ల గురించి పట్టించుకోము. ఆ అనుభవమే ఈసారి 'ఆపరేషన్ సిందూర్' ప్రణాళికను, కమ్యూనికేషన్ వ్యూహాలను మెరుగ్గా రూపొందించుకోవడానికి సహాయపడింది" అని ఆయన వివరించారు. పాకిస్థాన్‌లోని ఉగ్రవాద మౌలిక సదుపాయాలపై 'ఆపరేషన్ సిందూర్' ఒక నిర్ణయాత్మకమైన, పక్కా ప్రణాళికతో కూడిన మిషన్ అని అభివర్ణించారు.ఈ ఏడాది మే నెలలో పహల్గామ్‌లో 26 మంది పౌరుల మృతికి కారణమైన ఉగ్రదాడికి ప్రతిస్పందనగా భారత్ 'ఆపరేషన్ సిందూర్' చేపట్టిన విషయం తెలిసిందే. ఈ ఆపరేషన్ విజయవంతం కావడానికి బలమైన రాజకీయ సంకల్పమే కారణమని అమర్ ప్రీత్ సింగ్ అన్నారు. "ఈసారి మాకు పూర్తి స్వేచ్ఛనిచ్చారు ఎలాంటి ఆంక్షలు విధించలేదు. మా నాయకత్వం మాకు స్పష్టమైన దిశానిర్దేశం చేసింది" అని ఆయన తెలిపారు. అంతేకాకుండా తొలిసారిగా త్రివిధ దళాలు చీఫ్ ఆఫ్ డిఫెన్స్ స్టాఫ్  జాతీయ భద్రతా సలహాదారు  కలిసి పూర్తి సమన్వయంతో పనిచేశాయని ఆయన వెల్లడించారు.'ఆపరేషన్ సిందూర్' సమయంలో పాకిస్థాన్ తమ ఎయిర్‌ఫీల్డులను మూసివేయకపోవడం, గగనతలంలో పౌర విమానాలు తిరుగుతుండటం వంటి సవాళ్లు ఎదురయ్యాయని, ఇది లక్ష్యాలను గుర్తించడాన్ని మరింత క్లిష్టతరం చేసిందని ఆయన పేర్కొన్నారు. అయినప్పటికీ, భారత వాయుసేన ఉగ్రవాద స్థావరాలపై కచ్చితత్వంతో దాడులు చేసిందని అన్నారు."శత్రువులు వెనక్కి తగ్గనప్పుడు, వారిని గట్టిగా దెబ్బకొట్టాం. వారి బేస్‌లు, రాడార్లు, కంట్రోల్ సెంటర్లు, విమానాలు భారీగా నష్టపోయాయి" అని ఆయన స్పష్టం చేశారు. 'ఆపరేషన్ సిందూర్' కేవలం సైనిక విజయం మాత్రమే కాదని, క్లిష్ట పరిస్థితుల్లోనూ కచ్చితత్వంతో దాడులు చేయగల భారత సామర్థ్యానికి ఇదొక నిదర్శనమని ఆయన వ్యాఖ్యానించారు.