తిరుపతి జిల్లాలో అనూహ్య ఘటన,,, పాము తల కొరికి చంపేశాడు

నిత్య జీవితంలో మన చుట్టూ అనేక ఘటనలు జరుగుతూ ఉంటాయి. అందులో కొన్ని ఘటనలు మనల్ని ఆశ్చర్యపరిస్తే.. మరికొన్ని ఆందోళన కలిగిస్తాయి. ఇంకొన్ని సంభ్రమాశ్చర్యాలతో కూడిన భయాన్ని పుట్టిస్తాయి. ఇప్పుడు చెప్పుకోబోయే ఘటన కూడా అలాంటిదే. ఇది తలుచుకున్నప్పుడల్లా వెన్నులో వణుకు పుట్టించకపోనదు. ఓ రకమైన ఏహ్యభావం కూడా అనిపిస్తే అందులో ఎలాంటి సందేహం లేదు. సాధారణంగా విషపురుగులను చూస్తే ఎవరైనా భయపడకమానరు. అవి కనిపించినప్పుడు, కొంతమంది వాటికి దూరం జరిగితే, మరికొందరు కాలికి పని చెప్తుంటారు. ఇక పాము అలాంటివి కనిపిస్తే ఉసేన్ బోల్డ్‌కు కజిన్ బ్రదర్ లెక్కన పరుగు పెట్టడం ఖాయం. కానీ వీడెవడండీ బాబూ.. పామును పట్టుకుని మరీ ఇలా చేశాడు..

తిరుపతి జిల్లా తొట్టంబేడు మండలం చియ్యవరం.. ఈ ఊర్లోని వెంకటేష్ అనే వ్యక్తికి మద్యం తాగే అలవాటు ఉంది. అసలే కోతి, దానికి తోడు కల్లి తాగింది.. ఆపైన తేలు కుట్టింది అన్నట్లుగా చుక్క పడితే మనోడికి లెక్క ఉండదు. ఇదిలా ఉండగానే గురువారం రాత్రి వెంకటేష్ ఫుల్లుగా మద్యం తాగాడు. తాగిన తర్వాత ఊగుతూ తూలుతూ ఇంటికి బయల్దేరాడు. ఇలా వెళ్తున్న సమయంలో మనోడికి ఓ నల్లటి వస్తువు కనిపించింది. నిషా మత్తులో ఉన్న వెంకటేష్‌ పామును తాడనుకున్నాడో ఏమో తెలియదు కానీ.. నల్లటి త్రాచు పామును సరిగా గమనించలేదు.

మందు తాగింది మనోడు కానీ.. పాము కాదు కదా.. దాని డ్యూటీ అది చేసేసింది.. వెంకటేష్‌ను తాచుపాము కాటేసింది. అయితే ఎంత తాగాడో, ఏం తాగాడో తెలియదు కానీ.. పాము కాటేసిందన్న కోపంతో వెంకటేష్ పామును పట్టుకుని దాని తలను కొరికేశాడు. అక్కడితో ఊరుకున్నాడా అంటే అదీ లేదు. చచ్చిపోయిన పామును తనతో పాటుగా ఇంటికి పట్టుకెళ్లాడు. తన పక్కనే పామును పెట్టుకుని పడుకున్నాడు. మత్తులో నిద్రలోకి జారుకున్నాడు. అయితే పామును కొరకటంతో దాంట్లోని విషం వెంకటేష్ ఒంట్లోకి ప్రవేశించింది. దీంతో అర్ధరాత్రి వేళ అయ్యే సరికి వెంకటేష్ అస్వస్థతకు గురయ్యాడు.

వెంకటేష్ ఆరోగ్య పరిస్థితిలో మార్పులు వచ్చాయి. దీంతో కుటుంబసభ్యులు గమనించి వెంటనే శ్రీకాళహస్తి ఆస్పత్రికి తరలించారు. అనంతరం అక్కడి నుంచి మెరుగైన వైద్యం కోసం శుక్రవారం ఉదయం తిరుపతిలోని రుయా ఆస్పత్రికి తరలించారు. ప్రస్తుతం తిరుపతిలోని రుయా ఆస్పత్రిలో వెంకటేష్‌కు వైద్యులు చికిత్స అందిస్తున్నారు. అయితే ఈ ఘటన గురించి తెలిసిన జనం.. ఎంత తాగితే మాత్రం పామును కొరికేయటం ఏమిటీ అంటూ చెవులు కొరుక్కుంటున్నారు.