ఆనంద్ కరాజ్ చట్టంపై సుప్రీంకోర్టు కీలక ఆదేశం

సిక్కుల వివాహాల నమోదుపై సుప్రీం కోర్టు కీలక తీర్పును వెలువరించింది. ఆనంద్ కరాజ్ చట్టం కింద సిక్కు వివాహాలను నమోదు చేయడానికి అవసరమైన నిబంధనలను రూపొందించి.. వాటిని నోటిఫై చేయాలని అన్ని రాష్ట్రాలు, కేంద్ర పాలిత ప్రాంతాలను అత్యున్నత న్యాయస్థానం ఆదేశించింది. ఈ ప్రక్రియను పూర్తి చేయడానికి నాలుగు నెలల గడువును కూడా విధించింది. 2012లో ఈ చట్టం అమలులోకి వచ్చినా.. అనేక రాష్ట్రాలు ఇప్పటికీ సిక్కు వివాహాలను హిందూ వివాహ చట్టం కింద నమోదు చేస్తున్న నేపథ్యంలో సుప్రీంకోర్టు ఈ కీలక నిర్ణయం తీసుకుంది.

జస్టిస్ విక్రమ్ నాథ్, జస్టిస్ సందీప్ మెహతాలతో కూడిన ధర్మాసనం ఈ ఆదేశాలు జారీ చేసింది. ఆనంద్ కరాజ్ వివాహాల నమోదు కోసం ఒక యంత్రాంగాన్ని ఏర్పాటు చేయడం ప్రతి రాష్ట్ర ప్రభుత్వ కర్తవ్యం అని ధర్మాసనం పేర్కొంది. ఏదైనా రాష్ట్రంలో సిక్కుల జనాభా సంఖ్య తక్కువగా ఉన్నప్పటికీ.. ఈ పని వాయిదా వేయకూడదని స్పష్టం చేసింది. వివాహ ధృవీకరణ పత్రం.. నివాసం, భరణం, వారసత్వం, భీమా, ఏకపత్నీవ్రతానికి సంబంధించిన చట్టపరమైన విషయాలకు చాలా కీలకం అని కోర్టు నొక్కి చెప్పింది. ముఖ్యంగా మహిళలు, పిల్లల చట్టపరమైన హక్కులను కాపాడటానికి ఈ పత్రం చాలా ముఖ్యమని కోర్టు తెలిపింది.

ఉత్తరాఖండ్‌కు చెందిన న్యాయవాది అమన్‌జోత్‌ ఛద్దా దాఖలు చేసిన పిటిషన్‌పై విచారణ సందర్భంగా సుప్రీం కోర్టు ఈ ఆదేశాలను జారీ చేసింది. సిక్కుల చట్టం కింద వివాహాల నమోదుకు సంబంధించిన నిబంధనలను పలు రాష్ట్రాలు ఇంకా నోటిఫై చేయలేదని పిటిషనర్ కోర్టు దృష్టికి తీసుకువచ్చారు. ఆనంద్ కరాజ్ చట్టం పార్లమెంట్ ఆమోదించిన కేంద్ర చట్టం అయినప్పటికీ.. రాజ్యాంగంలోని కొన్ని ప్రత్యేక నిబంధనల కారణంగా సిక్కిం, గోవా రాష్ట్రాల్లో దాన్ని అమలు చేయడం లేదు. ఈ రాష్ట్రాలలో చట్టాన్ని అమలు చేయాలంటే.. కేంద్ర ప్రభుత్వం ఒక నోటిఫికేషన్‌ను జారీ చేయడం తప్పనిసరి.

"రాష్ట్రాలు, కేంద్ర పాలిత ప్రాంతాలలో ఒకే చట్టబద్ధమైన సదుపాయం సమానంగా అందుబాటులో లేకపోవడం వల్ల పౌరులకు అసమాన ఫలితాలు లభిస్తున్నాయి. ఇది సమానత్వానికి విరుద్ధం. మతపరమైన గుర్తింపును గౌరవిస్తూనే పౌర సమానత్వాన్ని కాపాడే లౌకిక చట్రంలో.. ఆనంద్ కరాజ్ వివాహాలు ఇతర వివాహాల మాదిరిగానే నమోదు చేసి ధృవీకరించడానికి చట్టం ఆచరణీయ మార్గాన్ని అందించాలి" అని న్యాయస్థానం స్పష్టం చేసింది.

కొన్ని రాష్ట్రాలు సిక్కుల జనాభా తక్కువగా ఉన్నందున హిందూ వివాహ చట్టం కింద వారి వివాహాలను నమోదు చేయవచ్చని వాదించాయి. నిబంధనలను రూపొందించడానికి సమయం పడుతుందని కూడా కొన్ని రాష్ట్రాలు కోర్టుకు తెలిపాయి. అయితే ఈ వాదనలను తోసిపుచ్చుతూ సుప్రీం కోర్టు ఈ కీలక తీర్పును వెలువరించింది. ఇది సిక్కు సమాజానికి ఒక పెద్ద విజయం అని న్యాయ నిపుణులు అంటున్నారు.