దసరాకు ముందు మద్యం మాఫియాపై పోలీసుల దాడులు – భారీగా పట్టుబడిన బాటిళ్లు

దసరా సీజన్‌ దగ్గరపడుతోందన్న నేపథ్యంలో తెలంగాణ వ్యాప్తంగా ఎక్సైజ్‌ శాఖ అధికారులు మద్యం అక్రమ రవాణాపై తనిఖీలు కట్టుదిట్టం చేశారు. పండుగ సీజన్‌లో మద్యం డిమాండ్ పెరుగుతుందన్న నేపథ్యంలో మాఫియాలు చురుగ్గా మారటంతో అధికారులు ముందస్తుగా రంగంలోకి దిగారు.రంగారెడ్డి, హైదరాబాద్, సికింద్రాబాద్ పరిధిలో జరిగిన ప్రత్యేక తనిఖీల్లో పెద్ద ఎత్తున నాన్‌ డ్యూటీ పెయిడ్‌ లిక్కర్‌ను అధికారులు స్వాధీనం చేసుకున్నారు. మొత్తం 585 మద్యం బాటిళ్లు పట్టుబడగా, వాటి విలువను సుమారు రూ.21.80 లక్షలుగా అంచనా వేస్తున్నారు.రంగారెడ్డి ఎన్‌ఫోర్స్‌మెంట్‌ ఏఈఎస్ జీవన్ కిరణ్ ఆధ్వర్యంలో పహాడీషరీఫ్ వద్ద వాహనాల తనిఖీలు నిర్వహించారు. ఈ తనిఖీల్లో గోవా, దిల్లీ, హరియాణా రాష్ట్రాల నుంచి మద్యం తరలిస్తున్న వారిని అదుపులోకి తీసుకున్నారు. ఒక్కొక్కరు 10 నుంచి 15 బాటిళ్లు మోసుకెళ్తున్నట్లు గుర్తించారు. ఒక్క పహాడీషరీఫ్‌ చెక్‌పోస్టు వద్దే 449 మద్యం బాటిళ్లు పట్టుబడ్డాయి.అంతేకాదు, హైదరాబాద్ డీటీఎఫ్‌ అధికారులు ధూల్‌పేట్‌లోని ఓ ఇంటిపై దాడి చేసి 72 మద్యం సీసాలు స్వాధీనం చేసుకున్నారు. అదే విధంగా, సికింద్రాబాద్ రైల్వే స్టేషన్‌ సమీపంలో 47 బాటిళ్లు, నాంపల్లి పిస్తా హౌజ్ ప్రాంతంలో నిర్వహించిన తనిఖీల్లో 136 మద్యం సీసాలను అధికారులు స్వాధీనం చేసుకున్నారు. ఈ మొత్తం అక్రమ మద్యం విలువను అధికారులు రూ.6.80 లక్షలుగా అంచనా వేశారు.ఎక్సైజ్ శాఖ అధికారుల ప్రకారం, అక్రమ రవాణా వల్ల రాష్ట్ర ప్రభుత్వానికి ఆదాయంలో నష్టం జరుగుతోంది. దసరా పండుగ వరకు ఈ తనిఖీలు మరింత కఠినంగా కొనసాగుతాయని, అక్రమ లిక్కర్ రవాణాపై నిఘా పెంచుతామని వారు హెచ్చరించారు.