మీ ఇంటి పన్ను బకాయి రూ.24 లక్షలు చెల్లించండి... మీటింగ్‌లో జనసేన ఎమ్మెల్యేను నిలదీసిన సర్పంచ్

విజయనగరం జిల్లా నెల్లిమర్ల నియోజకవర్గం ఎమ్మెల్యే లోకం మాధవి వార్తల్లో నిలిచారు. జనసేన ఎమ్మెల్యే లోకం మాధవి 24 లక్షల రూపాయలు ఇంటి పన్ను బకాయిపడ్డారంటూ వీడియో వైరల్ కావటం చర్చనీయాంశమైంది.లోకం మాధవిని ఇంటి పన్ను బకాయి చెల్లించాలంటూ సర్పంచ్ కోరడం ఆసక్తికరంగా మారింది. విజయనగరం జిల్లా భోగాపురం మండలం ముంజేరు సర్పంచ్‌ పూడి నూకరాజు.. రూ.24 లక్షలు ఇంటి పన్ను బకాయిలు చెల్లించాలంటూ మండల సర్వసభ్య సమావేశంలో ఎమ్మెల్యే లోకం మాధవిని కోరారు. ఇంటి పన్ను బకాయి రూ.24 లక్షలు కడితే పంచాయతీలో అభివృద్ధి పనులు చేసే అవకాశం ఉంటుందని.. తక్షణమే ఇంటి పన్ను చెల్లించి సహకరించాలని సర్పంచ్ ఎమ్మెల్యేను కోరారు.

ఎంపీపీ ఉప్పాడ అనూషారెడ్డి అధ్యక్షతన భోగాపురం మండల పరిషత్‌ కార్యాలయంలో ఆదివారం మండల సర్వ­సభ్య సమావేశం జరిగింది. ఈ సందర్భంగా ఇంటి పన్ను బకాయిలు చెల్లించాలంటూ ఎమ్మెల్యేను సర్పంచ్ కోరటం ప్రాధాన్యం సంతరించుకుంది. తాను గతంలో ఎప్పుడూ బకాయిలు పడలేదని.. దీనిని కూడా చెల్లిస్తానని ఎమ్మెల్యే చెప్పినట్లు తెలిసింది. ఈ వీడియో సోషల్ మీడియాలో వైరల్ అవుతోంది.

 మరోవైపు లోకం మాధవి ఆస్తులకు సంబంధించి ఏపీ ఎన్నికల సమయంలో పెద్దఎత్తున చర్చ జరిగిన సంగతి తెలిసిందే . ఎన్నికల అఫిడవిట్‌లో తనకు రూ.894 కోట్ల మేరకు ఆస్తులు ఉన్నట్లు లోకం మాధవి పేర్కొనటం అప్పట్లో చర్చనీయాంశమైంది. మిరాకిల్ అనే సాఫ్ట్‌వేర్ కంపెనీతో పాటుగా.. విద్యా సంస్థలు, భూములు, బ్యాంక్ డిపాజిట్లు, నగదు రూపంలో ఆస్తులు ఉన్నట్లు లోకం మాధవి తన అపిడవిట్‌లో పేర్కొన్నారు.బ్యాంకులో రూ.4.41 కోట్లు, తన వద్ద రూ. 1.15 లక్షలు నగదు ఉన్నట్లు అప్పట్లో తెలిపారు. మొత్తంగా చరాస్తులు రూ.856.57 కోట్లు, స్థిరాస్తులు రూ.15.70 కోట్లు ఉన్నట్లు ఎన్నికల అఫిడవిట్లో వెల్లడించారు. అప్పులు రూ.2.69 కోట్లు ఉన్నట్లుగా పేర్కొన్నారు.

మరోవైపు లోకం నాగ మాధవి జనసేన పార్టీ ద్వారా రాజకీయాల్లోకి ఎంట్రీ ఇచ్చారు. 2019 ఎన్నికల్లో జనసేన పార్టీ తరుఫున నెల్లిమర్ల నియోజకవర్గం నుంచి పోటీ చేసి మూడో స్థానంలో నిలిచారు. 2024 ఎన్నికల నాటికి జనసేన, టీడీపీ, బీజేపీ పొత్తుల్లో భాగంగా ఈ స్థానం జనసేనకు వెళ్లింది. దీంతో జనసేన అభ్యర్థిగా పోటీ చేసిన లోకం మాధవి సమీప వైసీపీ అభ్యర్థి అప్పలనాయుడుపై 39,720 ఓట్ల మెజారిటీతో గెలుపొంది తొలిసారిగా శాసనసభలోకి అడుగుపెట్టారు.