రూ. 4.70 లక్షలకే మారుతీ కొత్త కారు.. ఏకంగా రూ. 94 వేలు తగ్గింపు

మీరు దసరా, దీపావళి పండగ సీజన్‌లో తక్కువ ధరల్లో కొత్త కారు కొనుగోలు చేయాలని చూస్తున్నారా..? అయితే మీకు బంపరాఫర్. ఇప్పటికే కేంద్రం.. జీఎస్టీ సంస్కరణల్ని ప్రకటించింది. 12, 28 శాతం పన్ను శ్లాబుల్ని తొలగించగా.. అవి తక్కువ పన్ను శ్లాబులు అంటే 18, 5 శాతానికి చేరాయి. దీంతో.. ఆయా పన్ను శ్లాబుల్లోకి వచ్చే వస్తువులు, ఉత్పత్తుల ధరల్ని తగ్గిస్తూ వస్తున్నాయి దిగ్గజ కంపెనీలు. ఇక ముఖ్యంగా చిన్న కార్లపై జీఎస్టీ 28 నుంచి 18 శాతానికి చేరింది. సెస్ కూడా తొలగించింది. దీంతో వీటి రేట్లు భారీగా తగ్గుతున్నాయి. ఈ క్రమంలోనే అతిపెద్ద కార్ల తయారీ సంస్థ.. మారుతీ సుజుకీ తన ఒక్కో మోడల్‌పై ఒక్కో సమయంలో రేట్ల కోతను ప్రకటిస్తూ వస్తోంది.

ఇప్పుడు హ్యాచ్‌బ్యాక్ సెగ్మెంట్ సెలెరియో మోడల్ కార్ల ధరలపై తగ్గింపుల్ని ప్రకటించింది. ఇక్కడ కేవలం జీఎస్టీ రేట్ల కోత మాత్రమే కాకుండా.. పండగ సీజన్ నేపథ్యంలో అదనపు ఆఫర్లను ప్రకటించింది. దీంతో రేట్లు భారీగా దిగొచ్చాయి. మీరు ఎంట్రీ లెవెల్ కార్లను కొనుగోలు చేయాలని చూస్తే.. సెలెరియో బెస్ట్ ఆప్షన్లలో ఒకటి. దీని కంటే తక్కువ ధరల్లో ఆల్టో కే10 కూడా ఉన్నప్పటికీ.. సెలెరియో మోడల్స్ ఎక్కువగా విక్రయించాలని లక్ష్యంగా పెట్టుకుంది.

>> సెలెరియో ఎల్ఎక్స్‌ఐ వేరియంట్‌పై రూ. 94 వేలు తగ్గించింది మారుతీ సుజుకీ. దీంతో జీఎస్టీ రేట్ల కోతకు ముందు ధర రూ. 5.64 లక్షలుగా ఉండగా.. ఇప్పుడు రూ. 4.70 లక్షలకు చేరింది. వీఎక్స్ఐ వేరియంట్ ధర రూ. 84 వేలు తగ్గగా.. ఇప్పుడు దీని ఎక్స్ షోరూం ధర రూ. 5.16 లక్షలకు చేరింది. జేఎక్స్‌ఐ వేరియంట్ ధర రూ. 68 వేలు తగ్గగా.. ఇప్పుడు రూ. 5.71 లక్షలకు చేరింది.

>> వీఎక్స్‌ఐ ఏఎంటీ ధర రూ. 89 వేలు తగ్గి.. రూ. 5.61 లక్షలుగా ఉంది. వీఎక్స్ఐ సీఎన్‌జీ ధర రూ. 92 వేలు తగ్గి రూ. 5.98 లక్షలుగా ఉంది. జేఎక్స్ఐ ఏఎంటీ ధర రూ. 73 వేలు తగ్గింది. జేఎక్స్ఐ ప్లస్ ధర రూ. 59 వేలు తగ్గింది. జేఎక్స్ఐ ప్లస్ ఏఎంటీ ధర రూ. 66 వేలు తగ్గింది. వీటి ధరలు రూ. 6 లక్షలకుపైగా ఉంది.

మారుతీ సుజుకీ ఇటీవల తన సెలెరియో మోడళ్లను అప్డేట్ చేస్తుంది. కొత్త డిజైన్‌లో తీసుకురావడమే కాకుండా.. ఫీచర్లను కూడా అప్డేట్ చేసింది. ఇందులో చాలా కలర్స్ ఉన్నాయి. స్పీడీ బ్లూ, గ్లెస్టెనింగ్ గ్రే, ఆర్కిటిక్ వైట్, సిల్కీ సిల్వర్, సాలిడ్ ఫైర్ రెడ్, కెఫైన్ బ్రౌన్, పియరీ బ్లూయిష్ బ్లాక్ వంటివి ఉన్నాయి.