'గాంధీ జయంతి రోజు ప్రజలందరూ ఆ బట్టలే ధరించండి': ప్రధాని మోదీ

భారత ప్రధాని నరేంద్ర మోదీ తన 'మన్ కీ బాత్' 126వ ఎపిసోడ్‌లో జాతిని ఉద్దేశించి మాట్లాడుతూ కీలక వ్యాఖ్యలు చేశారు. ఈ ఏడాది అక్టోబర్ 2వ తేదీన మహాత్మా గాంధీ జయంతిని పురస్కరించుకుని.. దేశ ప్రజలంతా స్వదేశీ ఉత్పత్తులను, ముఖ్యంగా ఖాదీ వస్త్రాలను కొనుగోలు చేసి, ధరించాలని విజ్ఞప్తి చేశారు. స్వదేశీ ఉత్పత్తుల వాడకాన్ని ప్రోత్సహించడం ద్వారా దేశ ప్రజలు ఆర్థికంగా స్వయంసమృద్ధిని సాధించాలని పిలుపునిచ్చారు.

మహాత్మా గాంధీ.. స్వాతంత్ర్య పోరాట సమయంలో స్వదేశీ ఉత్పత్తులను ఉపయోగించడం వల్ల కల్గే ఉపయోగాల గురించి ప్రజలకు అవగాహన కల్పించారని, దీని ద్వారా భారతదేశం తన సొంత కాళ్లపై నిలబడాలని గాంధీ కలలు కన్నారని ప్రధాని గుర్తు చేశారు. అదే స్ఫూర్తితోనే.. "వికసిత భారత్" లక్ష్యాన్ని సాధించడానికి ప్రజలు దేశీయంగా తయారైన వస్తువులను కొనుగోలు చేయాలని కోరారు.

గత 11 ఏళ్లలో భారతదేశంలో ఖాదీ పరిశ్రమ అద్భుతమైన ప్రగతిని సాధించిందని ప్రధాని మోదీ ప్రశంసించారు. గతంలో కేవలం ప్రభుత్వ సహాయంతోనే మనుగడ సాగించిన ఈ పరిశ్రమ.. ఇప్పుడు స్వయం సమృద్ధితో అభివృద్ధి చెందుతోందని తెలిపారు. గత కొన్ని సంవత్సరాలలో ఖాదీ ఉత్పత్తి, అమ్మకాలు భారీగా పెరిగాయని, దీని ద్వారా వేలాది మంది గ్రామీణ కార్మికులకు ఉపాధి అవకాశాలు లభించాయని ఆయన పేర్కొన్నారు. ఈ విజయం ఖాదీ ఉత్పత్తులను ప్రోత్సహించడం యొక్క ప్రాముఖ్యతను నిరూపిస్తుందని ఆయన అన్నారు.

ప్రధాని మోదీ తమ రాజకీయ విభేదాలను పక్కనబెట్టి.. కేవలం భారతీయులు తయారుచేసిన వస్తువులను మాత్రమే కొనుగోలు చేసేలా దేశవ్యాప్తంగా ఒక విప్లవాన్ని ప్రారంభించాలని అన్ని రాజకీయ పార్టీలకు విజ్ఞప్తి చేశారు. రాజకీయాలకు అతీతంగా దేశం కోసం అందరూ కలిసి పనిచేయాలని ఆయన కోరారు. కేవలం అక్టోబర్ 2వ తేదీన మాత్రమే కాకుండా నిత్యం ఖాదీ ఉత్పత్తులను ఉపయోగించడం ద్వారా దేశీయ పరిశ్రమలకు చేయూతనివ్వాలని ఆయన దేశ ప్రజలకు సూచించారు. ఈ చిన్నపాటి ప్రయత్నం ద్వారా గ్రామీణ ఆర్థిక వ్యవస్థ బలోపేతం అవుతుందని.. ప్రజల జీవితాల్లో గణనీయమైన మార్పు వస్తుందని ఆయన అన్నారు.

ఈ ప్రసంగం ద్వారా ప్రధాని మోదీ స్వదేశీ ఉద్యమాన్ని మరింత ముందుకు తీసుకెళ్లాలని ఆకాంక్షించారు. అలాగే దేశ ప్రజలను స్వయం సమృద్ధిని ప్రోత్సహిస్తూ, భారత దేశాన్ని ఆర్థికంగా బలమైన దేశంగా మార్చాలన్న తన ప్రభుత్వ సంకల్పాన్ని పునరుద్ఘాటించారు. దేశవ్యాప్తంగా ప్రతి ఒక్కరు తమ తమ స్థానాల నుంచి ఈ మహా యజ్ఞంలో పాల్గొనాలని ఆయన కోరారు. ఇది కేవలం ఆర్థిక ప్రయోజనాలకే పరిమితం కాకుండా ఒక దేశంగా మనందరిలో దేశభక్తిని, ఐక్యతను పెంపొందిస్తుందని ఆయన నొక్కి చెప్పారు.