బాక్సింగ్ దిగ్గజం మేరీకోమ్ ఇంట్లో దొంగల బీభత్సం

భారత బాక్సింగ్ దిగ్గజం, మాజీ రాజ్యసభ సభ్యురాలు మేరీ కోమ్ ఇంటికి దొంగలు కన్నం వేశారు. ఆమె మెఘాలయాలో జరిగిన ఒక మారథాన్‌లో పాల్గొనడానికి వెళ్లిన సమయంలో ఈ దొంగతనం జరిగింది. అధికారులు తెలిపిన వివరాల ప్రకారం.. హర్యానాలోని ఫరీదాబాద్ సెక్టార్ 46లో ఉన్న ఆమె రెండు అంతస్తుల బంగ్లా 'ఐబెనెసర్ ఇన్'లోకి గుర్తు తెలియని దుండగులు చొరబడి లక్షల విలువ చేసే వస్తువులను ఎత్తుకెళ్లారు.

కొంతకాలంగా ఈ ఇల్లు తాళం వేసి ఉండటంతో దొంగలు దీనిని అదునుగా చేసుకుని లోపలికి ప్రవేశించారు. విలువైన వస్తువులను అపహరిస్తున్న దృశ్యాలు ఆ ఇంటిలో అమర్చిన సీసీటీవీ ఫుటేజీలో స్పష్టంగా రికార్డు అయ్యాయి. ఆ ఫుటేజ్‌లో గుర్తు తెలియని వ్యక్తులు ఒక టీవీ సెట్‌తో పాటు ఇతర విలువైన వస్తువులను తీసుకెళ్తున్నట్లు కనిపించింది. ప్రస్తుతం ఈ ఫుటేజ్‌ను పోలీసులు క్షుణ్ణంగా పరిశీలిస్తున్నారు.

మేఘాలయాలోని సోహ్రాలో మారథాన్‌లో పాల్గొంటున్న మేరీ కోమ్‌కు తన పొరుగువారు ఈ విషయాన్ని తెలియజేయడంతో దొంగతనం విషయం వెలుగులోకి వచ్చింది. ఈ వార్త విన్న ఆమె తీవ్ర ఆందోళనకు గురయ్యారు. “నేను ఈరోజే ఢిల్లీకి తిరిగి వెళ్లాల్సి ఉంది. ఇప్పుడు భయంగా, ఆందోళనగా ఉంది. ఈ దొంగతనం ఈ వారం ప్రారంభంలోనే జరిగింది” అని ఆమె ఈవెంట్ నిర్వాహకులకు తెలియజేశారు.

ఆరుసార్లు ప్రపంచ ఛాంపియన్‌గా నిలిచిన మణిపూర్‌కు చెందిన ఈ క్రీడాకారిణి.. తన నివాసానికి చేరుకున్న తర్వాతే నష్టపోయిన వస్తువుల పూర్తి వివరాలు తెలుస్తాయని అన్నారు. "నేను ఇప్పుడు ఇంట్లో లేను. ఇంటికి చేరుకున్న తర్వాతే నష్ట పరిహారం ఎంత అనేది తెలుస్తుంది. టీవీతో పాటు ఇతర వస్తువులను దొంగలు తీసుకెళ్తున్నట్లు సీసీటీవీ ఫుటేజ్‌లో కనిపించింది. నా పొరుగువారు చెప్పిన దాని ప్రకారం.. ఇది సెప్టెంబర్ 24వ తేదీన జరిగిందని నాకు తెలిసింది. ఇది నా ఫరీదాబాద్ ఇంట్లో జరిగింది. నేను ఇప్పటికే పోలీసులకు సమాచారం అందించాను" అని ఆమె తెలిపారు.

ఈ సంఘటనపై పోలీసులు కేసు నమోదు చేసి దర్యాప్తు ప్రారంభించినట్లు తెలిపారు. నిందితులను పట్టుకోవడానికి ఫరీదాబాద్ పోలీసులు ప్రత్యేకంగా ఆరు బృందాలను ఏర్పాటు చేశారు. ఆ బృందాలు సీసీటీవీ ఫుటేజ్ ఆధారంగా నిందితులను గుర్తించే పనిలో నిమగ్నమయ్యాయి. మేరీ కోమ్ లాంటి ఒక ప్రముఖ క్రీడాకారిణి ఇంటికే భద్రత లేకపోవడంపై పలువురు ఆందోళన వ్యక్తం చేస్తున్నారు. ఈ కేసును త్వరగా పరిష్కరించి నిందితులను పట్టుకోవాలని మేరీ కోమ్ అభిమానులు పోలీసులను కోరుతున్నారు.