కెనడాలో భారతీయ సినిమాలపై దాడి.. కాంతార, OG నడుస్తున్న థియేటర్లపై పెట్రోల్ బాంబులు, కాల్పులు

కెనడాలోని అంటారియో ప్రావిన్స్‌లోని ఓక్‌విల్ నగరంలో ఉన్న ఒక సినిమా థియేటర్‌పై వారం రోజుల వ్యవధిలోనే రెండు సార్లు దాడులు జరిగాయి. ఈ నేపథ్యంలోనే తమ సిబ్బంది, ప్రేక్షకుల ప్రాణాలను దృష్టిలో ఉంచుకుని ఆ థియేటర్ యాజమాన్యం భారతీయ చలన చిత్రాల ప్రదర్శనను నిలిపివేస్తున్నట్లు ప్రకటించింది. దాడికి గురైన ఫిల్మ్.సి.ఎ థియేటర్ అధికారులు.. తమ సౌత్ ఏషియన్ సినిమాల ప్రదర్శన కారణంగానే ఈ దాడులు జరిగాయని పేర్కొన్నారు. ఈక్రమంలోనే రిషబ్ శెట్టి నటించిన టకాంతార: ఎ లెజెండ్ ఛాప్టర్ 1', పవన్ కళ్యాణ్ నటించిన 'దే కాల్ హిమ్ OG' చిత్రాల ప్రదర్శనను రద్దు చేశారు.

వారం రోజుల వ్యవధిలో రెండు సార్లు దాడులు

సెప్టెంబర్ 25వ తేదీ తెల్లవారుజామున 5.20 గంటల ప్రాంతంలో తొలిసారి ఈ థియేటర్‌పై దాడి జరిగింది. ఇద్దరు ముసుగు ధరించిన వ్యక్తులు ఎరుపు రంగు గ్యాస్ క్యాన్‌లతో లోపలికి చొరబడి.. థియేటర్ ప్రధాన ద్వారం వద్ద మండే ద్రవాన్ని పోసి నిప్పంటించారు. దీనిపై హాల్టన్ పోలీసులు స్పందిస్తూ.. నిందితులు మండే ద్రవాన్ని ఉపయోగించి థియేటర్ ప్రధాన ద్వారం వద్ద మంటలు పెట్టారని తెలిపారు. అయితే ఈ మంటలు బయటి భాగంలోనే ఆగిపోవడం వల్ల థియేటర్‌కు పెద్ద మొత్తంలో నష్టం జరగలేదని పోలీసులు వెల్లడించారు.

థియేటర్ యాజమాన్యం ఈ దాడికి సంబంధించిన సీసీటీవీ ఫుటేజీని సోషల్ మీడియాలో విడుదల చేసింది. భారతీయ సినిమాల ప్రదర్శనకు సంబంధించి మాకు బెదిరింపులు వచ్చాయని చెప్పారు. అలాగే దాడి జరగడం కూడా ఇదే తొలిసారేమీ కాదని వెల్లడించారు. ఈ పునరావృత చర్యలు కలవరపెడుతున్నప్పటికీ.. తమ కమ్యూనిటీతో కలిసి సినిమాలు ఆస్వాదించడానికి సురక్షితమైన, స్వాగతించే వాతావరణాన్ని అందించకుండా మమ్మల్ని నిరోధించలేవని థియేటర్ యాజమాన్యం ప్రకటించింది.

పోలీసులు ఈ దాడులకు గల కారణాలను అధికారికంగా ప్రకటించనప్పటికీ.. ఈ విధ్వంసక చర్యల వెనుక ఖలిస్థాన్ తీవ్రవాదుల హస్తం ఉండవచ్చని అనుమానిస్తున్నారు. ఆర్సన్ దాడికి కొన్ని గంటల ముందు ఫిల్మ్.సి.ఎ విడుదల చేసిన భద్రతా ఫుటేజీలో కొన్ని అనుమానాస్పద కదలికలు నమోదు అయ్యాయి. తెల్లవారుజామున 2 గంటల ప్రాంతంలో.. ఓ బూడిద రంగు ఎస్‌యూవీ థియేటర్ పార్కింగ్‌లోకి రాగా.. ముసుగు ధరించిన వ్యక్తి థియేటర్ ప్రవేశ ద్వారం వద్ద పరిశీలించి తిరిగి వెళ్లిపోయాడు. అదే వాహనం ఉదయం 5 గంటలలోపు మరో రెండు సార్లు తిరిగి వచ్చింది. ఆ తర్వాత 5.15 గంటలకు.. తెల్లటి ఎస్‌యూవీ కనిపించింది. అప్పుడే ఇద్దరు వ్యక్తులు ఎరుపు రంగు క్యాన్‌లలోని ద్రవాన్ని పోసి అగ్గిపెట్టెతో నిప్పంటించడం కెమెరాలో రికార్డ్ అయింది.

పోలీసులు మొదటి నిందితుడిని "నలుపు ప్యాంటు, నలుపు హూడీ, ముదురు రంగు హై-టాప్ షూస్, గ్లౌజులు, మెడికల్ మాస్క్ ధరించిన శ్వేతజాతీయుడు"గా వర్ణించారు. రెండవ వ్యక్తి "నలుపు ప్యాంటు, నలుపు హూడీ, తెలుపు స్లిప్-ఆన్ చెప్పులు, తెలుపు సాక్స్, గ్లౌజులు, మెడికల్ మాస్క్ ధరించాడని.. చేతిలో సెల్ ఫోన్" ఉందని వివరించారు. కేవలం ఒక వారం తర్వాత అక్టోబర్ 2వ తేదీన.. ఆ థియేటర్ మళ్లీ దాడికి గురైంది. రెండోసారి తెల్లవారుజామున 1.50 గంటలకు ఒంటరి తుపాకీధారి థియేటర్ ప్రవేశ ద్వారం వద్దకు వచ్చి అనేక రౌండ్లు కాల్పులు జరిపి పారిపోయాడు. ఈ నిందితుడిని "నలుపు దుస్తులు, నలుపు ఫేస్ మాస్క్ ధరించిన, బలంగా ఉన్న ముదురు రంగు చర్మం గల వ్యక్తి"గా పోలీసులు గుర్తించారు.

ఈ రెండు ఘటనలు ఉద్దేశపూర్వక దాడులే అని దర్యాప్తు అధికారులు బలంగా విశ్వసిస్తున్నారు. ఈ దాడులకు సంబంధించిన ఏదైనా సమాచారం ఉంటే తమకు తెలియజేయాలని డిస్ట్రిక్ట్ క్రిమినల్ ఇన్వెస్టిగేషన్స్ బ్యూరో ప్రజలకు విజ్ఞప్తి చేసింది. సురక్షితమైన వాతావరణం లేకపోవడంతో భారతీయ చిత్రాల ప్రదర్శనను థియేటర్ యాజమాన్యం నిరవధికంగా నిలిపివేయాల్సి వచ్చింది.