ఏడాదికి రూ.2 కోట్లు సంపాదిస్తున్నా.. స్వీపర్‌ ఉద్యోగం

సాధారణంగా ఎవరైనా సరే డబ్బుల కోసమే పని చేస్తుంటారు. ఉద్యోగం, వ్యాపారం.. ఇలా ఏం చేసినా మనకేం వస్తుందనే లాభంతోనే చేస్తుంటారు. డబ్బులు ఎక్కువవుతున్నా కొద్దీ కొంత మంది పని చేయడం కూడా తగ్గిస్తూ.. జీవితాన్ని హాయిగా గడుపుతుంటారు. మరికొందరు మాత్రం మరింత ఎక్కువ సంపాదించేందుకు 24 గంటలూ కష్టపడుతుంటారు. ఇప్పటి వరకు ఇలాంటి వారెందరినీ మనం చూశాం. కానీ తొలిసారి ఓ వింత కోటీశ్వరుడి కథను చూడబోతున్నాం. అతడికి పెట్టుబడులు, అద్దెల ద్వారా ఏడాదికి రూ.2 కోట్ల వరకూ వస్తుంటుంది. ఈ డబ్బులతో విలాసవంతమైన జీవితాన్ని గడపొచ్చు. హాయిగా ఇంట్లోనే తిని కూర్చోవచ్చు. కానీ అలా చేయడం ఏమాత్రం ఇష్టం లేని కోటీశ్వరుడు స్వీపర్‌గా పని చేస్తున్నారు. అతి తక్కువ జీతానికే పని చేస్తూ అందరినీ ఆశ్చర్యానికి గురి చేస్తున్నారు. మరి ఈ కోటీశ్వరుడు ఈ పనే ఎందుకు చేస్తున్నారు, దాని వెనుక ఉన్న కథేంటో మనం ఇప్పుడు తెలుసుకుందాం పదండి.

జపాన్‌లోని టోక్యోకు చెందిన 56 ఏళ్ల కోయిచి మత్సుబారా ఒక నివాస బిల్డింగ్‌లో పార్ట్‌టైమ్ స్వీపర్‌గా పని చేస్తున్నారు. అయితే ఈ పనిని ఆయన వారంలో కేవలం మూడు రోజులు మాత్రేమే చేస్తుంటారు. అలాగే రోజుకు నాలుగు గంటలు మాత్రమే ఇలా కష్టపడుతుంటారు. ఈ పని ద్వారా ఆయన నెలకు సుమారు 100,000 యెన్ల (సుమారు రూ.60,354) జీతం వస్తోంది. ఇది టోక్యోలో సగటు నెలసరి జీతం అయిన 350,000 యెన్ల (సుమారు రూ.2,11,240) కంటే చాలా తక్కువ. కానీ అదేమీ పట్టించుకోని మత్సుబారా మాత్రం ఇంత తక్కువ జీతానికే పని చేస్తున్నారు.

 అయితే ఈ జీతం ఆయన, ఆయన కుటుంబం బతకడానికి ఏమాత్రం సరిపోదు. కానీ ఇతడు కోటీశ్వరుడు కావడంతో.. కుటుంబం హాయిగా జీవిస్తోంది. అద్దెలు, పెట్టుబడుల ద్వారానే ఈయనకు ఏడాదికి 30 మిలియన్ యెన్లకు పైగా (సుమారు రూ.1.83 కోట్లు) సంపాదిస్తున్నారు. మరి ఇంత ఎక్కువగా డబ్బులు సంపాదిస్తున్నా.. ఆయన స్వీపర్‌గా పని చేయడానికి ఓ కారణం ఉంది. మత్సుబారాకు విలాసవంతమైన జీవితం కంటే నిరాడంబరమైన జీవనం అంటేనే ఇష్టం. శారీరక శ్రమతో కూడిన ఈ పని చేయడం వల్ల మనుషులు చురుకుగా, ఆరోగ్యంగా ఉంటారని గట్టిగా నమ్ముతాడు. అందుకే తనకు వీలు దొరికినంత సేపు స్వీపర్‌గా పని చేస్తూ.. తన ఆరోగ్యాన్ని కాపాడుకుంటున్నారు.

ఇదే విషయం గురించి మత్సుబారా మాట్లాడుతూ.. "నేను ఎప్పుడూ నా సొంత ఆస్తులపై ఆధారపడి జీవించాలని ఆశించేవాడిని" అని తెలిపారు. సెకండరీ స్కూల్ విద్య పూర్తయిన తర్వాత.. ఆయన నెలకు 180,000 యెన్ల జీతంతో ఒక కర్మాగారంలో పని చేయడం మొదలు పెట్టారు. అప్పుడే ఆయన తన ఖర్చులను కఠినంగా నియంత్రించుకుని, కొన్ని సంవత్సరాలలో దాదాపు మూడు మిలియన్ యెన్లు (సుమారు 20,000 అమెరికన్ డాలర్లు) ఆదా చేశారు. ఆ డబ్బుతోనే తన మొదటి స్టూడియో ఫ్లాట్‌ను కొనుగోలు చేశారు. ఆ తర్వాత కూడా ఇలాగే కష్టపడి పని చేస్తూ.. ఇళ్లు కొనుక్కుంటూ ఆస్తులను పెంచుకంటూ పోయారు.

ఇప్పటి వరకు మత్సుబారా మొత్తంగా టోక్యో నగరం, శివారు ప్రాంతాల్లో ఏడు అద్దె ఫ్లాట్‌లకు యజమానిగా ఉన్నారు. వీటితోపాటు స్టాక్స్, ఫండ్స్‌లలో కూడా ఆయన పెద్ద ఎత్తున పెట్టుబడులు పెట్టారు. ఇంతటి సంపద ఉన్నప్పటికీ.. కోయిచి మత్సుబారా నేటికీ పొదుపుగా, నిరాడంబరంగా, సాధారణ జీవితాన్ని గడుపుతూ అనేక మందికి ఆదర్శంగా నిలుస్తున్నారు.