సుప్రీంకోర్టులో అనూహ్య సంఘటన.. సీజేఐ పైకి షూ విసిరిన లాయర్

భారతదేశ అత్యున్నత న్యాయస్థానం సుప్రీంకోర్టులో శుక్రవారం ఉదయం తీవ్ర కలకలం రేగింది. కోర్టులో విచారణ ప్రారంభమైన కొద్దిసేపటికే ఒక లాయర్.. భారత ప్రధాన న్యాయమూర్తి జస్టిస్ బీఆర్ గవాయి బెంచ్‌పైకి షూ విసిరాడు. దీంతో కోర్టు హాలులో ఉన్న వారంతా ఒక్కసారిగా ఆశ్చర్యంలో మునిగిపోయారు. అయితే ఆ షూ.. సీజేఐ బెంచ్‌కు తాకకుండానే కిందపడిపోయింది. అయినప్పటికీ.. ఎలాంటి చలనం లేకుండా.. జస్టిస్ బీఆర్ గవాయి విచారణ కొనసాగించాలని ఇతర లాయర్లకు సూచించడం గమనార్హం.

ప్రత్యక్ష సాక్షులు వెల్లడించిన వివరాల ప్రకారం.. శుక్రవారం రోజున మొదటి కేసు విచారణను జస్టిస్ బీఆర్ గవాయి ప్రారంభించిన వెంటనే.. నిందితుడు సనాతనాన్ని అవమానించడాన్ని భారత్ సహించదు అంటూ నినాదాలు చేస్తూ సీజేఐ కూర్చున్న బెంచ్‌ పైకి షూ విసిరాడు. సుప్రీంకోర్టు హాల్‌లోని సెక్యూరిటీ సిబ్బంది వెంటనే స్పందించి.. షూ విసిరిన వ్యక్తిని అదుపులోకి తీసుకుని విచారణ ప్రారంభించారు. ఇక ఈ షూ విసిరిన వ్యక్తి వద్ద సుప్రీంకోర్టు లాయర్లు, క్లర్కులకు ఇచ్చే ప్రాక్సిమిటీ కార్డ్ లభించింది. దానిపై కిశోర్ రాకేష్ అనే పేరు ఉన్నట్లు సంబంధిత వర్గాలు వెల్లడించాయి.

అయితే ఆ వ్యక్తి సీజేఐని లక్ష్యంగా చేసుకుని షూ విసరడం వెనుక అతని ఉద్దేశం ఏంటి అనేది ఇంకా తెలియరాలేదు. ప్రస్తుతం సెక్యూరిటీ ఏజెన్సీలు అతడిని ప్రశ్నిస్తున్నాయి. ఈ అనూహ్య ఘటనతో సుప్రీంకోర్టులో ఉన్న మిగితా జడ్జిలు, లాయర్లు, కోర్టు సిబ్బంది, సెక్యూరిటీ సిబ్బంది షాక్‌లో ఉండిపోయారు. అయితే ఈ ఘటన పట్ల ఏమాత్రం చలించని.. సీజేఐ జస్టిస్ బీఆర్ గవాయి.. ఇలాంటి విషయాలు, ఘటనలు తనను ఎలాంటి ప్రభావితం చేయవని తేల్చి చెప్పారు. దయచేసి విచారణను కొనసాగించండి అంటూ లాయర్లతో చెప్పారు.

అయితే ఈ ఘటన జరగడానికి కొన్ని రోజుల ముందు.. జస్టిస్ బీఆర్ గవాయి చేసిన ఒక వ్యాఖ్య పట్ల సోషల్ మీడియాలో తీవ్ర విమర్శలు వెల్లువెత్తాయి. మధ్యప్రదేశ్‌ ఖజురహోలోని 7 అడుగుల విష్ణుమూర్తి విగ్రహం తల విరిగిపోయి ఉండగా.. దాన్ని పునర్నిర్మించేందుకు న్యాయపరమైన జోక్యం కోరుతూ దాఖలైన ప్రజా ప్రయోజన వ్యాజ్యాన్ని విచారించడానికి సీజేఐ బీఆర్ గవాయ్ నిరాకరించారు. ఈ సందర్భంగా ఆయన.. దేవుడి వద్దకు వెళ్లి ఏదైనా చేయమని అడగండి అంటూ వ్యాఖ్యలు చేసినట్లు తెలుస్తోంది.

అయితే సీజేఐ చేసిన ఈ వ్యాఖ్య హిందువుల మనోభావాలను దెబ్బతీసేలా ఉందని నెట్టింట తీవ్ర దుమారం రేగింది. ఈ విమర్శలపై స్పందించిన సీజేఐ జస్టిస్ బీఆర్ గవాయ్ .. తన వ్యాఖ్యలను సోషల్ మీడియాలో ఎవరో వక్రీకరించారని నాకు తెలిసిందని.. అయితే తాను అన్ని మతాలను గౌరవిస్తానని స్పష్టం చేశారు.