తులం బంగారం ధర రూ. 76,790.. 14k, 18k క్యారెట్లకు ఫుల్ డిమాండ్

భారతీయులకు బంగారం అంటే కేవలం అలంకరణగానే కాదు.. పెట్టుబడికి కూడా మంచి సాధనంగా ఉంది. ఇంకా ఇది మన సంస్కృతిలో అంతర్భాగంగా ఉంది. ఇటీవల అంతర్జాతీయంగా అనిశ్చితి, అమెరికా అధ్యక్షుడు డొనాల్డ్ ట్రంప్ భారీగా దిగుమతి సుంకాల్ని పెంచుతుండటం సహా కేంద్ర బ్యాంకులు బంగారం నిల్వల్ని పెంచుకుంటుండటం.. యూఎస్ ఫెడ్ వడ్డీ రేట్లు తగ్గిస్తుండటం ఇలా చాలా కారణాలతో బంగారం ధరలు అలా పెరుగుతూ పోతూనే ఉన్నాయి. మొదట 24 క్యారెట్ల గోల్డ్ రేటు రూ. 1 లక్ష దాటితేనే షాకయ్యారు. తర్వాత అది రూ. 1.30 లక్షల దిశగా పరుగులు పెడుతుండగా.. 22 క్యారెట్ల గోల్డ్ జువెల్లరీ రేటు రూ. 1.10 లక్షలు దాటేసింది. దీంతో సామాన్యులు అసలు కొనలేకపోతున్నారు.

ఈ క్రమంలోనే వారికి ప్రత్యామ్నాయంగా 14 క్యారెట్లు, 18 క్యారెట్ల బంగారం ఉంది. వీటి ధరలు కాస్త తక్కువగా ఉండటంతో ఇటువైపు మొగ్గుచూపుతున్నారు. ఇక్కడ స్వచ్ఛతలో కొంచెం బంగారం తక్కువగా ఉన్నప్పటికీ.. ధర చాలా తక్కువ. మన్నిక ఎక్కువ కారణంగా కొనుగోళ్లు జరుపుతున్నారు.

ఇండియన్ బులియన్ జువెల్లర్స్ అసోసియేషన్ (IBJA) ప్రకారం.. వీటి రేట్లు అక్టోబర్ 6న ఎలా ఉన్నాయో తెలుసుకుందాం. 24 క్యారెట్స్ గోల్డ్ రేటు గ్రాముకు రూ. 1,19,06 గా ఉంది. అంటే తులం రూ. 1.19 లక్షలకుపైనే ఉంది. 22 క్యారెట్ల ధర గ్రాము రూ. 11,620 గా ఉంది. 18 క్యారెట్ల గోల్డ్ జువెల్లరీ రేటు చూస్తే గ్రాముకు రూ. 9644 గానే ఉంది. 10 గ్రాములకు రూ. 96,440 పడుతుంది. ఇంకా 14 క్యారెట్ల బంగారు ఆభరణాల ధర ఇంకా తక్కువగా రూ. 7679 గా ఉంది. తులం రూ. 76,790 పడుతుంది.

స్వచ్ఛత విషయానికి వస్తే.. 24 క్యారెట్ అంటే ప్యూర్ గోల్డ్. ఇందులో 99.9 శాతం బంగారం ఉంటుంది. 22K అంటే ఇక్కడ 91.7 శాతం బంగారం ఉంటుంది. మిగతాది లోహాల్ని కలుపుతారు. 18K అంటే 75 శాతం బంగారం ఉంటుంది. 14 K విషయానికి వస్తే ఇక్కడ 58.33 శాతం బంగారం ఉంటుంది. ఈ తక్కువ క్యారెట్ల బంగారు ఆభరణాల్లో ఇతర మిశ్రమాలు ఎక్కువగా ఉండటం వల్ల ఇది.. 22K క్యారెట్ గోల్డ్ కంటే గట్టిగా, మన్నికగా ఉంటుంది. రోజూ ధరించేటువంటి గొలుసులు, ఉంగరాలు వంటి జువెల్లరీకి ఇది బెస్ట్ అని చెబుతుంటారు. ధర కాస్త తక్కువగా ఉండటంతో.. పెద్ద మొత్తంలో బంగారు ఆభరణాలు కొనుగోలు చేయాలనుకునే వారికి ఇది మంచి ఎంపిక.

అయితే ఈ తక్కువ క్యారెట్ల బంగారు ఆభరణాలు కొనుగోలు చేసేటప్పుడు కూడా తప్పనిసరిగా బీఐఎస్ హాల్‌మార్కింగ్ చెక్ చేసుకోవాలి. ఇక్కడ ఆభరణంపై బీఐఎస్ లోగో, క్యారెట్స్, ప్యూరిటీ ముద్రించి ఉంటుంది. ఆరంకెల హెచ్‌యూఐడీ నంబర్ ఉంటుంది. ఇంకా బీఐఎస్ కేర్ యాప్‌లో దీనిని ఈజీగా చెక్ చేసుకోవచ్చు. అక్కడ పూర్తి వివరాలు తెలుసుకోవచ్చు.