కొన్ని సమస్యలున్న వారు వాకింగ్ చేయకూడదు

ఈ మధ్య కాలంలో వాకింగ్ పై అవగాహన పెరిగింది. చాలా మంది కచ్చితంగా ఇన్ని వేల అడుగులు నడవాలని టార్గెట్ గా పెట్టుకుంటున్నారు. ఎక్కువ మంది ఫాలో అవుతున్న లెక్క మాత్రం..పది వేల అడుగులు. ఇందుకోసం ప్రత్యేకంగా ఫిట్ బిట్ వాచ్ లు కొనుక్కుని ఎప్పటికప్పుడు లెక్కలు చెక్ చేసుకుంటూ నడుస్తున్న వారున్నారు. అయితే..ఇలా పదివేల అడుగులు వేయడం మంచిదే కావచ్చు. కానీ కొన్ని రకాల సమస్యలున్న వారు మాత్రం పొరపాటున కూడా ఇలా వాకింగ్ చేయకూడదని నిపుణులు చెబుతున్నారు.

వీళ్లు దూరంగా ఉండాలి

నిజానికి గుండె పని తీరు ఒక్కొక్కరిలో ఒక్కో విధంగా ఉంటుంది. ఇక జాయింట్స్ పని తీరు కూడా విభిన్నంగానే ఉంటుంది. కొంత మందిలో ఎంత వయసు వచ్చినా చాలా స్ట్రాంగ్ గా కనిపిస్తారు. మరి కొందరు తక్కువ వయసులోనే గుండె జబ్బులు, కీళ్ల నొప్పులతో ఇబ్బంది పడుతుంటారు. ఇలాంటి సమస్యలున్న వారు వాకింగ్ విషయంలో జాగ్రత్తలు పాటించాల్సి ఉంటుంది. మిగతా వారిలాగే తప్పకుండా పదివేల అడుగులు నడవాల్సిందే అనే టార్గెట్ పెట్టుకోవాల్సి పని లేదు. ఎవరైనా సరే. వాళ్ల ఆరోగ్య పరిస్థితులను బట్టి ఎంత మేర నడవాలి అనేది నిర్ణయించుకోవాలి.

​ఎక్కువ అడుగులు నడవడానికి శరీరం సహకరిస్తుందా లేదా అన్నదే ముఖ్యమైన విషయం. ఇలాంటివేమీ పట్టించుకోకుండా పది వేల అడుగులు టార్గెట్ గా పెట్టుకుని నడుస్తూ పోతే ఏదో ఓ రోజు సైడ్ ఎఫెక్ట్స్ తప్పవు. నిజానికి 7 వేల అడుగులు నడిచినా ఎన్నో ప్రయోజనాలుంటాయని పలు పరిశోధనలు చెబుతున్నాయి. అంత కన్నా ఎక్కువగా నడవడం వల్ల జాయింట్స్ లో నొప్పి రావడం సహా రకరకాల అనారోగ్యాలు వెంటాడే ముప్పు ఉంటుంది.

గుండె జబ్బులుంటే

కొంత మందికి గుండె జబ్బులుంటాయి. అలాంటి వాళ్లు గుండెపై ఎక్కువగా స్ట్రెస్ పడకుండా చూసుకోవాలి. ముఖ్యంగా అంతకు ముందు హార్ట్ స్ట్రోక్, అటాక్ లాంటివి వచ్చిన వారు మరింత జాగ్రత్తగా ఉండాలి. మరీ ఎక్కువగా వాకింగ్ చేయడం వల్ల ఛాతిలో విపరీతంగా నొప్పి వచ్చే ప్రమాదం ఉంటుంది. కొన్ని సార్లు ఇది హార్ట్ ఫెయిల్యూర్ కి దారి తీసే ముప్పు కూడా ఉంటుంది. పదివేల అడుగులు నడవడం మంచిదే అని చెప్పి ఎలా పడితే అలా వాకింగ్ చేయడం వల్ల లాభాల కన్నా నష్టాలే ఎక్కువగా ఉంటాయి.

అందుకే పది వేల అడుగులు నడవాలి అనే టార్గెట్ పెట్టుకుని ఉంటే..అంతకు ముందే కార్డియాలజిస్ట్ ని సంప్రదించాలి. ఈ మేర నడక మంచిదేనా కనుక్కోవాలి. డాక్టర్ సలహా మేరకు నిర్ణయం తీసుకోవాలి. ఒకవేళ ఇలాంటి వారికి వాకింగ్ అనేది ప్రమాదం అని అనుకుంటే డాక్టర్లు ప్రత్యామ్నాయం చెబుతారు. వాటిని అనుసరించడం మంచిది. అంతే కానీ గుండె గురించి పట్టించుకోకుండా భారీగా వాకింగ్ చేస్తే మాత్రం సమస్యలు తప్పవు.

కీళ్ల నొప్పులున్న వారు

​విపరీతమైన జాయింట్ పెయిన్స్ ఉన్న వారు వీలైనంత వరకూ కీళ్లపై ఎక్కువగా ఒత్తిడి పడకుండా చూసుకోవడమే మంచిది. ఈ సమస్య ఉన్న వారు ఎక్కువ దూరం నడవడం వల్ల జాయింట్స్ పై ప్రెజర్ పడుతుంది. కొన్ని సార్లు ఈ సమస్యలున్న వారు ఎక్కువ దూరం వాకింగ్ చేయడం వల్ల తీవ్ర గాయాలు అయ్యే ప్రమాదముంటుంది. అందుకే పది వేల అడుగులు ఎట్టి పరిస్థితుల్లోనూ నడవాల్సిందే అనే టార్గెట్ పెట్టుకోవడం మంచిది కాదు. కండరాల నొప్పులు ఉన్న వారు కూడా వాకింగ్ కి దూరంగా ఉండడమే మంచిది. ఒకవేళ చేసినా చాలా తక్కువ అడుగుల వరకు నడిచి రెస్ట్ తీసుకోవాలి. ఇలా అయితేనే గాయాలు కాకుండా ఉంటాయి. కీళ్ల నొప్పులున్న వారికి వాకింగ్ కన్నా కూడా ఏరోబిక్ వ్యాయామాలు చేయడం వల్ల నొప్పులు తగ్గే అవకాశముంటుంది. అప్పుడప్పుడూ కొంత వరకూ వాకింగ్ చేస్తూ ఎక్కువగా ఏరోబిక్ పై ఫోకస్ పెట్టడం మంచిదని నిపుణులు సూచిస్తున్నారు. ఇలా చేయడం వల్ల క్రమక్రమంగా జాయింట్ పెయిన్స్ తగ్గుతాయి.

అందరికీ కాదు

పది వేల అడుగులు నడవడం అనేది ఆరోగ్యకరం అని అందరూ చెబుతున్న విషయమే. కానీ అందరికీ ఇదే ఆరోగ్య సూత్రం వర్తిస్తుందని చెప్పలేం. ఎవరి శరీర తీరు వారిది. అందుకు తగ్గట్టుగానే నడుచుకోవాలి. బాడీ టైప్ ని పట్టించుకోకుండా ఎక్కువ మొత్తంలో అడుగులు వేయడం వల్ల ఇబ్బందులు తప్పవు. అందుకే..వాకింగ్ కి బదులుగా కాస్త మోస్తరుగా ఉండే వ్యాయామాలు, తీవ్రత తక్కువగా ఉండే ఎక్సర్ సైజ్ లు చేయడం మంచిది. దీని వల్ల బాడీ బ్యాలెన్స్ పెరుగుతుంది. అదే సమయంలో స్ట్రెంత్ కూడా పెరుగుతుంది. కాకపోతే ఈ వ్యాయామాలు కూడా రెగ్యులర్ గా చేయడం అలవాటు చేసుకోవాలి. ఏదో విధంగా టార్గెట్ ని రీచ్ అయ్యేందుకు చూడాలి తప్ప.. కచ్చితంగా పదివేల అడుగులు వేయాల్సిందే అనే రూల్ పెట్టుకోకూడదు. యోగా, మెడిటేషన్, ప్రాణాయామ లాంటివి ట్రై చేయాలి. ఇవి చాలా వరకూ శరీరంపై ఒత్తిడిని తగ్గిస్తాయి.

ఈ సమస్యలున్న వారు

కాళ్లలోని రక్త నాళాలు కొంతమందిలో కుచించుకుపోతాయి. అందుకు ప్రధాన కారణం..కొవ్వు ఎక్కువ మొత్తంలో పేరుకుపోవడం. కొవ్వు అడ్డు పడడం వల్ల రక్త సరఫరా కండరాలకు సరైన విధంగా జరగదు. ఇక ధమనుల్లో సమస్యలున్న వారు కూడా ఎప్పటికప్పుడు చెకప్స్ చేయించుకోవాలి. ఇలాంటి వారి పది వేల అడుగుల టార్గెట్ గురించి అసలు ఆలోచించకూడదు. ఈ సమస్య ఉన్న వారు ఎక్కువ దూరం నడవడం వల్ల విపరీతమైన నొప్పి వస్తుంది. ముఖ్యంగా కాలి కండరాలు పట్టేస్తాయి. ఇక ఈ మధ్య కాలంలో సర్జరీలు చేయించుకున్న వారు కూడా పది వేల అడుగులు నడవకపోవడమే మంచిది. సర్జరీ నుంచి కోలుకుంటున్న సమయంలో ఇలా చేయడం వల్ల హీలింగ్ ఆలస్యం కావచ్చు. కొన్ని సార్లు ఇది ఇన్ఫెక్షన్లకూ దారి తీస్తుంది.