'స్నేహితుడిని ఎలా చంపాలి?': ,,,, చాట్ జీపీటీని అడిగి అరెస్టైన టీనేజర్!

మనకు తెలియని ఎన్నో విషయాలను ఏఐని అడిగి తెలుసుకుంటూ పనులను సులువు చేసుకుంటున్నాం. చాలా సమస్యలకు పరిష్కారాలను కనుక్కోవడానికి కూడా అనేక మంది ఏఐని వాడుకుంటున్నారు. ఇదంతా అందరికీ తెలిసిందే కాగా.. తాజాగా ఓ 13 ఏళ్ల బాలుడు చాట్‌జీటీపీటీని ఎవరూ అడగని ప్రశ్న అడిగి చిక్కుల్లో పడ్డాడు. ముఖ్యంగా తన స్నేహితుడిని ఎలా చంపాలో చెప్పమంటూ చాట్‌జీపీటీని ప్రశ్నించి.. ప్రస్తుతం పోలీసుల అదుపులో ఉండి ఊచలు లెక్కబెడుతున్నాడు. అసలీ కథ ఏంటంటే?

అమెరికాలోని ఫ్లోరిడాకు చెందిన ఓ 13 ఏళ్ల విద్యార్థి ఈ పని చేశాడు. ముఖ్యంగా రోజూలాగే స్కూల్‌కు వెళ్లిన అతడు.. కంప్యూటర్ ల్యాబ్‌లో ఉండగా.. చాట్‌జీపీటీని వాడాడు. ఈ సందర్భంగానే "నా స్నేహితుడిని ఎలా చంపాలి?" అని ప్రశ్నించాడు. అయితే విద్యార్థులు పాఠశాల కంప్యూటర్లలో చేసే కార్యకలాపాలను పర్యవేక్షించే గ్యాగిల్ (Gaggle) అనే మానిటరింగ్ వ్యవస్థ ఈ సందేశాన్ని గుర్తించింది. వెంటనే ఈ మెసేజీని క్యాంపస్ పోలీసు అధికారికి పంపింది. అప్రమత్తమైన అధికారి వెంటనే రంగంలోకి దిగి.. సౌత్‌వెస్ట్రన్ మిడిల్ స్కూల్‌కు చెందిన ఆ విద్యార్థిని గుర్తించారు. క్షణం ఆలస్యం చేయకుండా దుపులోకి తీసుకున్నారు.

ఆపై విచారణ జరపగా.. బాలుడు తానేదో జోక్‌గా అలాంటి ప్రశ్న అడిగానని పోలీసులకు చెప్పాడు. కానీ అతడు చదివే పాఠశాలలో హింసకు సంబంధించిన కేసులు ఎక్కువగా నమోదు అవుతుండడంతో.. అతడి మాటలను కొట్టి పారేసి అదుపులోకి తీసుకున్నారు. ఆపై అతడిని కౌంటీ జువెనైల్ ఫెసిలిటీకి పంపినట్లు వెల్లడించారు. ఈ విషయాన్ని నేరుగా వొలూసియా కౌంటీ షెరీఫ్ కార్యాలయమే స్పష్టం చేసింది.

అలాగే చిన్న పిల్లలు ఉన్న తల్లిదండ్రులు అంతా జాగ్రత్తగా ఉండాలని సూచించింది. వారిపై ఎప్పుడూ ఓ కన్నేసి ఉంచాలని.. వారు కంప్యూటర్, ఫోన్లలో ఏం చేస్తున్నారో కనిపట్టుకుని ఉండాలని చెప్పింది. లేదంటే పిల్లలు హత్యలు కూడా చేసే అవకాశం ఉదని స్పష్టం చేసింది.