అతడే భారత టీ20 జట్టు ఫ్యూచర్ కెప్టెన్‌: రాబిన్ ఉతప్ప

భారత క్రికెట్‌లో కెప్టెన్సీ విషయంలో పరిస్థితులు చాలా వేగంగా మారిపోయాయి. టీ20 ప్రపంచకప్ 2024కి ముందు వరకు.. టీమిండియా ఆల్ ఫార్మాట్‌ కెప్టెన్‌గా రోహిత్ శర్మ ఉన్నాడు. కానీ అతడు టీ20 ప్రపంచకప్ టైటిల్ గెలిచాక పొట్టి ఫార్మాట్‌కు గుడ్‌బై చెప్పడం, ఆ తర్వాత టెస్టుల నుంచి కూడా తప్పుకోవడంతో కొత్త కెప్టెన్ ఎంపిక అనివార్యమైంది. ఈ రెండు ఫార్మాట్‌ల నుంచి అతడు తప్పుకున్నాక కొత్త సారథిని ఎంపిక చేశారు. కానీ వన్డేల్లో మాత్రం అతడిని తప్పించి మరీ.. శుభ్‌మన్ గిల్‌ను కెప్టెన్ చేసింది బీసీసీఐ.

ఆసియాకప్ 2025 కోసం భారత టీ20 జట్టు వైస్ కెప్టెన్‌గాను గిల్‌ ఎంపికయ్యాడు. ఈ నేపథ్యంలో త్వరలోనే శుభ్‌మన్.. టీమిండియా ఆల్ ఫార్మాట్ కెప్టెన్ అవుతాడనే విశ్లేషణలు మొదలయ్యాయి. కానీ ఈ వాదనను టీమిండియా మాజీ ప్లేయర్ రాబిన్ ఉతప్ప విభేధించాడు. వన్డే, టెస్టులలో గిల్ కెప్టెన్‌ అయినప్పటికీ టీ20లలో మాత్రం అతడికి సారథ్య బాధ్యతలు ఇప్పట్లో అప్పగించే అవకాశం లేదని చెప్పుకొచ్చాడు. అందుకు గల కారణాన్ని సైతం వివరించాడు.

“టెస్ట్ క్రికెట్‌లో శుభ్‌మన్‌ గిల్ మంచి ఆటగాడని నేను అనుకుంటున్నా. వన్డేల్లోనూ అతడి గణాంకాలు బాగున్నాయి. కానీ కెప్టెన్ రేంజ్‌ ఆటగాడికి మరింత మెరుగైన గణాంకాలు ఉండాలి. భారత సెలక్టర్లు టీ20లకు కెప్టెన్‌గా మిడిల్ ఆర్డర్ బ్యాటర్‌ శ్రేయస్ అయ్యర్‌ను పరిశీలిస్తారని భావిస్తున్నా. ఎందుకంటే భారత టీ20 జట్టులో గిల్‌ ఇంకా తన స్థానాన్ని సుస్థిరం చేసుకోలేదు. ఆసియాకప్‌ 2025లోనూ గిల్ సరైన ప్రదర్శన చేయలేదు. దీంతో అభిషేక్ శర్మతో ఓపెనింగ్ చేసేందుకు సంజు శాంసన్, యశస్వి జైశ్వాల్ మధ్య పోటీ నెలకొంది” అని రాబిన్ ఉతప్ప అభిప్రాయపడ్డాడు.

“గిల్ టీ20 కెప్టెన్ కావాలంటే.. ముందుకు మెరుగైన ఆటతీరుతో జట్టులో సుస్థిర స్థానం సంపాదించుకోవాలి. అందుకే అతడు ఇప్పట్లో అన్ని ఫార్మాట్‌లలో కెప్టెన్‌ అవుతాడని అనుకోవట్లేదు. భారత క్రికెట్‌లో రాత్రికి రాత్రే పరిస్థితులు మారిపోతాయని మనకు తెలుసు. వాస్తవంగా మాట్లాడుకోవాలంటే టీమిండియాలో వైస్ కెప్టెన్సీకి ప్రాధాన్యత ఉండదు. ఎంతో మంది వైస్ కెప్టెన్‌లు కెప్టెన్‌లు కాకుండానే ఆటకు వీడ్కోలు పలికారు” అని రాబిన్ ఉతప్ప వ్యాఖ్యానించాడు.