మహిళల క్రికెట్‌లో చరిత్ర సృష్టించిన న్యూజిలాండ్ ఓపెనర్

మహిళల అంతర్జాతీయ క్రికెట్‌లో న్యూజిలాండ్‌కు చెందిన సుజీ బేట్స్ సంచలన రికార్డు నమోదు చేసింది. ఇన్నేళ్ల మహిళల అంతర్జాతీయ క్రికెట్‌లో ఎవ్వరికీ సాధ్యం కాని రికార్డును సొంతం చేసుకుంది. మహిళల వన్డే ప్రపంచకప్ 2025లో భాగంగా సోమవారం న్యూజిలాండ్ జట్టు.. దక్షిణాఫ్రికాతో తలపడింది. అయితే ఈ మ్యాచు తుది జట్టులో చోటు దక్కించుకున్న సుజీ బేట్స్.. తన కెరీర్‌లో 350వ అంతర్జాతీయ మ్యాచ్ ఆడింది. దీంతో ఈ ఫీట్ సాధించిన తొలి ప్లేయర్‌గా ఆమె నిలిచింది.

న్యూజిలాండ్‌ తరఫున 2006లో అరంగేట్రం చేసిన ఈ బ్యాటింగ్‌ ఆల్‌రౌండర్‌.. ఇప్పటికీ జట్టులో ‍ప్రధాన ప్లేయర్‌గా కొనసాగుతోంది. జట్టు విజయాల్లో కీలకపాత్ర పోషిస్తోంది. తన సుదీర్ఘ కెరీర్‌లో సుజీ బేట్స్.. ఇప్పటి వరకు 173 వన్డేలు.. 177 అంతర్జాతీయ టీ20 మ్యాచ్‌లు ఆడింది. వన్డేల్లో మొత్తంగా 5896, టీ20లలో 4716 పరుగులు సాధించింది. అయితే దక్షిణాఫ్రికాతో మ్యాచ్‌లో సుజీ బేట్స్‌ గోల్డెన్‌ డకౌట్‌గా వెనుదిరగడం గమనార్హం.

మహిళల క్రికెట్‌లో అత్యధిక అంతర్జాతీయ మ్యాచ్‌లు ఆడిన టాప్‌-5 ప్లేయర్లు

* సుజీ బేట్స్‌ (న్యూజిలాండ్‌) - 350 మ్యాచ్‌లు

* హర్మన్‌ప్రీత్‌ కౌర్‌ (భారత్‌) - 342 మ్యాచ్‌లు

* ఎలిస్‌ పెర్రీ (ఆస్ట్రేలియా) - 341 మ్యాచ్‌లు

* మిథాలీ రాజ్‌ (భారత్‌) - 333 మ్యాచ్‌లు

* చార్లెట్‌ ఎడ్‌వర్డ్స్‌ (ఇంగ్లండ్‌) - 309 మ్యాచ్‌లు

ఇక ఇదే మ్యాచ్‌లో న్యూజిలాండ్‌కు చెందిన మరో ప్లేయర్‌ సైతం రికార్డు క్రియేట్ చేసింది. న్యూజిలాండ్ కెప్టెన్ సోఫీ డివైన్ కూడా అంతర్జాతీయ క్రికెట్‌లో 300 మ్యాచ్ ఆడేసింది. వీరిద్దరూ ఒకే మ్యాచ్‌లో బెంచ్‌ మార్క్‌కు చేరుకున్నాడు. ఇక దక్షిణాఫ్రికాతో మ్యాచ్‌లో న్యూజిలాండ్ పరాజయం పాలైంది. తొలుత బ్యాటింగ్ చేసిన న్యూజిలాండ్.. 47.5 ఓవర్లలో 231 పరుగులకు ఆలౌట్ అయింది. అనంతరం ప్రొటీస్ జట్టు 40.5 ఓవర్లలో 4 వికెట్లు కోల్పోయి లక్ష్యాన్ని ఛేజ్ చేసింది. న్యూజిలాండ్ జట్టు మహిళల వన్డే ప్రపంచకప్‌ 2025లో ఇప్పటివరకు రెండు మ్యాచ్‌లు ఆడింది. రెండింట్లోనూ ఓడిపోయింది.