మహిళల్లో రెట్టింపు డిప్రెషన్‌కు జన్యుపరమైన కారకాలే కీలకం.. తాజా అధ్యయనం

మహిళల్లో డిప్రెషన్ (కుంగుబాటు) రేటు పురుషుల కంటే దాదాపు రెట్టింపు ఉంటుందనే విషయం చాలా కాలంగా ఉంది. అయితే, దీనికి కారణాలను తెలుసుకునేందుకు పరిశోధకులు నిరంతరం అధ్యయనాలు చేస్తున్నారు. తాజాగా, 'నేచర్ కమ్యూనికేషన్స్' జర్నల్‌లో ప్రచురించబడిన ఒక ముఖ్యమైన పరిశోధన ఈ వ్యత్యాసానికి వెనుక ఉన్న జన్యుపరమైన (Genetic) అంశాన్ని స్పష్టంగా రుజువు చేసింది. ఈ అధ్యయనం ప్రకారం, పురుషుల కంటే మహిళల్లో దాదాపు 6,000 అదనపు జన్యు వైవిధ్యాలు (Gene Variants) ఉండటం వల్లే వారిలో డిప్రెషన్ వచ్చే ప్రమాదం గణనీయంగా పెరుగుతోందని తేలింది.
ఈ పరిశోధన, లింగ-నిర్దిష్ట జన్యు కారకాలే (Sex-specific generic factors) మహిళల్లో డిప్రెషన్ ప్రమాదాన్ని పెంచడంలో ప్రధాన పాత్ర పోషిస్తున్నాయని నొక్కి చెప్పింది. అంటే, స్త్రీ, పురుషుల్లో మానసిక ఆరోగ్యంపై ప్రభావం చూపే జన్యువులు (Genes) వేర్వేరుగా పనిచేస్తున్నాయని అర్థం. ఈ ప్రత్యేక జన్యు వైవిధ్యాలు డిప్రెషన్ రిస్క్‌ను మరింత పెంచుతున్నాయని, వీటి కారణంగానే మహిళలు తరచుగా మానసిక కుంగుబాటుకు లోనయ్యే అవకాశం ఎక్కువ ఉందని అధ్యయనం వెల్లడించింది.
అధ్యయనంలో గుర్తించిన ఈ అదనపు జన్యు వైవిధ్యాలు మహిళల్లో వారసత్వంగా (Inherited) రావడానికి లేదా సహజంగా వారి శరీరంలో ఉద్భవించడానికి (Naturally formed) అవకాశం ఉందని పరిశోధకులు పేర్కొన్నారు. ఈ జన్యుపరమైన అంశం, డిప్రెషన్‌కు సంబంధించిన హార్మోన్ల మార్పులు, సామాజిక-పర్యావరణ ఒత్తిళ్లతో పాటు, మహిళల మానసిక ఆరోగ్యాన్ని ప్రభావితం చేసే మూడో ముఖ్యమైన కారకంగా నిలుస్తోంది. భవిష్యత్తులో డిప్రెషన్‌ చికిత్సలు, నివారణ పద్ధతులను అభివృద్ధి చేయడంలో ఈ జన్యుపరమైన సమాచారం ఎంతగానో ఉపయోగపడుతుందని నిపుణులు ఆశాభావం వ్యక్తం చేశారు.
ఈ ఫలితాలు వ్యక్తిగతీకరించిన వైద్యం (Personalized Medicine) దిశగా అడుగులు వేయడానికి దోహదపడతాయి. కేవలం సాధారణ వైద్యం కాకుండా, మహిళల జన్యు నిర్మాణాన్ని అర్థం చేసుకుని, దానికి అనుగుణంగా డిప్రెషన్‌ను ఎదుర్కొనే పద్ధతులను, చికిత్సలను రూపొందించేందుకు ఈ అధ్యయనం ఒక బలమైన పునాది వేసింది. ముఖ్యంగా, డిప్రెషన్‌కు సంబంధించిన రిస్క్ అంచనా (Risk Assessment) మరియు ముందస్తు జోక్యం (Early Intervention) విషయంలో ఈ కొత్త జన్యుపరమైన జ్ఞానం ఒక విప్లవాత్మక మార్పును తీసుకురానుంది.