లాలూ ధృతరాష్ట్రుడిలా గుడ్డివాడయ్యాడు': బీహార్ డిప్యూటీ సీఎం

బీహార్ రాజకీయం మహాభారతంలోని పాత్రల ప్రస్తావనతో మరోసారి హీటెక్కింది. రాబోయే అసెంబ్లీ ఎన్నికల నేపథ్యంలో రాష్ట్రీయ జనతాదళ్ అధినేత లాలూ ప్రసాద్ యాదవ్ చేసిన వ్యాఖ్యలపై బీహార్ ఉపముఖ్యమంత్రి విజయ్ సిన్హా తీవ్రంగా స్పందించారు. మహాభారత ఇతిహాసంలోని ధృతరాష్ట్రుడిని ప్రస్తావిస్తూ ఆయన లాలూపై విమర్శనాస్త్రాలు సంధించారు. లాలూ కుమారుడి ప్రేమలో పడిపోయి.. ధృతరాష్ట్రుడిలా గుడ్డి వాడయ్యాడని వ్యాఖ్యానించారు.

అసలేం జరిగిందంటే?

లాలూ ప్రసాద్ యాదవ్ ఎక్స్ వేదికగా.. ఎన్డీఏపై తీవ్ర విమర్శలు గుప్పించారు. "ఛే ఔర్ గ్యారా.. ఎన్డీఏ నౌ దో గ్యారా" అంటూ నవంబర్ 6, 11 తేదీల్లో జరగనున్న రెండు దశల ఎన్నికలను ప్రస్తావిస్తూ ఆయన ఈ వ్యాఖ్య చేశారు. ముఖ్యంగా తన 9 మంది సంతానం, తన భార్య, తనతో కలిసి ఇద్దరు కాగా.. 11వ తేదీన జరగబోతున్న ఎన్నికలు ఇలా వీరి కుటుంబం మొత్తం కలిసి 11 సంఖ్య రాగా.. ఈ నెంబర్లకే అంటే తమ కుటుంబం పేరు వింటేనే ఎన్డీఏ పారిపోతుందని ఉద్దేశిస్తూ ఇలా మాట్లాడారు. ఈ పోస్టుపై బీహార్ డిప్యూటీ సీఎం విజయ్ సిన్హా స్పందించారు.

లాలూ ప్రసాద్ యాదవ్.. కుమారుడి ప్రేమతో గుడ్డివాడైన ధృతరాష్ట్రుడిలా మారిపోయారని అన్నారు. రాజకీయాల్లో ప్రాధాన్యత కోసం మాత్రమే ఇలాంటి ప్రకటనలు చేస్తున్నారని విమర్శించారు. మహాభారతంలో ధృతరాష్ట్రుడు హస్తినాపురానికి చెందిన అంధ రాజు అని.. అతను దుర్యోధనుడితో సహా వంద మంది కౌరవులకు తండ్రని గుర్తు చేశారు. ఆయన కూడా పిల్లల్ని చూసుకునే మురిసిపోయేవారని.. ఇప్పుడు అచ్చంగా లాలూ ప్రసాద్ యాదవ్ కూడా అలాగే మురిసిపోతున్నారని కామెంట్లు చేశారు.

విజయ్ సిన్హా మాత్రమే కాకుండా మరొక ఉపముఖ్యమంత్రి సామ్రాట్ చౌదరి కూడా లాలూ యాదవ్ వ్యాఖ్యలకు గట్టి కౌంటర్ ఇచ్చారు. "లాలూజీ ఒక విషయం గుర్తుంచుకోవాలి. నవంబర్ 14న బాలల దినోత్సవం జరుపుకుంటారు. సరిగ్గా అదే రోజు ఓట్ల లెక్కింపు కూడా జరుగుతుంది. కాబట్టి బీహార్ రాజకీయాల్లో 'పిల్ల (బచ్చా)' ఎవరో ఆ రోజున లాలూజీకి తెలుస్తుంది" అని చౌదరి వ్యంగ్యంగా బదులిచ్చారు.

మరోవైపు రాష్ట్ర మంత్రి, జేడీయూ జాతీయ కార్యదర్శి అశోక్ చౌదరి మాట్లాడుతూ.. "లాలూజీకి వయస్సు బాగా పెరిగింది. ఆయన గురించి ఎంత కాలం మాట్లాడాలి? రాబోయే ఎన్నికల్లో ఆయనకు సెల్యూట్ చేయగలను తప్ప మరొకటి చెప్పలేను" అని పేర్కొన్నారు. అయితే బీహార్ మహారాష్ట్ర కంటే చిన్న రాష్ట్రం కాబట్టి.. గత ఏడాది మహారాష్ట్రలో మాదిరిగానే ఒకే దశలో ఎన్నికలు జరుగుతాయని తాము ఆశించామని అన్నారు. అయినప్పటికీ రెండు దశల పోలింగ్‌కు కూడా తాము సిద్ధంగానే ఉన్నామని స్పష్టం చేశారు.