ఈ చేపలు తినేటప్పుడు తప్పక పాటించాల్సిన జాగ్రత్తలు!

ఇటీవలి కాలంలో చేపలు ఆరోగ్యానికి మంచివని చాలామంది నమ్ముతున్నా, కొన్ని రకాల చేపల్లో అధిక పాదరసం (Mercury) ఉండటం వల్ల శరీరానికి తీవ్రమైన హానులు కలిగే అవకాశం ఉంది.నిపుణుల ప్రకారం ఈ విషయాన్ని తేలికగా తీసుకోవడం ప్రమాదకరం. ముఖ్యంగా గర్భిణీలు, చిన్నపిల్లలు ఈ విషయంలో ప్రత్యేక జాగ్రత్తలు తీసుకోవాలి.
*ట్యూనా చేపలు (Tuna):బ్లూఫిన్, బిగ్ ఐ ట్యూనా చేపల్లో పాదరసం స్థాయులు చాలా ఎక్కువగా ఉంటాయి. అల్బాకోర్ ట్యూనాలో ఒమేగా–3 ఫ్యాటీ యాసిడ్స్ ఎక్కువగా ఉన్నప్పటికీ, వారానికి ఒక్కసారి మాత్రమే తినాలని నిపుణులు సూచిస్తున్నారు. అధికంగా తీసుకుంటే మెదడు పనితీరు, నరాల వ్యవస్థపై ప్రతికూల ప్రభావం చూపవచ్చు.
*సార్డిన్ చేపలు (Sardines):సార్డిన్లు చిన్న సైజ్‌లో ఉండి సాధారణంగా ఆరోగ్యకరంగా భావిస్తారు. అయితే, కొన్ని ప్రాంతాల్లో ఇవి కూడా ఎక్కువ పాదరసం కలిగి ఉండే అవకాశం ఉంది. దీని వలన నరాల సంబంధ సమస్యలు, మెదడు పనితీరు తగ్గడం వంటి ఇబ్బందులు తలెత్తవచ్చు. గర్భిణీలు, పిల్లలు వీటిని వీలైనంత వరకు నివారించాలి.
*క్యాట్ ఫిష్ (Catfish):ప్రకృతిలో వీటిలో పాదరసం తక్కువగా ఉన్నా, మార్కెట్లో లభించే కొన్ని క్యాట్ ఫిష్‌లు హార్మోన్లు, కెమికల్స్‌తో పెంచే అవకాశం ఉంది. పెద్ద సైజులో ఉన్న చేపల కంటే చిన్న క్యాట్ ఫిష్‌ను మాత్రమే తీసుకోవడం ఆరోగ్యానికి మంచిదని నిపుణులు సూచిస్తున్నారు.
*మాకెరెల్ చేపలు (Mackerel) :మాకెరెల్ చేపల్లో ఒమేగా–3 ఫ్యాటీ యాసిడ్స్ అధికంగా ఉండడం వల్ల ఇవి ఆరోగ్యానికి మేలు చేస్తాయి. కానీ పసిఫిక్ కింగ్ మాకెరెల్ మాత్రం ఎక్కువ పాదరసం కలిగి ఉంటుంది. ఇది కిడ్నీలు మరియు నరాల వ్యవస్థపై దుష్ప్రభావం చూపవచ్చు. కాబట్టి గర్భిణీలు, చిన్నపిల్లలు ఈ చేపను తినకపోవడం మంచిది.
*బసా చేపలు (Basa) :క్యాట్ ఫిష్ జాతికి చెందిన బసా చేపలు తక్కువ ధర, మంచి రుచితో మార్కెట్లో అందుబాటులో ఉన్నప్పటికీ, ఆరోగ్యపరమైన సమస్యలకు దారితీసే అవకాశం ఉందని అధ్యయనాలు సూచిస్తున్నాయి. వీటిలో కొలెస్ట్రాల్ ఎక్కువగా ఉండటం వలన హృద్రోగ ప్రమాదం పెరుగుతుంది. అదనంగా, వీటి పెంపకంలో హార్మోన్లు, రసాయనాలు వాడుతున్నారని ఆరోపణలు ఉన్నాయి.