జియో స్కీమ్.. కనీసం రూ. 500 ఉంటే చాలు.. మొన్నే రూ. 1500 కోట్లొచ్చాయ్
business | Suryaa Desk | Published : Fri, Oct 17, 2025, 10:27 PM
మ్యూచువల్ ఫండ్లలో చాలా మంది ఇన్వెస్ట్ చేస్తుంటారు. ఇక్కడ స్టాక్ మార్కెట్లకు ప్రత్యామ్నాయంగా కాస్త తక్కువ రిస్క్తో దీర్ఘకాలంలో మెరుగైన రిటర్న్స్ అందించేందుకు ఇది తోడ్పడుతుందని నిపుణులు చెబుతుంటారు. ఇక్కడ మరీ ముఖ్యంగా కాంపౌండింగ్ ఇంట్రెస్ట్ బెనిఫిట్ కారణంగానే.. దీంట్లో పెట్టుబడులు పెడుతుంటారు. అంటే చక్రవడ్డీ ద్వారా కాలం గడుస్తున్న కొద్దీ ఏటా సంపద పెరుగుతూనే ఉంటుంది. ఇందులో కొత్త కొత్త మ్యూచువల్ ఫండ్ కంపెనీల నుంచి ఫండ్స్ వస్తూనే ఉన్నాయి. ఇటీవల రిలయన్స్ ఇండస్ట్రీస్కు చెందిన జియో ఫైనాన్షియల్ సర్వీసెస్.. బ్లాక్రాక్ అడ్వైజర్స్ సింగపూర్ లిమిటెడ్తో కలిసి జియోబ్లాక్రాక్ మ్యూచువల్ ఫండ్ను లాంఛ్ చేసింది.
దీని నుంచి ఇక వరుసగా మ్యూచువల్ ఫండ్స్ పథకాలు వస్తూనే ఉన్నాయి. ఇటీవల సెప్టెంబర్ 23న జియోబ్లాక్రాక్ ఫ్లెక్సీ క్యాప్ ఫండ్.. న్యూ ఫండ్ ఆఫర్ కోసం అందుబాటులోకి రాగా.. ఇది అక్టోబర్ 7 వరకు కొనసాగింది. అంటే.. స్టాక్ మార్కెట్లో ఐపీఓ మాదిరిగానే.. ఇక్కడ మ్యూచువల్ ఫండ్లలో NFO ఉంటుంది. ఐపీఓల్లో కంపెనీలు నిధులు సమీకరిస్తాయన్న సంగతి తెలిసిందే. ఇప్పుడు మ్యూచువల్ ఫండ్లలోనూ ఎన్ఎఫ్ఓ ద్వారా నిధులు సేకరిస్తాయి. ఈ ఎన్ఎఫ్ఓ ద్వారా జియోబ్లాక్రాక్ ఫ్లెక్సీ క్యాప్ ఫండ్.. ఏకంగా రూ. 1500 కోట్లు సమీకరించింది.
అక్టోబర్ 7తోనే ఎన్ఎఫ్ఓ ప్రాసెస్ పూర్తి కాగా.. మళ్లీ అక్టోబర్ 17 అంటే నేటి నుంచే తిరిగి అందుబాటులోకి వచ్చింది. ఎన్ఎఫ్ఓ అంటే నిర్దిష్ట తేదీ వరకే అందుబాటులో ఉంటుంది. ఇప్పుడు రెగ్యులర్గా ఎప్పుడైనా యూనిట్లు కొనుగోలు చేయొచ్చు. తిరిగి ఎప్పుడైనా వాటిని అమ్మేయొచ్చు. ఈ క్రమంలోనే.. తమపై నమ్మకం ఉంచినందుకు.. మద్దతు ఇస్తున్నందుకు ఫండ్ హౌస్ ఇన్వెస్టర్లకు కృతజ్ఞతలు తెలిపింది. ఈ మేరకు తన సోషల్ మీడియా ఖాతాల్లో పోస్ట్ చేసింది.
>> ఈ స్కీమ్ విషయానికి వస్తే ఇది ఓపెన్ ఎండెడ్ డైనమిక్ ఈక్విటీ స్కీమ్. ఇదే ఈ ఫండ్ నుంచి తొలి యాక్టివ్ ఈక్విటీ స్కీమ్ అని చెప్పొచ్చు. ఇది లార్జ్ క్యాప్, స్మాల్ క్యాప్, మిడ్ క్యాప్ స్టాక్స్ అన్నింట్లో పెట్టుబడులు పెడుతుంది. నిఫ్టీ 500 ఇండెక్స్ (TRI) ఈ పథకం పనితీరుకు కొలమానంగా ఉంటుంది. ఇక తన్వి కచేరియా, సాహిల్ చౌదరీ ఫండ్ మేనేజర్లుగా ఉన్నారు. ఈ ఫండ్ ప్రకారం.. ఇది 65-100 శాతం వరకు ఈక్విటీ, ఈక్విటీ రిలేటెడ్ ఇన్స్ట్రుమెంట్స్లో పెట్టుబడులు పెడుతుంది. 0-35 శాతం వరకు డెట్, మనీ మార్కెట్ ఇన్స్ట్రుమెంట్లలో ఇన్వెస్ట్ చేస్తుంది. 0-10 శాతం వరకు REITs, InvITs లో పెట్టుబడులు పెడుతుంది.
దీంట్లో పెట్టుబడి విషయానికి వస్తే.. లంప్ సమ్, స్విచ్ ఇన్ స్కీమ్లో కనీసం రూ. 500 నుంచి ఇన్వెస్ట్ చేయొచ్చు. ఆ తర్వాత ఎంతైనా పెట్టుబడి పెట్టొచ్చు. సిప్ విషయానికి వస్తే.. కూడా కనీసం రూ. 500 నుంచి ప్రారంభించి.. ఆపైన ఎంతైనా చేయొచ్చు. కానీ కనీసం 6 ఇన్స్టాల్మెంట్స్ అయినా చేయాల్సి ఉంటుంది.
|
|