ఆడిలైడ్‌లో భారత్ విజయ పరంపర కొనసాగుతుందా? సిరీస్‌పై ఆశలు నిలుపుకోవాలంటే రేపటి మ్యాచ్ కీలకం!

ఆస్ట్రేలియాతో జరుగుతున్న మూడు వన్డేల సిరీస్‌లో తొలి మ్యాచ్‌లో ఓటమి పాలైన టీమ్‌ఇండియాకు రేపటి రెండో వన్డే (ODI) 'డూ ఆర్‌ డై' (do or die) గా మారింది. అడిలైడ్ ఓవల్‌ (Adelaide Oval) వేదికగా జరగనున్న ఈ మ్యాచ్‌లో గెలిస్తేనే సిరీస్‌పై భారత్‌కు ఆశలు నిలిచే అవకాశం ఉంది. పటిష్టమైన ఆసీస్‌ను వారి సొంతగడ్డపై ఓడించడం అంత సులభం కాదు. అయితే, టీమ్‌ఇండియా అడిలైడ్‌లో ఉన్న అద్భుతమైన రికార్డు.. ఇక్కడ భారత్‌కు సానుకూల అంశం.
అడిలైడ్ ఓవల్ మైదానం టీమ్‌ఇండియాకు ఒక అభేద్యమైన కోటలాంటిది. ఇక్కడ భారత్ గత 17 ఏళ్లుగా ఒక్క వన్డే మ్యాచ్ కూడా ఓడిపోలేదు. ఇప్పటివరకు ఈ మైదానంలో ఆడిన 15 మ్యాచ్‌లలో 9 విజయాలను భారత్ నమోదు చేసింది. ఈ అద్భుతమైన రికార్డు భారత్ ఆత్మవిశ్వాసాన్ని పెంచే అవకాశం ఉంది. గత ఓటమిని మర్చి, కొత్త ఉత్సాహంతో బరిలోకి దిగనున్న రోహిత్ సేన, తమ విజయ పరంపరను కొనసాగించాలని పట్టుదలతో ఉంది. అయితే, తమ సొంత మైదానంలో టీమ్‌ఇండియా రికార్డును బ్రేక్ చేసి సిరీస్‌ను కైవసం చేసుకోవాలని ఆస్ట్రేలియా పక్కా ప్లాన్‌తో సిద్ధమైంది.
తొలి వన్డేలో రోహిత్ శర్మ (Rohit Sharma), విరాట్ కోహ్లీ (Virat Kohli) వంటి స్టార్ ఆటగాళ్లు పెద్దగా రాణించలేకపోయారు. అడిలైడ్‌లో భారత జట్టు రికార్డును మరింత పటిష్టం చేయాలంటే.. ముఖ్యంగా వీరే ముందంజలో ఉండాలి. పరుగుల యంత్రం విరాట్ కోహ్లీకి ఈ మైదానం బాగా అచ్చొచ్చిన గ్రౌండ్. ఇక్కడ గతంలో శతకాలు నమోదు చేసిన రికార్డు కోహ్లీకి ఉంది. వీరిద్దరూ రేపటి మ్యాచ్‌లో ఫామ్‌లోకి వస్తే, ఆస్ట్రేలియా బౌలర్లకు తిరుగుండదు. టాప్ ఆర్డర్ రాణిస్తేనే టీమ్‌ఇండియా విజయం సాధించే అవకాశాలు మెరుగవుతాయి.
సిరీస్‌ సమం చేయాలని టీమ్‌ఇండియా పట్టుదలతో ఉండగా, సొంతగడ్డపై సిరీస్‌ను గెలవాలని ఆస్ట్రేలియా తహతహలాడుతోంది. అడిలైడ్ మైదానంలో భారత్ గత 17 ఏళ్ల రికార్డును కాపాడుకుంటుందా? లేక ఆస్ట్రేలియా ఆ రికార్డుకు బ్రేక్ వేసి సిరీస్‌ను సొంతం చేసుకుంటుందా? అనేది రేపటి మ్యాచ్‌తో తేలిపోతుంది. రెండు జట్ల మధ్య జరిగే ఈ ఉత్కంఠభరిత పోరు క్రికెట్ అభిమానులకు మంచి వినోదాన్ని అందిస్తుందనడంలో సందేహం లేదు.