జీర్ణ శక్తిని పెంచే ఆయుర్వేద పదార్థాలు, ఏమేం తీసుకోవాలంటే

చాలా మంది జీర్ణ సమస్యలతో ఇబ్బందులు పడుతున్నారు. కాస్త తినగానే వెంటనే విపరీతంగా తేన్పులు, గ్యాస్ తో అవస్థలు పడుతున్నారు. గట్ హెల్త్ సరిగ్గా లేనప్పుడు ఈ సమస్యలు వస్తుంటాయి. అయితే ఈ ఇబ్బందులను తగ్గించుకునేందుకు రకరకాల ప్రయత్నాలు చేస్తారు. ముందుగా మెడిసిన్ పై ఆధార పడతారు. పొట్టలో కాస్త ఇబ్బంది అనిపించగానే మందులు వేసుకుంటారు. వీటి వల్ల సమస్య తగ్గుతుండొచ్చు. కానీ అది తాత్కాలికం మాత్రమే. గట్ హెల్త్ బాగుండాలంటే మాత్రం ఆహారపు అలవాట్లలో మార్పులు చేసుకోవాలి. పొట్టకు ఇబ్బంది కలిగించే ఫుడ్స్ పక్కన పెట్టి ఆరోగ్యకరమైన ఆహార పదార్థాలు తీసుకోవాలి. ఇప్పుడు అలాంటి ఆయుర్వేద పదార్థాల గురించే తెలుసుకోబోతున్నాం.

త్రిఫల చూర్ణం

ఆయుర్వేదంలో త్రిఫల చూర్ణానికి ఉన్న ప్రాధాన్యం అంతా ఇంతా కాదు. ఎన్నో విధాలుగా ఇది ఉపయోగపడుతుంది. ముఖ్యంగా జీర్ణ సమస్యలున్న వారు తప్పనిసరిగా ఈ చూర్ణం తీసుకోవాలని నిపుణులు సూచిస్తుంటారు. త్రిఫల అంటే మొత్తం మూడు పదార్థాలు ఇందులో ఉంటాయి. ఉసిరి, తానికాయ, కరక్కాయ కలిపి ఈ పొడిని తయారు చేస్తారు. ఈ పొడి నేచురల్ డిటాక్సిఫైయర్ లా పని చేస్తుంది.

ముఖ్యంగా జీర్ణ వ్యవస్థను పూర్తిగా క్లీన్ చేసేస్తుంది. అదే సమయంలో ఎలాంటి ఇబ్బందిని కలిగించదు. మలవిసర్జన సాఫీగా అయ్యేందుకు తోడ్పడుతుంది. ముఖ్యంగా పొట్ట ఉబ్బరం, అసిడిటీని తగ్గించడంలో కీలకంగా వ్యవహరిస్తుంది. పొట్టలో జఠరాగ్ని తగ్గిపోకుండా కాపాడుతుంది. ఉసిరికాయలోని విటమిన్ సి రోగనిరోధక శక్తిని పెంచుతుంది. ఇక కరక్కాయ శ్లేష్మాన్ని కరిగించడంలో ఉపయోగపడుతుంది. అదే సమయంలో లోపల ఉన్న టాక్సిన్స్ ని బయటకు పంపుతుంది. రెగ్యులర్ గా త్రిఫల చూర్ణం తీసుకుంటే ఆరోగ్యానికి చాలా మంచిది.

వాము

పొట్టలో కాస్త ఇబ్బందిగా అనిపించినప్పుడు ఇంట్లో పెద్ద వాళ్లు వెంటనే వాము తినాలని సలహా ఇస్తుంటారు. చాలా త్వరగా జీర్ణ సమస్యల నుంచి రిలీఫ్ ఇవ్వడంలో చాలా బాగా పని చేస్తుంది వాము. ఆయుర్వేదంలో దీనికి చాలా ప్రియార్టీ ఉంది. ముఖ్యంగా జీర్ణ సమస్యలకు సంబంధించిన మందులు తయారు చేసినప్పుడు తప్పనిసరిగా వాము వాడుతుంటారు. ఇందులో థైమాల్ అధికంగా ఉంటుంది. ఇది గ్యాస్ట్రిక్ జ్యూస్ ని విడుదల చేస్తుంది. ఇది ఎక్కువగా విడుదలైతేనే తిన్న ఆహారం సరైన విధంగా జీర్ణం అవుతుంది. అజీర్తి, పొట్టలో ఉబ్బరం, కడుపు నొప్పి లాంటి సమస్యలకు వాము పరిష్కారం చూపిస్తుంది. ముఖ్యంగా అసిడిటీని తగ్గించడంలో ఇది చాలా బాగా తోడ్పడుతుంది. మెటబాలిజం కూడా మెరుగవుతుంది. వాము వాటర్ తీసుకోవడం ద్వారా పొట్టలో అసౌకర్యం తగ్గుతుంది. వాముని కాస్తంత వేయించి అందులో నల్ల ఉప్పు కలిపి తీసుకుంటే చాలా మంచిది.

అల్లం

ఆయుర్వేదంలో అల్లానికి ఉన్న ప్రాధాన్యత మరింకే పదార్థానికీ ఉండదు. దీన్ని యూనివర్సల్ మెడిసిన్ అని పిలుస్తారు. ఇందులో ఉన్న పోషకాలు శరీరానికి ఎంతో మేలుచేస్తాయి. ముఖ్యంగా శరీరంలో అవసరమైన ఉష్ణాన్ని పెంచడంలో ఇది ఉపయోగపడుతుంది. జఠరాగ్నిని పెంచి ఆహారం సరైన విధంగా జీర్ణం అయ్యేందుకు తోడ్పడుతుంది. అంతే కాదు. పొట్టలో ఉబ్బరం, వాంతులు, వికారం లాంటి సమస్యలను తగ్గించడంలోనూ సహకరిస్తుంది. అజీర్తితో ఇబ్బంది పడే వారు అల్లం ముక్కను నేరుగా తింటే కాసేపట్లోనే సమస్య తగ్గిపోతుంది. రక్తసరఫరా మెరుగ్గా అయ్యేందుకు కూడా ఇది సహకరిస్తుంది. పేగుల కండరాలను రిలాక్స్ చేయడంలోనూ ఎంతో సాయపడుతుంది. మలవిసర్జన సరిగ్గా అవ్వక ఇబ్బంది పడే వారు అల్లం తీసుకుంటే మోషన్ ఫ్రీగా అయ్యే అవకాశాలుంటాయి. ఎలాంటి జీర్ణ సమస్యను అయినా తగ్గించడంలో అల్లం ఉపయోగపడుతుంది.

సోంపు గింజలు

చాలా మందికి అన్నం తినగానే సోంపు వేసుకునే అలవాటు ఉంటుంది. నిజానికి ఇది చాలా మంచి అలవాటు. ఇలా చేయడం వల్ల ఆహారం త్వరగా జీర్ణం అవుతుంది. ముఖ్యంగా కాస్తంత ఎక్కువగా తిన్నప్పుడు సోంపు తినడం ద్వారా కొంత రిలీఫ్ వస్తుంది. ఆయుర్వేద ప్రకారం సోంపు తిన్నప్పుడు శరీరంలో ఉష్ణోగ్రత కాస్త తగ్గుతుంది. ఎప్పుడైతే పొట్టలో యాసిడ్స్ మరీ ఎక్కువగా విడుదలవుతాయో అప్పుడు సోంపు తినడం ద్వారా యాసిడ్ తగ్గుతుంది. అంతే కాదు. కడుపు నొప్పి, ఛాతిలో మంట లాంటి ఇబ్బందులనూ తగ్గిస్తుంది. పొట్టలో ఉబ్బరం, గ్యాస్ సమస్యలను తగ్గించడంలోనూ ఉపయోగపడుతుంది. ముఖ్యంగా లివర్ పని తీరు మెరుగు పరచడంలోనూ సోంపు కీలకంగా ఉంటుంది. పొట్టను డిటాక్స్ చేయడంలోనూ సహకరిస్తుంది. సోంపులో ఉండే అనెథాల్ లాంటి నేచురల్ ఆయిల్స్ కడుపులోని కండరాలను రిలాక్స్ చేస్తాయి.

ములేతి

ఇప్పుడు చెప్పిన అన్ని పదార్థాలతో పాటు ఆయుర్వేదంలో జీర్ణ సమస్యలను పోగొట్టేందుకు విరివిగా వాడే మందు ములేతి. పేగులను శుభ్రం చేసి మలవిసర్జన సాఫీగా జరగడంలో ఇది ఎంతగానో తోడ్పడుతుంది. అసిడిటీ, అల్సర్ సహా గ్యాస్ట్రిస్ సమస్యలకు ఈ మందు పరిష్కారం చూపిస్తుంది. ముఖ్యంగా పొట్టలో ఇన్ ఫ్లమేషన్ ని తగ్గించడంలో తోడ్పడుతుంది. రుచికి తీపిగా ఉండే ములేతి జీర్ణాశయంలో ఉత్పత్తి అయ్యే యాసిడ్ మరీ ఎక్కువ కాకుండా చూసుకుంటుంది. మొత్తంగా జీర్ణ శక్తిని పెంచుతుంది.