దేశవ్యాప్తంగా ఎస్ఐఆర్‌కు రేపే ముహూర్తం ఫిక్స్

దేశవ్యాప్తంగా ఓటర్ల జాబితా ప్రత్యేక సవరణపై కేంద్ర ఎన్నికల కమిషన్ అక్టోబరు 27న సోమవారం కీలక ప్రకటన చేయనుంది. ఈ ప్రక్రియ చేపట్టే తేదీలను ఈసీ ప్రకటించనుంది. తొలి దశలో ఎన్నికలు జరగబోయే పశ్చిమ్ బెంగాల్, తమిళనాడు, కేరళ, అసోం, పుదుచ్చేరి సహా దాదాపు పది రాష్ట్రాల్లో ఓటర్ల జాబితా సవరణ చేపట్టనుందని విశ్వసనీయ వర్గాలు తెలిపాయి. మూడు రోజుల కిందట అన్ని రాష్ట్రాలు, కేంద్రపాలిత ప్రాంతాల ఎన్నికల ప్రధాన అధికారులతో ఎలక్షన్ కమిషన్ ఢిల్లీలో కీలక సమావేశం నిర్వహించింది. బిహార్‌ ప్రత్యేక సవరణ సందర్భంగా ఎదురైన అనుభవాలపై చర్చించి, దేశవ్యాప్తంగా ఈ ప్రక్రియను చేపట్టాలని నిర్ణయించింది.

‘బిహార్‌లో జూన్ 24న ప్రారంభించిన ఓటర్ల జాబితా ప్రత్యేక సవరణ సెప్టెంబరు 30 వరకు నాలుగు నెలల పాటు కొనసాగింది.. ఈ సమయం మరింత తగ్గేలా ఈసీ ప్రణాళిక రూపొందిస్తుంది’ అని పేరు చెప్పడానికి నిరాకరించిన ఓ అధికారి మీడియాతో అన్నారు. గత, ప్రస్తుత ఓటరు జాబితాలను ముందుగానే సరిపోల్చే ప్రక్రియను ప్రారంభించాలని. దీని ద్వారా ఓటరు ధ్రువీకరణ ప్రక్రియకు అదనపు సమయం కేటాయించాల్సిన అవసరం ఉందని కమిషన్‌ అన్ని రాష్ట్రాలు, కేంద్రపాలిత ప్రాంతాలకు సూచించింది.

బిహార్‌లో ఈ ప్రక్రియపై ప్రతిపక్ష పార్టీల నుంచి వచ్చిన తీవ్ర విమర్శల మధ్యే ఓటర్ల జాబితా ప్రత్యేక సవరణపై కేంద్ర ఎన్నికల సంఘం ఈ నిర్ణయం తీసుకుంది. ఈ అంశంపై సుప్రీంకోర్టులో పలు పిటిషన్ల దాఖలు కాగా.. గుర్తింపు కార్డుల్లో ఆధార్‌ను పరిగణించాలని సూచించింది. ఎన్నికల సంఘం వ్యక్తం చేసిన నకిలీ నమోదు అంశంపై ఉన్న ఆందోళనలను న్యాయమూర్తులు తిరస్కరించారు. ‘సామూహికంగా పేర్లు తొలగించడం’ బదులు ‘సామూహికంగా పేర్లను చేర్చడం’ వంటివి సూచించారు.

ప్రత్యేక సమగ్ర సవరణ పేరుతో బిహార్‌లో ఈ ప్రక్రియపై తీవ్ర వ్యతిరేకత వ్యక్తమైనా ఎన్నికల కమిషన్ వెనక్కి తగ్గలేదు. ఈ ప్రక్రియలో సుమారు 66,000 మంది పేర్లు ఓటరు జాబితా నుంచి తొలగించారు. కాగా, దేశవ్యాప్తంగా ఈసీ ఎస్ఆర్ఐ‌పై అప్పుడే ప్రతిపక్షాలు విమర్శలు గుప్పిస్తున్నాయి. బీజేపీని ఎన్నికల్లో గెలిపించేందుకు ఈసీ చేస్తోన్న ప్రయత్నమని ఆరోపిస్తున్నాయి.