ఆ ప్రాంతానికి అదనపు నిధులు....పవన్ కళ్యాణ్ కీలక నిర్ణయం

శ్రీసత్యసాయి జిల్లా పుట్టపర్తికి ఏపీ డిప్యూటీ సీఎం పవన్ కళ్యాణ్ శుభవార్త వినిపించారు. పుట్టపర్తిలో రహదారుల అభివృద్ధికి రూ.30 కోట్లు అదనంగా కేటాయించారు. భగవాన్ శ్రీ సత్యసాయి బాబా శత జయంతి ఉత్సవాలకు హాజరు కావాలని ట్రస్ట్ బోర్డు సభ్యులు.. ఏపీ డిప్యూటీ సీఎం పవన్ కళ్యాణ్‌ను మంగళవారం ఆహ్వానించారు. సత్యసాయి సెంట్రల్ ట్రస్ట్ మేనేజింగ్ ట్రస్టి రత్నాకర్, ఇతర సభ్యులు మంగళవారం క్యాంపు కార్యాలయంలో పవన్ కళ్యాణ్‌కు ఆహ్వాన పత్రికను అందజేశారు. ఈ సందర్భంగా శత జయంతి ఉత్సవాల వివరాలు తెలియజేశారు. నవంబర్ 19న ప్రధానమంత్రి నరేంద్ర మోదీ సత్యసాయి బాబా శత జయంతి ఉత్సవాలకు హాజరు కానున్నారు, ఈ నేపథ్యంలో ప్రధానమంత్రి మోదీతో కలసి వేడుకలకు హాజరవుతానని సత్యసాయి ట్రస్ట్ బోర్డు సభ్యులకు పవన్ కళ్యాణ్ తెలిపారు.

సత్యసాయి శత జయంతి ఉత్సవాల సందర్భంగా పుట్టపర్తి నియోజకవర్గ వ్యాప్తంగా మౌలిక వసతుల కల్పనపై దృష్టి సారించినట్టు పవన్ కళ్యాణ్ చెప్పారు. శ్రీ సత్యసాయి మందిరానికి వచ్చే భక్తుల సౌకర్యాన్ని దృష్టిలో పెట్టుకుని నియోజకవర్గ వ్యాప్తంగా రోడ్ల నిర్మాణానికి పంచాయతీరాజ్ శాఖ నుంచి రూ.30 కోట్లు అదనంగా కేటాయిస్తూ నిర్ణయం తీసుకున్నారు. శత జయంతి ఉత్సవాలలోపు మందిరానికి అనుసంధాన రహదారులను అభివృద్ధి చేయాలని అధికారులను ఆదేశించారు. రోడ్ల నిర్మాణానికి రూ. 30 కోట్ల ప్రత్యేక నిధిని కేటాయించినందుకు డిప్యూటీ సీఎం పవన్ కళ్యాణ్‌కు.. సత్యసాయి ట్రస్ట్ బోర్డు ఛైర్మన్ రత్నాకర్ ధన్యవాదాలు తెలిపారు.

మరోవైపు సత్యసాయి బాబా శతజయంతి వేడుకలకు ఇప్పటికే తెలంగాణ ముఖ్యమంత్రి రేవంత్ రెడ్డిని కూడా ఆహ్వానించారు. సత్యసాయి ట్రస్టు మేనేజింగ్ ట్రస్టీ రత్నాకర్.. తెలంగాణ ముఖ్యమంత్రి రేవంత్‌రెడ్డిని ఇటీవల కలిసి వేడుకలకు రావాలని ఆహ్వానించారు. హైదరాబాద్‌లో రేవంత్ రెడ్డిని కలిసిన ఆయన.. నవంబరులో జరిగే శత జయంతి ఉత్సవాలకు రావాలని ఆహ్వానించారు.

ఈ క్రమంలోనే సత్యసాయి సేవా ట్రస్టు అందిస్తున్న సేవలను రేవంత్ రెడ్డి కొనియాడారు. తాగునీరు, విద్య, వైద్య రంగాలకు సంబంధించి సత్యసాయి ట్రస్టు అందిస్తున్న సేవలను రేవంత్ రెడ్డి కొనియాడారు. మెదక్, మహబూబ్‌నగర్‌ జిల్లాల్లో ట్రస్టు ద్వారా సురక్షిత తాగునీటిని అందిస్తున్న సంగతి గుర్తు చేశారు. అలాగే సత్యసాయి ఆశయాలను అంకితభావంతో కొనసాగిస్తున్నారని ప్రశంసించారు.