దాదాపు రూ.11 వేలు రెస్టారెంట్ బిల్లు ఎగ్గొట్టేందుకు కన్నింగ్ ప్లాన్.. చివరకు ఇలా

రెస్టారెంట్‌కు వెళ్లిన కొందరు.. అక్కడ తమకు నచ్చినవి ఆహార పదార్థాలు ఆర్డర్ చేసి ఫుల్లుగా తిన్నారు. మొత్తం రూ.10,900 బిల్లు చేశారు. దీన్ని ఎగ్గొట్టేందుకు కన్నింగ్ ప్లాన్ వేసి, ఒకరి తర్వాత ఒకరు టాయ్‌లెట్ అర్జెంట్ అని చెప్పి రెస్టారెంట్ నుంచి బయటపడ్డారు. అనంతరం తమ కారులో ఎక్కి అక్కడ నుంచి జారుకున్నారు. కానీ, వారు వెళ్లే దారిలో ట్రాఫిక్ జామ్‌ కారణంగా దొరికిపోయారు. అచ్చం సినిమాను తలపించే ఈ సంఘటన రాజస్థాన్‌లోని చోటుచేసుకుంది. గుజరాత్‌ నుంచి ఓ మహిళ సహా ఐదుగురు పర్యాటకులు వెకేషన్ కోసం రాజస్థాన్‌ వెళ్లి ఈ వెధవ పనిచేసి బుక్కయ్యారు.

రాజస్థాన్‌లోని మౌంట్ అబూ సందర్శనకు వెళ్లిన గుజరాత్‌కు చెందిన ఐదుగురు పర్యాటకుల బృందం... సియాన్‌లోని హ్యాపీ డే హోటల్‌కు వెళ్లింది. అక్కడ వివిధ రకాల ఆహార పదార్థాలు ఆర్డర్ చేసి, పీకల్దాక తిని మొత్తం రూ.10,900 బిల్లు చేశారు. కానీ, బిల్లు చెల్లించకుండా ఖతర్నాక్ ప్లాన్‌వేసి తప్పించుకోవాలని భావించారు. ఇందుకోసం పాత సినిమాల్లో ట్రిక్స్ ప్లే చేశారు. రెస్ట్‌రూమ్‌కు వెళ్లాలని చెప్పి ఒకరి తర్వాత ఒకరు టేబుల్ వద్ద నుంచి మెల్లగా జారుకుని బయటపడ్డారు. తమ కారులో ఎక్కి ఉడాయించే ప్రయత్నం చేశారు.

  టేబుల్ దగ్గర నుంచి వెళ్లిపోయిన కస్టమర్లు తిరిగి రాకపోవడంతో వాళ్లు బిల్లు ఎగ్గొట్టే ప్లాన్ చేసినట్టు హోటల్ యజమాని, సిబ్బందికి సీన్ అర్దమయ్యింది. దీంతో వారిని పట్టుకోడానికి వెంబడించారు. హోటల్ బయట ఉన్న సీసీటీవీ ఫుటేజ్‌లో ఆ కారు గుజరాత్, రాజస్థాన్ సరిహద్దులు అంబాజీ వైపు వెళ్తున్నట్టు గుర్తించారు. వారి కోసం గాలిస్తూ.. పోలీసుల సాయం తీసుకున్నారు. గుజరాత్ సరిహద్దు వరకు వెంబడించి పోలీసుల సహకారంతో ఐదుగురినీ అక్కడికక్కడే అరెస్టు చేశారు. వాళ్ల దగ్గర డబ్బులేకపోవడంతో స్నేహితుడికి ఫోన్ చేసి, అతడి దగ్గర డబ్బులు తీసుకుని బిల్లు చెల్లించారు. ట్రాఫిక్ జామ్‌ కాకుంటే బోర్డర్ దాటి తమ రాష్ట్రానికి వెళ్లిపోయేవారు. కానీ, వాహనాల రద్దీ కారణంగా దొరికిపోయారు. అయితే, వీరిపై కేసు నమోదుచేశారా? లేదా? అనేది మాత్రం తెలియరాలేదు.