శృంగారానికి నిరాకరించిందని.. రెండంతస్తుల భవనం పైనుంచి తోసేసిన భర్త

దేశంలో మహిళలపై లైంగిక వేధింపులు రోజురోజుకు ఎక్కువ అవుతున్నాయి. కఠిన చట్టాలున్నా కొందరు మృగాళ్లు పాశవికంగా ప్రవర్తిస్తున్నారు. పసివాళ్లను కూడా తమ కామానికి బలిచేస్తున్నారు. ఆస్పత్రుల్లో వైద్యులు, ఆఫీసుల్లో కొలీగ్స్.. ఇలా తెలిసిన, తెలియని వాళ్లపై కూడా లైంగిక వేధింపులకు పాల్పడుతున్నారు. అయితే కట్టుకున్న భార్యపై కూడా ఈ లైంగిక వేధింపులు ఆగడం లేదు. తాళి కడితే లైసెన్స్ ఇచ్చినట్లు.. ఇష్టమొచ్చినప్పుడల్లా తమ కామ వాంఛ తీర్చాలనే కరుడు గట్టిన భర్తలూ ఉన్నారు. తాజాగా ఇలాంటి ఘటనే ఉత్తర్‌ప్రదేశ్‌లోని ఝాన్సీలో జరిగింది. శృంగారానికి నిరాకరించిందని.. కట్టుకున్న భార్యను రెండంతస్తుల భవనం పైకప్పు నుండి తోసేశాడు ఓ ప్రబుద్ధుడు.

ఇదీ జరిగింది..

పోలీసులు తెలిపిన వివరాల ప్రకారం.. మౌ రాణిపూర్ పోలీస్ స్టేషన్ ప్రాంతం పరిధిలో నివసించే తీజాకు.. స్థానికంగా ఉన్న ఆలయంలో ముకేశ్ ఆశిర్వార్ అనే వ్యక్తితో పరిచయం అయింది. ఆ పరిచయం కాస్త ప్రేమగా మారింది. ఈ క్రమంలో ముకేశ్ ఆమెను జాగ్రత్తగా చూసుకుంటానని, ఆమెతోనే కలిసి జీవితం పంచుకుంటానని ప్రమాణం చేశాడు. అనంతరం ఇద్దరూ పెళ్లి చేసుకున్నారు. ఒక సంవత్సరం పాటు అంతా సాఫీగానే సాగింది. కానీ ఆ తర్వాత వివిధ కారణాల వల్ల అహిర్వార్ చాలా రోజులు ఇంటి బయటే గడిపేవాడు. అనంతరం ఇంటికి వచ్చి.. తీజాను కొట్టేవాడు.

ఎప్పటిలాగే కొన్ని రోజులు బయట ఉండి వచ్చిన ముకేశ్.. సోమవారం (అక్టోబర్ 27) ఇంటికి వచ్చి తీజాపై మళ్లీ చేయి చేసుకున్నాడు. ఈ క్రమంలో అతడితో శృంగారం చేయాల్సిందిగా బలవంతం చేశాడు. మరునాడు మంగళవారం కూడా ఆమెను మళ్ళీ కొట్టి, బలవంతంగా లైంగిక చర్యకు ప్రయత్నించాడు. తీజా ప్రతిఘటించింది. దీంతో కోపోద్రిక్తుడైన అహిర్వార్‌.. అతడి, తల్లిదండ్రులతో కలిసి తనను రెండు అంతస్తుల ఇంటి పైకప్పు నుండి తోసేశారని తీజా పోలీసులకు ఫిర్యాదు చేసింది.

తీజా అరుపులు విన్న ఆ ప్రాంత నివాసితులు.. తీవ్ర గాయాలు అయిన ఆమెను స్థానిక ఆరోగ్య కేంద్రానికి తరలించారు. అక్కడి వైద్యులు తీజాను ఝాన్సీ మెడికల్ కాలేజీకి సిఫారసు చేశారు. అయితే ప్రస్తుతం బాధితురాలి పరిస్థితి నిలకడగా ఉందని పోలీసులు తెలిపారు. ఆమె చేసిన ఆరోపణలపై దర్యాప్తు జరుగుతోందని వెల్లడించారు. దర్యాప్తు తర్వాత నిందితులపై కఠిన చర్యలు తీసుకుంటామని పేర్కొన్నారు. కాగా, ఇలాంటి ఘటనల్లో మహిళలు బాధితులుగా మారిపోతున్నారు. కానీ గతంలో మధ్యప్రదేశ్‌లోని టీకంగఢ్ జిల్లాలో భర్త ఇలాగే ప్రవర్తిస్తే.. అతడి అంగం కోసేసింది భార్య. ఈ ఘటన అప్పట్లో సంచలనం సృష్టించింది.