డ్రగ్స్‌పై ఉక్కుపాదం.. 2500 మంది పోలీసులతో భారీ ఆపరేషన్.. 64 మంది మృతి, 81 మంది అరెస్ట్

సాధారణంగా బ్రెజిల్‌లో మాదక ద్రవ్యాల అక్రమ రవాణా భారీ ఎత్తున జరుగుతుంది. పెద్ద పెద్ద ముఠాలు, ఇంటర్నేషనల్ డ్రగ్ డీలర్లతో లింకులు ఏర్పాటు చేసుకుని.. వివిధ దేశాలకు మత్తుపదార్థాలను అక్రమ రవాణా చేస్తూ ఉంటాయి. అయితే బ్రెజిల్‌ పోలీసులు.. ఈ డ్రగ్స్ ముఠా ఆటకట్టించేందుకు ఆ దేశంలో ఓ భారీ ఆపరేషన్ చేపట్టారు. రియో డి జనీరో నగరంలో మంగళవారం రోజున జరిగిన ఈ ఆపరేషన్‌లో 2500 మంది బ్రెజిల్ పోలీసులు, సైన్యం.. డ్రగ్స్ స్మగ్లింగ్‌కు పాల్పడుతున్న రెడ్ కమాండ్ అనే ముఠాపై మెరుపు దాడులు చేశారు. ఈ దాడులు.. బ్రెజిల్ చరిత్రలోనే అత్యంత హింసాత్మకమైన, భారీస్థాయి పోలీస్ ఆపరేషన్ అని స్థానిక అధికారులు వెల్లడించారు.

ఈ దాడుల్లో పోలీసులు, డ్రగ్స్ ముఠా మధ్య తీవ్రమైన కాల్పులు చోటుచేసుకున్నాయి. దీంతో భారీ ఎత్తున ప్రాణనష్టం సంభవించింది. ఈ ఆపరేషన్‌లో 60 మంది డ్రగ్స్ ముఠాకు చెందిన వారు మరణించారు. ఇక డ్రగ్స్ ముఠా జరిపిన కాల్పుల్లో నలుగురు పోలీసు అధికారులు కూడా ప్రాణాలు కోల్పోయారు. మొత్తం 81 మందిని పోలీసులు అరెస్ట్ చేయగా.. 93 రైఫిళ్లు, అర టన్నుకు పైగా డ్రగ్స్‌ను స్వాధీనం చేసుకున్నారు. రియో డి జనీరో నగరంలోని పేదలు నివసించే ప్రాంతాలైన కాంప్లెక్సో డి అలమావో, పెన్హా ఫావెలాస్‌లో ఈ దాడులు జరిగాయి.

ఇక ఈ ఆపరేషన్‌లో భాగంగా డ్రగ్ పెడ్లర్ల ఆటకట్టించేందుకు.. పోలీసులు హెలికాప్టర్లు, ఆర్మర్డ్ వాహనాలను ఉపయోగించారు. ఈ దాడిని నగర చరిత్రలోనే అతిపెద్ద ఆపరేషన్‌గా రియో రాష్ట్ర గవర్నర్ క్లాడియో కాస్ట్రో.. అభివర్ణించారు. చనిపోయిన వారంతా పోలీస్ చర్యను ప్రతిఘటించినవారేనని ఆ రాష్ట్ర ప్రభుత్వం పేర్కొంది.

ఇక ఈ ఆపరేషన్‌లో భారీ సంఖ్యలో నేరస్తులు మరణించడంపై స్థానికంగానే కాకుండా అంతర్జాతీయంగానూ తీవ్ర ఆందోళన వ్యక్తం అవుతోంది. ఈ సంఘటనతో తాము భయభ్రాంతులకు లోనయ్యామని.. ఐక్యరాజ్యసమితి మానవ హక్కుల సంస్థ పేర్కొంది. ఈ మరణాలపై సమర్థవంతమైన దర్యాప్తు జరపాలని.. అంతర్జాతీయ మానవ హక్కుల చట్టం ప్రకారం తమ బాధ్యతలను నెరవేర్చాలని అధికారులకు గుర్తు చేసింది.

ఇది ఒక భారీ విషాదమని.. హ్యూమన్ రైట్స్ వాచ్ డైరెక్టర్ సీజర్ మునియోజ్ అభివర్ణించారు. ప్రతి మరణంపై పబ్లిక్ ప్రాసిక్యూటర్ కార్యాలయం దర్యాప్తు జరపాలని ఆయన డిమాండ్ చేశారు. ఇక సోషల్ మీడియాలో వైరల్ అవుతున్న వీడియోల్లో కాల్పుల శబ్దాల మధ్య ఆ ప్రాంతంలో మంటలు, పొగలు కనిపించాయి. ఈ ఆపరేషన్ కారణంగా 46 పాఠశాలలను మూసివేశారు. అంతేకాకుండా సమీపంలోని ఫెడరల్ యూనివర్శిటీ ఆఫ్ రియో నైట్ క్లాసులను రద్దు చేసి.. సురక్షిత ప్రాంతాల్లో తలదాచుకోవాలని విద్యార్థులకు సూచించారు.