ఢిల్లీ పేరు మార్చండి.. రైల్వే స్టేషన్, ఎయిర్‌పోర్టు పేర్లు కూడా.. అమిత్ షాకు బీజేపీ ఎంపీ లేఖ

దేశంలోని వివిధ రాష్ట్రాల్లో అధికారంలో ఉన్న బీజేపీ ప్రభుత్వాలు.. ఆయా రాష్ట్రాల్లో ఉన్న నగరాలు, పట్టణాలు, గ్రామాల పేర్లను మార్చుతున్న సంగతి తెలిసిందే. వలస పాలకుల పేర్లతో ఉన్న వాటిని మార్చేసి.. కొత్త పేర్లు పెడుతున్నారు. ఇందులో ఉత్తర్‌ప్రదేశ్ ముఖ్యమంత్రి యోగి ఆదిత్యనాథ్ తొలి వరుసలో ఉన్నారు. ఆ తర్వాత మహారాష్ట్ర ప్రభుత్వం కూడా పలు పట్టణాల పేరు మార్చేసింది. ఈ క్రమంలోనే భారతదేశ రాజధాని ఢిల్లీ పేరును మార్చాలనే ప్రతిపాదన మరోసారి తెరపైకి వచ్చింది. ఈ మేరకు ఢిల్లీ బీజేపీ ఎంపీ ప్రవీణ్ ఖండేవాల్.. కేంద్ర హోం శాఖ మంత్రి అమిత్ షాకు ఒక లేఖ రాశారు. ఢిల్లీ నగరానికి ఉన్న ఘనమైన ప్రాచీన వారసత్వం, సంస్కృతిని దృష్టిలో ఉంచుకుని.. ఢిల్లీ పేరును ఇంద్రప్రస్థగా మార్చాలని ఆయన కోరారు.

ఎంపీ ప్రవీణ్ ఖండేవాల్ తన లేఖలో ఢిల్లీ చారిత్రక ప్రాముఖ్యతను గుర్తు చేశారు. ఢిల్లీ చరిత్ర పాండవుల యుగానికి నేరుగా అనుసంధానమై ఉందని.. మహాభారత కాలంలో పాండవులు యమునా నది ఒడ్డున తమ రాజధానిగా ఇంద్రప్రస్థను స్థాపించారని పేర్కొన్నారు. ఇది శ్రేయస్సు, సుపరిపాలన, నీతికి చిహ్నమని.. అందుకే ఢిల్లీ పేరును ఇంద్రప్రస్థగా మార్చడం వల్ల మన అద్భుతమైన సంప్రదాయాలను పునరుద్ధరించడమే అవుతుందని వెల్లడించారు.

కేవలం ఢిల్లీ పేరును మాత్రమే మార్చడం కాకుండా.. ఢిల్లీలోని ఇతర ముఖ్యమైన ప్రాంతాల పేర్లను కూడా మార్చాలని ప్రవీణ్ ఖండేవాల్ సూచించారు. ఢిల్లీని ఇంద్రప్రస్థ గా మార్చడంతోపాటు.. ఓల్డ్ ఢిల్లీ రైల్వే స్టేషన్ పేరును ఇంద్రప్రస్థ జంక్షన్‌గా మార్చాలని పేర్కొన్నారు. అంతేకాకుండా ఇందిరా గాంధీ అంతర్జాతీయ విమానాశ్రయం పేరును ఇంద్రప్రస్థ ఇంటర్నేషనల్ ఎయిర్‌పోర్టుగా మార్చాలని వెల్లడించారు. ఇక ఢిల్లీలోని ప్రముఖ ప్రాంతాల్లో పాండవుల విగ్రహాలను ఏర్పాటు చేయాలని తెలిపారు.

ఈ పేరు మార్పు ప్రతిపాదన ఢిల్లీ నగరానికి చారిత్రక వారసత్వాన్ని పునరుద్ధరిస్తుందని ప్రవీణ్ ఖండేవాల్ పేర్కొన్నారు. ఇంద్రప్రస్థ అనే పేరు పెట్టడం వల్ల మన మూలాలను తిరిగి కలుపుతుందని.. సాంస్కృతిక పునరుద్ధరణలో కొత్త అధ్యాయాన్ని ప్రారంభిస్తుందని వాదించారు.

ఇక ఉత్తర్‌ప్రదేశ్‌లోని అయోధ్య, కాశీ, ప్రయాగ్‌రాజ్ వంటి నగరాల పేర్లను మార్చడం ద్వారా.. వాటి సరైన చారిత్రక గుర్తింపులను తిరిగి పొందిన విధంగానే ఢిల్లీకి కూడా పొందాలని ఆయన కోరారు. ఈ పేరు మార్పు కారణంగా మతపరమైన, సాంస్కృతిక, చారిత్రక పర్యాటకం పెరుగుతుందని.. తద్వారా వ్యాపారం, ఉపాధి అవకాశాలు మెరుగుపడతాయని ఆయన అభిప్రాయం వ్యక్తం చేశారు.