భారత అభిమానులను సైలెంట్ చేస్తాం.. ఫైనల్ ముందు లారా వోల్వార్డ్ సంచలన వ్యాఖ్యలు!

ఐసీసీ మహిళల వరల్డ్ కప్ ఫైనల్ పోరులో భారత్‌పై విజయం సాధించి, సొంతగడ్డపై మ్యాచ్ చూస్తున్న భారత అభిమానులను సైలెంట్ చేస్తామని దక్షిణాఫ్రికా కెప్టెన్ లారా వోల్వార్డ్ (Laura Wolvaardt) ధీమా వ్యక్తం చేసింది. నేడు మధ్యాహ్నం 3.00 గంటలకు హర్మన్‌ప్రీత్ కౌర్ సారథ్యంలోని టీమ్ ఇండియాతో టైటిల్ పోరుకు సిద్ధమవుతున్న నేపథ్యంలో, వోల్వార్డ్ చేసిన ఈ వ్యాఖ్యలు మ్యాచ్‌కు మరింత వేడిని పెంచాయి. గతంలో 2023 ప్రపంచ కప్ ఫైనల్‌కు ముందు ఆస్ట్రేలియా కెప్టెన్ పాట్ కమిన్స్ సైతం ఇలాంటి వ్యాఖ్యలే చేసి, విజయం సాధించి చూపించిన నేపథ్యంలో, వోల్వార్డ్ మాటలు ప్రాధాన్యత సంతరించుకున్నాయి.
వోల్వార్డ్ మాట్లాడుతూ, ఫైనల్ మ్యాచ్ అంటేనే ఇరు జట్లపై తీవ్ర ఒత్తిడి ఉంటుందని అంగీకరించింది. అయితే, సొంత దేశం, సొంత మైదానం కావడంతో భారత్‌పై ఆ ఒత్తిడి మరింత ఎక్కువగా ఉంటుందని ఆమె అభిప్రాయపడింది. "దేశమంతా వారి వెంటే ఉంది, వారు గెలవాలని యావత్ దేశం ఆశిస్తుంది. అది భారత్‌పై మరింత ఒత్తిడిని పెంచుతుంది. ఇది మాకు అనుకూలంగా మారుతుందని ఆశిస్తున్నా" అని దక్షిణాఫ్రికా కెప్టెన్ పేర్కొంది. ఫైనల్ లాంటి కీలక పోరులో ఒత్తిడిని సమర్థంగా ఎదుర్కొని, ప్రశాంతంగా (calmest) ఉండే జట్టే కప్పును ముద్దాడే అవకాశం ఉంటుందని వోల్వార్డ్ స్పష్టం చేసింది.
గత రికార్డులు లేదా చరిత్ర ఈ ఫైనల్‌ను నిర్ణయించబోవని వోల్వార్డ్ తేల్చి చెప్పింది. లీగ్ దశలో భారత్‌పై తమకు ఉన్న గెలుపు రికార్డు గురించి అడగ్గా, "ప్రతి క్రికెట్ మ్యాచ్ సున్నా నుంచే మొదలవుతుంది. మేము మా చరిత్రలో దేనినీ ఈ గేమ్‌లోకి తీసుకురాలేము. గతంలో జరిగిన ఫైనల్స్ ఓటములైనా, భారత్‌పై గెలిచిన మ్యాచ్‌లైనా... అన్నింటినీ మర్చిపోయి పూర్తిగా కొత్త మైండ్‌సెట్‌తో ఈ మ్యాచ్‌ను ప్రారంభిస్తాం" అని ఆమె బదులిచ్చింది. ఈ మెగా ఫైనల్‌కు ముందు తాము కేవలం ప్రస్తుత క్షణంలో మాత్రమే దృష్టి పెడుతున్నామని, కప్పు గురించి ఆలోచించకుండా, తమ ఆటపై మాత్రమే దృష్టి సారిస్తున్నామని తెలిపింది.
దక్షిణాఫ్రికా జట్టుకు ఇది మొదటి ప్రపంచ కప్ ఫైనల్ కావడంతో, ఈ మ్యాచ్ వారి దేశానికి, మహిళల క్రికెట్‌కు చారిత్రక ఘట్టం కానుంది. ఈ మ్యాచ్ గెలిస్తే దక్షిణాఫ్రికాలో మహిళల క్రికెట్‌కు గొప్ప ప్రేరణ అవుతుందని వోల్వార్డ్ నొక్కి చెప్పింది. అటు భారత జట్టు కూడా సుదీర్ఘ నిరీక్షణకు తెరదించి తొలి టైటిల్ కోసం చూస్తోంది. అయితే, భారత్‌పై ఒత్తిడిని నెట్టివేస్తూ, తమ జట్టు ప్రశాంతంగా, దృష్టి కేంద్రీకరించి ఆడగలిగితే విజయం తమదేనని వోల్వార్డ్ విశ్వాసం వ్యక్తం చేసింది. ఈ రోజు చారిత్రక పోరులో క్రికెట్ ప్రపంచానికి కొత్త ఛాంపియన్‌ను అందించడానికి రెండు జట్లు సిద్ధంగా ఉన్నాయి.