సంచలనం.. నకిలీ మద్యం కేసులో కీలక మలుపు, మంత్రి జోగి రమేశ్ పాత్రపై ఏ1 వాంగ్మూలం

నకిలీ మద్యం తయారీ, విక్రయాల కేసులో కీలక పరిణామాలు చోటు చేసుకుంటున్నాయి. ఈ కేసులో ప్రధాన నిందితుడు (ఏ1) జనార్దన్ ఇచ్చిన సంచలన వాంగ్మూలం ఆధారంగానే రాష్ట్ర మంత్రి జోగి రమేశ్‌ను అరెస్ట్ చేసినట్లు తెలుస్తోంది. జనార్దన్ తన వాంగ్మూలంలో మంత్రి రమేశ్‌పై నేరుగా ఆరోపణలు చేసినట్లు విశ్వసనీయ వర్గాల సమాచారం. ఈ మేరకు పోలీసులు కీలక సాక్ష్యాలను సేకరించి అరెస్టుకు సిద్ధమైనట్లు సమాచారం.
జనార్దన్ తన రాతపూర్వక వాంగ్మూలంలో మంత్రి జోగి రమేశ్ ప్రోద్బలం, హామీ మేరకే తాను ఈ నకిలీ మద్యం దందా మొదలుపెట్టినట్లు స్పష్టం చేసినట్లు సమాచారం. వ్యాపారంలో నష్టపోయి ఆర్థిక ఇబ్బందుల్లో ఉన్న తనను రమేశ్ సంప్రదించారని, ఈ అక్రమ మద్యం తయారీకి ఒప్పుకుంటే రూ.3 కోట్ల భారీ మొత్తాన్ని ఇస్తానని హామీ ఇచ్చారని జనార్దన్ పేర్కొన్నారు. ఈ డబ్బును ఉపయోగించి ఆఫ్రికాలో ఒక డిస్టిలరీ ఏర్పాటు చేసుకునే అవకాశం కల్పిస్తానని మంత్రి ఆశ చూపినట్లు ఆయన వాంగ్మూలంలో ఉంది.
మంత్రి రమేశ్ సూచనల మేరకే జనార్దన్ ఈ దందాకు శ్రీకారం చుట్టినట్లు తెలుస్తోంది. 'ములకలచెరువు' ప్రాంతంలో జయచంద్రారెడ్డి అనే వ్యక్తి సహాయంతో నకిలీ మద్యం తయారీని ప్రారంభించమని రమేశ్ స్పష్టంగా సూచించినట్లు జనార్దన్ తన వాంగ్మూలంలో వెల్లడించారు. ఈ మేరకు తయారీకి కావాల్సిన వనరులు, ఇతర సహాయ సహకారాలను కూడా మంత్రి తరఫు నుంచే అందినట్లు సమాచారం. దీంతో ఈ మొత్తం స్కామ్‌లో మంత్రి జోగి రమేశ్ పాత్రపై స్పష్టమైన ఆధారాలు లభించినట్లు పోలీసులు భావిస్తున్నారు.
ప్రధాన నిందితుడి నుంచి అందిన ఈ వాంగ్మూలం కేసు దర్యాప్తులో కీలక మలుపుగా మారింది. ఏ1 జనార్దన్ స్వయంగా ఇచ్చిన ఈ రాతపూర్వక వాంగ్మూలాన్ని పోలీసులు పక్కా ఆధారంగా పరిగణిస్తున్నారు. వ్యాపార నష్టాలను, భవిష్యత్తు ఆశలను అడ్డుపెట్టుకుని మంత్రి జోగి రమేశ్.. జనార్దన్‌ను నకిలీ మద్యం తయారీకి ఉసిగొల్పారనేది ఈ వాంగ్మూలం సారాంశం. ఈ నేపథ్యంలో మంత్రిని అరెస్టు చేసిన పోలీసులు, తదుపరి విచారణలో మరిన్ని వివరాలను రాబట్టే అవకాశం ఉందని పరిశీలకులు అభిప్రాయపడుతున్నారు.