బంగారు, వెండి బల్లుల మిస్సింగ్ వివాదం.. కంచి ఆలయం కీలక ప్రకటన

తమిళనాడులోని కాంచీపురం శ్రీవరదరాజ పెరుమాళ్‌ ఆలయంలో బంగారు, వెండి బల్లుల తాపడాలను మార్చినట్లు జరుగుతోన్న ప్రచారంపై తీవ్ర దుమారం రేగిన విషయం తెలిసిందే. తాజాగా ఈ వివాదంపై కంచి ఆలయ యంత్రాంగం స్పందించింది. ఆరోపణలను తోసిపుచ్చిన అధికారులు.. బంగారు, వెండి బల్లుల విగ్రహాల్లో ఎలాంటి మార్పు లేదని ప్రకటించింది. శ్రీవరదరాజ పెరుమాళ్ ఆలయ కార్యనిర్వహాక అధికారి శుక్రవారం మాట్లాడుతూ.. ‘‘బంగారు, వెండి బల్లుల విగ్రహాలు ఆలయ సీలింగ్‌పై అలాగే ఉన్నాయి. వాటికి ఎలాంటి తాపడాలను మార్చలేదు.. వాటిని తొలగించనూలేదు దీనిపై తప్పుడు, నిరాధార ఆరోపణలు చేసిన ఆలయాలు ఉద్యమకారుడిపై న్యాయపరమైన చర్యలు తీసుకోనున్నాం’ అని తెలిపారు.

కాగా, కాంచీపురం శ్రీవరదరాజ పెరుమాళ్‌ ఆలయంలో పునరుద్ధరణ పనులు జరుగుతున్న వేళ.. పురాతన బంగారు, వెండి బల్లుల మాయమయ్యాయని ఓ భక్తుడు ఆరోపించారు. బల్లులకు కొత్త తాపడాలను చేశారని శ్రీరంగానికి చెందిన రంగరాజ నరసింహ భక్తుడు ఫిర్యాదు చేయడంతో కలకలం రేగింది. దీంతో పోలీసులు రంగంలోకి దిగి దర్యాప్తు చేపట్టారు. ఆలయ ఈవో రాజ్యలక్ష్మిని నవంబరు 5న 8 గంటల పాటు పోలీసులు విచారించారు. ఆమెతో పాటు మిగతా సిబ్బందిని కూడా ప్రశ్నించారు. ప్రస్తుతం ఈ అంశంపై విచారణ కొనసాగుతోంది. తాము పిలిచినప్పుడు మళ్లీ విచారణకు రావాలని ఆలయ ఈవో, సిబ్బందిని పోలీసులు ఆదేశించినట్లు తెలిసింది.

దేశంలోని 108 దివ్య క్షేత్రాల్లో ఒకటి కాంచీపురం. వరదరాజస్వామిగా శ్రీమహావిష్ణువు పూజలు అందుకునే ఈ ఆలయంలో బంగారు, వెండి బల్లులకు ఎంతో ప్రత్యేకత ఉంది. ప్రపంచ నలుమూలల నుంచి రోజూ వేలాది హిందువులు ఈ ఆలయాన్ని దర్శించుకుంటారు. ముఖ్యంగా బంగారు, వెండి బల్లులను తాకితే దోషాలు తొలగిపోతాయని ప్రగాఢ నమ్మకం. పురాణాల ప్రకారం గౌతమహర్షి తన శిష్యులకు ఇచ్చిన శాఫవిముక్తి బంగారు, వెండి బల్లులను తాకడంతో కలిగింది. ఇక, భగవద్ శ్రీరామానుజుల జీవితంలో ముఖ్య పాత్ర పోషించిన నాలుగు ఆలయాల్లో ఇది కూడా ఒకటి శ్రీవారు కొలువున్న కలియుగ వైకుంఠం తిరుమల పుష్పమండపం అయితే.. కంచి భోగ మండపం.. శ్రీరంగం జ్ఞానమండపం, మేల్కోటే (తిరునారాయణపురం) త్యాగమండపంగా గుర్తింపు పొందాయి.