దొంగతనం చేసేందుకు వచ్చి.. పొట్టుపొట్టు కొట్టించుకున్న మహిళ

 గుజరాత్ రాష్ట్రంలోని అహ్మదాబాద్‌ నగరంలో చోటు చేసుకున్న ఒక షాకింగ్ దోపిడీ ప్రయత్నం ఆలస్యంగా వెలుగులోకి వచ్చింది. అత్యంత చమత్కారంగా నగల దుకాణంలోకి ప్రవేశించిన ఓ మహిళ..కారంపొడి అస్త్రాన్ని ఉపయోగించి దొంగతనానికి ప్రయత్నించింది. అయితే యజమాని కళ్ల నిండా కారం పడుంటే అదే జరిగుండేది. కానీ యజమాని కళ్లల్లో కారం తక్కువగా పడడం, అందులోనూ ఆయన వెంటనే అప్రమత్తమై సదరు మహిళను పొట్టు పొట్టుగా కొట్టడంతో చోరీ విఫలయత్నంగానే మిగిలిపోయింది. ప్రస్తుతం ఇందుకు సంబంధించిన వీడియో నెట్టింట తెగ వైరల్ అవుతుండగా.. అంతా షాక్ అవుతున్నారు.

ఈ ఘటన అహ్మదాబాద్‌లోని రాణిప్‌ ప్రాంతంలో జరిగింది. స్థానిక నగల దుకాణానికి చెందిన యజమాని సోని దుకాణంలో ఒక్కడే ఉన్న సమయాన్ని చూసి..ఒక మహిళ లోపలికి ప్రవేశించింది. ముసుగు వేసుకుని వచ్చిన ఆ మహిళ.. ముందుగా కొనుగోలుదారురాలిగా నటించింది. యజమాని సోని ఒక్కడే ఉన్నట్లు తెలుసుకున్న ఆమె పథకం ప్రకారం బ్యాగులో దాచుకున్న కారంపొడి ప్యాకెట్‌ను తీసి అతడి కళ్లల్లో కొట్టేందుకు ప్రయత్నించింది. మహిళ చర్యను వెంటనే గ్రహించిన సోని.. చాకచక్యంగా తన ముఖాన్ని పక్కకు తిప్పుకున్నాడు. అయినప్పటికీ అతడి కళ్లల్లో కొద్దిగా కారం పడింది.

కానీ అదేమీ పట్టించుకోకుండానే అతడు కళ్లు తెరిచి సదరు మహిళపై దాడికి పాల్పడ్డాడు. ఇష్టం వచ్చినట్లుగా కొట్టారు. క్షణాల్లోనే సోని ఆ మహిళను సుమారు 20 సార్లకు పైగా చెంపలపై, వీపుపై కొట్టినట్లుగా సీసీటీవీ దృశ్యాలు స్పష్టంగా చూపుతున్నాయి. అనంతరం ఆమెను దుకాణం నుంచి బయటకు గెంటేశాడు. ప్రస్తుతం ఇందుకు సంబంధించిన వీడియో సోషల్ మీడియాలో తెగ వైరల్ అవుతోంది. దీని చూసిన వారంతా ఒక్కో విధంగా స్పందిస్తున్నారు. కొందరు నవ్వుతూ కామెంట్లు పెడుతుండగా.. భలే దొరికిపోయింది దొంగ అని చెప్పుకొస్తున్నారు. మరికొందరు మాత్రం ఇంకాసేపుంటే యజమానికి కుచ్చు టోపీయే పెట్టుండేదని వివరిస్తున్నారు.

ఈ వీడియో పోలీసుల కంట కూడా పడగా.. వైరల్ అవుతున్న వీడియో ఆధారంగానేదర్యాప్తు ప్రారంభించారు. దోపిడీకి ప్రయత్నించిన మహిళ ఆచూకీ కోసం గాలిస్తున్నారు. ముఖ్యంగా ఈ ప్రాంతంలో ఒంటరిగా ఉండే దుకాణాల వద్ద చోరీలకు ప్రయత్నాలు జరుగుతున్నట్లు తరచుగా ఫిర్యాదులు అందుతున్నాయని పోలీసులు చెబుతున్నారు. యజమానులు అంతా అప్రమత్తంగా ఉండాలని.. ఎలాంటి ప్రమాదం బారిన పడకుండా జాగ్రత్తలు తీసుకోవాలని సూచిస్తున్నారు.