బస్టాండులు, రైల్వే స్టేషన్ల నుంచి వీధి కుక్కలను తొలగించాలి': సుప్రీం కోర్టు

ప్రజల భద్రతకు, వీధి కుక్కల బెడదకు సంబంధించి సుప్రీం కోర్టు శుక్రవారం నాడు కీలకమైన ఉత్తర్వులు జారీ చేసింది. దేశవ్యాప్తంగా విద్యా సంస్థలు, ఆసుపత్రులు, బస్ స్టాండ్‌లు, రైల్వే స్టేషన్లు, స్పోర్ట్స్ కాంప్లెక్స్‌లు వంటి రద్దీ ప్రదేశాల నుంచి వీధి కుక్కలను తొలగించి.. వాటిని డాగ్ షెల్టర్లకు తరలించాలని అత్యున్నత న్యాయస్థానం ఆదేశించింది. ఈ ప్రక్రియను ఎనిమిది వారాల్లోగా పూర్తి చేయాలని స్పష్టం చేసింది.

పట్టుకున్న చోట వదలవద్దు..

జస్టిస్‌ విక్రమ్ నాథ్, జస్టిస్ సందీప్ మెహతా, జస్టిస్ ఎన్వీ అంజారియాలతో కూడిన ధర్మాసనం.. వీధి కుక్కల కాటు ఘటనలపై సుమోటోగా విచారణ జరుపుతోంది. ఈ విచారణలో భాగంగా కుక్కలను పట్టుకున్న తర్వాత వాటిని తిరిగి అదే ప్రదేశంలో వదల కూడదని ధర్మాసనం కఠినంగా ఆదేశించింది. కుక్కలు మనుషులకు ఇబ్బంది కలిగించని సురక్షిత ప్రాంతాలకు లేదా జంతు సంరక్షణ కేంద్రాలకు మాత్రమే తరలించాలని సూచించింది. ఈ కేసులో అమికస్ క్యూరీ సమర్పించిన నివేదికను రికార్డులోకి తీసుకున్న ధర్మాసనం.. ఆ నివేదికలోని అంశాలు తమ ఉత్తర్వుల్లో భాగం అవుతాయని తెలిపింది.

వీధి కుక్కలతో పాటు రోడ్లపై తిరిగే పశువుల నియంత్రణకు సంబంధించి కూడా సుప్రీం కోర్టు కీలక ఆదేశాలు జారీ చేసింది. హైవేలు, ఎక్స్‌ప్రెస్ వేలపై నుంచి పశువులను తొలగించి.. వాటిని షెల్టర్లలో పునరావాసం కల్పించాలని రాజస్థాన్ హైకోర్టు ఇచ్చిన ఆదేశాలను సుప్రీం కోర్టు ఈ సందర్భంగా ధృవీకరించింది.

ముఖ్యంగా జాతీయ రహదారులపై అడ్డంగా తిరిగే పశువుల గురించి రిపోర్టు చేయడానికి వీలుగా హెల్ప్‌లైన్ నంబర్‌లను ఏర్పాటు చేయాలని సుప్రీం కోర్టు తెలిపింది. రాష్ట్రాల ప్రధాన కార్యదర్శులు.. ఈ ఆదేశాలు కచ్చితంగా పాటించేలా పర్యవేక్షణ చేయాలన్నారు. ప్రమాదాలను తగ్గించి, ప్రజల భద్రతను పెంచేందుకు మున్సిపల్ అధికారులు, రహదారి, రవాణా అధికారులు సమన్వయంతో పని చేయాలని సూచించారు. ప్రజా భద్రతకు అత్యంత ప్రాధాన్యతనిస్తూ.. దేశవ్యాప్తంగా వీధి కుక్కలు, రోడ్లపై పశువుల బెడదను నివారించేందుకు ఈ ఉత్తర్వులు బలమైన అడుగు వేసినట్లు అయింది.