సాంకేతిక సమస్య.. 100కు పైగా విమాన సర్వీసులకు అంతరాయం

దేశ రాజధాని ఢిల్లీలోని ఇందిరా గాంధీ అంతర్జాతీయ విమానాశ్రయం (ఐజీఐ)లో గురువారం ఉదయం చోటుచేసుకున్న సాంకేతిక సమస్య కారణంగా విమాన కార్యకలాపాలు ఒక్కసారిగా నిలిచిపోయాయి. ఎయిర్ ట్రాఫిక్ కంట్రోల్ సర్వర్‌లో తలెత్తిన ప్రధాన సాంకేతిక లోపం వల్ల ఈ అంతరాయం ఏర్పడింది. ఈ గ్లిచ్ ప్రభావంతో ఢిల్లీ ఎయిర్‌ పోర్ట్‌లోనే 100కు పైగా విమానాలు ఆలస్యం అయినట్లు ప్రాథమికంగా తెలుస్తోంది. అయితే అంతరాయం తీవ్రత దృష్ట్యా ఈ సంఖ్య ఇంకా ఎక్కువగా ఉండవచ్చని విమానాశ్రయ వర్గాలు అంచనా వేస్తున్నాయి.

ఏటీసీ వ్యవస్థలో తలెత్తిన ఈ సమస్య కేవలం ఢిల్లీ విమానాశ్రయాన్ని మాత్రమే కాకుండా మొత్తం ఉత్తర భారత దేశంలోని విమానాల కార్యకలాపాలపై తీవ్ర ప్రభావం చూపింది. రాకపోకలకు సంబంధించిన క్లియరెన్స్‌లు నిలిచిపోవడంతో.. విమానాల బయలుదేరడంలో, అలాగే గమ్యస్థానాలకు చేరుకోవడంలో వరుస ఆలస్యాలు ఏర్పడ్డాయి. ఈ ఆకస్మిక అంతరాయం కారణంగా ప్రయాణికులు తీవ్ర ఇబ్బందులు పడ్డారు. కొందరు ప్రయాణికులు విమానాశ్రయ టెర్మినల్‌లలోని బోర్డింగ్ గేట్ల వద్ద గంటల తరబడి క్యూలలో నిరీక్షించగా, మరికొందరు ఇప్పటికే బోర్డింగ్ పూర్తయి టేకాఫ్ కోసం సిద్ధంగా ఉన్న విమానాల్లోనే చిక్కుకుపోయారు.

 కొన్ని గంటలుగా అక్కడే కూర్చోవడంతో.. ఏర్పడుతున్న ఇబ్బందులు, తమ కష్టాలను వివరిస్తూ ఆలస్యంపై ఫిర్యాదులు చేస్తున్నారు. అంతేకాకుండా సోషల్ మీడియా వేదికగా అనేక మంది ప్రయాణికులు తమ ఆందోళన వ్యక్తం చేశారు. ప్రముఖ విమానయాన సంస్థ ఇండిగో ఈ అంతరాయాన్ని ధృవీకరించింది. "ఢిల్లీ విమానాశ్రయం ఏటీసీ వ్యవస్థలో సాంకేతిక సమస్య కారణంగా విమాన కార్యకలాపాలలో ఆలస్యం ఏర్పడింది. ఢిల్లీ, ఉత్తర ప్రాంతంలో మా సేవలకు అంతరాయం కలిగింది. గ్రౌండ్‌లో, విమానంలో ఎక్కువ సమయం వేచి ఉండటం వలన కలిగిన అసౌకర్యానికి చింతిస్తున్నాము" అని పేర్కొంటూ ఆ సంస్థ ఓ ప్రకటన విడుదల చేసింది.

మరోవైపు ఏటీసీ సాంకేతిక బృందాలు యుద్ధప్రాతిపదికన సర్వర్ సమస్యను పరిష్కరించడానికి కృషి చేస్తున్నాయని, విమాన కార్యకలాపాలను క్రమంగా పునరుద్ధరిస్తున్నామని విమానాశ్రయ అధికారులు తెలిపారు. చూడాలి మరి ఎప్పటి లోపు ఈ సమస్య సమిసిపోతుంది, విమాన ప్రయాణాలు ప్రారంభం అవుతాయనేది.