ఉపాధ్యాయురాలిపై ఆరేళ్ల బాలుడి కాల్పులు

అగ్రరాజ్యం అమెరికాలోని వర్జీనియాలో సంచలనం సృష్టించిన స్కూల్ కాల్పుల కేసులో బాధితురాలైన టీచర్‌కు భారీ ఊరట లభించింది. తన దగ్గర విద్య నేర్చుకుంటున్న 6 ఏళ్ల విద్యార్థి జరిపిన కాల్పుల్లో గాయపడిన ఉపాధ్యాయురాలు అబిగైల్ జ్వెర్నర్.. స్కూల్ నిర్వాహకురాలి నిర్లక్ష్యాన్ని ప్రశ్నిస్తూ దాఖలు చేసిన సివిల్ దావాలో 10 మిలియన్ల డాలర్లు (భారత కరెన్సీ ప్రకారం దాదాపు రూ. 88 కోట్లు) నష్టపరిహారం లభించింది. గురువారం నాడు న్యాయస్థానం ఈ కీలక తీర్పును వెలువరించింది.

2023 జనవరిలో న్యూపోర్ట్ న్యూస్లోని రిచ్‌నెక్ ఎలిమెంటరీ స్కూల్‌లో ఈ దారుణ ఘటన జరిగింది. తరగతి గదిలో ఉన్న ఉపాధ్యాయురాలు జ్వెర్నర్‌పై.. 6 ఏళ్ల విద్యార్థి 9ఎమ్ఎమ్ హ్యాండ్‌గన్‌తో కాల్పులు జరిపాడు. ఈక్రమంలోనే జ్వెర్నర్‌ చేతికి, ఛాతీకి బుల్లెట్‌లు తగిలాయి. ఓవైపు రక్తస్రావం అవుతున్నా.. తరగతి గదిలో ఉన్న మిగతా పిల్లల్ని రక్షించాలనే ఉద్దేశంతో నొప్పిని భరిస్తూనే వారందరినీ క్షేమంగా బయటకు పంపించారు. ఆ తర్వాతే ఆమె ఆస్పత్రికి వెళ్లారు. ఈక్రమంలోనే ఆమె చేతికి ఐదుసార్లు శస్త్ర చికిత్స చేయాల్సి వచ్చింది. అయినప్పటికీ.. బుల్లెట్ ఇప్పటికీ ఆమె ఛాతీలోనే ఉండిపోయింది.

ఈ ఘటనకు మాజీ అసిస్టెంట్ ప్రిన్సిపాల్ అయిన ఎబోనీ పార్కర్ నిర్లక్ష్యమే కారణమని జ్వెర్నర్ ఆరోపించారు. కాల్పులు జరగడానికి ముందు ఆ బాలుడి వద్ద తుపాకీ ఉందని తోటి విద్యార్థులు పలుమార్లు ఫిర్యాదు చేసినప్పటికీ.. పార్కర్ ఆ సమాచారాన్ని పట్టించుకోలేదని జ్వెర్నర్ తరఫు న్యాయవాదులు వాదించారు. ఈ ఆరోపణలను పార్కర్ తరఫు న్యాయవాదులు తోసిపుచ్చారు. కాల్పులు జరగడాన్ని తాము అస్సలే ఊహించలేమని వాదించారు. ఇరువైపులా వాదనలు విన్న న్యాయస్థానం నిజంగానే నిందితుడి వద్ద తుపాకీ ఉన్న విషయం వారి దృష్టికి వెళ్లిందని గ్రహించింది. ఈక్రమంలోనే పాఠశాల నిర్వాహకురాలికి 10 మిలియన్ డాలర్ల నష్ట పరిహాహారాన్ని చెల్లించాలని ఆదేశాలు జారీ చేసింది.

మరోవైపు తుపాకీ తెచ్చిన బాలుడి తల్లి దేజా టేలర్‌ తుపాకీ కలిగి ఉండటం, కొనుగోలు సమయంలో తప్పుడు సమాచారం ఇచ్చినటువంటి ఫెడరల్ ఆరోపణలపై గతంలో 21 నెలల జైలు శిక్ష పడింది. మాజీ అసిస్టెంట్ ప్రిన్సిపాల్ ఎబోనీ పార్కర్‌పై కూడా బాలల దుర్వినియోగం, నిర్లక్ష్యం ఆరోపణలపై వచ్చే నెలలో క్రిమినల్ విచారణ జరగనుంది. ఈ సివిల్ తీర్పు బాధితురాలికి న్యాయం అందించడంతో పాటు భవిష్యత్తులో స్కూల్ నిర్వాహకులు తీసుకోవాల్సిన జాగ్రత్తల గురించి కూడా హెచ్చరికలు జారీ చేసినట్లు అయింది.