నేను త్వరలోనే భారత్ వస్తా: ట్రంప్

అగ్రరాజ్యం అమెరికా అధ్యక్షుడు డొనాల్డ్ ట్రంప్ త్వరలో భారతదేశంలో పర్యటించే అవకాశం ఉన్నట్లు నేరుగా ఆయనే తెలిపారు. అయితే వచ్చే ఏడాదిలో ఈ పర్యటన ఉండొచ్చని ట్రంప్‌యే హింట్ ఇవ్వడం అంతర్జాతీయంగా ప్రాధాన్యత సంతరించుకుంది. అంతేకాకుండా ట్రంప్ ప్రధాన మంత్రి నరేంద్ర మోదీపై ప్రశంసల వర్షం కురిపించారు. ఇరు దేశాల మధ్య వాణిజ్య చర్చలు కీలక దశలో ఉన్న సమయంలో ట్రంప్ ఈ ప్రకటన చేయడం ఆసక్తికరంగా మారింది.

మోదీ నాకు గొప్ప స్నేహితుడు: ట్రంప్

బరువు తగ్గించే మందుల ధరలను తగ్గించేందుకు ఫార్మా కంపెనీలతో కొత్త ఒప్పందం గురించి వైట్‌హౌస్‌లో విలేకరులకు వివరిస్తున్న సమయంలో ట్రంప్ ఈ వ్యాఖ్యలు చేశారు. ప్రధాని మోదీతో వాణిజ్య చర్చలు చాలా బాగా జరుగుతున్నాయని తెలిపారు. ట్రంప్ మాట్లాడుతూ.. “ప్రధాని మోదీ రష్యా నుంచి చమురు కొనడం చాలా వరకు మానేశారు. ఆయన నాకు గొప్ప స్నేహితుడు. మా మధ్య చర్చలు జరుగుతున్నాయి. నేను అక్కడికి (భారత్‌కు) రావాలని ఆయన కోరుకుంటున్నారు. మేము దానిని పరిశీలిస్తున్నాం. నేను వెళ్తాను. ప్రధాని మోదీ గొప్ప వ్యక్తి” అని ట్రంప్ తన వ్యక్తిగత సంబంధాన్ని బలంగా నొక్కి చెప్పారు.

వచ్చే ఏడాదిలోనే ట్రంప్ భారత పర్యటన..

ఈ సందర్భంగానే.. వచ్చే ఏడాది భారత్‌లో పర్యటించాలని ప్లాన్ చేస్తున్నారా? అని ఒక విలేకరి ప్రశ్నించగా.. ట్రంప్ బదులిస్తూ “అలా కావొచ్చు. అవును” అని పేర్కొన్నారు. అయితే ఈ పర్యటనకు సంబంధించిన తేదీలు లేదా అధికారిక ప్రకటనను మాత్రం వైట్‌హౌస్ ఇంతవరకు చేయలేదు. రష్యా నుంచి భారత్ ముడి చమురు కొనుగోలు చేస్తుందన్న కారణంతో గతంలో అమెరికా భారత్‌పై భారీగా సుంకాలు విధించింది. అయినప్పటికీ.. వాణిజ్య సంబంధాల బలోపేతమే తమ ప్రధాన లక్ష్యమని ట్రంప్ చెప్పుకొచ్చారు. మోదీ రష్యా నుంచి చమురు కొనుగోలును తగ్గించారనే ట్రంప్ వ్యాఖ్యలు, ఈ వివాదంపై అమెరికా వైఖరి కాస్త మెత్తబడినట్లుగా కనిపిస్తోంది.

ట్రంప్ ఫార్మా కంపెనీల ఒప్పందం గురించి మాట్లాడుతున్న సమయంలో.. ఆయన పక్కనే ఉన్న నోవో నార్డిస్క్‌ ఎగ్జిక్యూటివ్‌ గోర్డాన్‌ ఫైండ్లే ఒక్కసారిగా కుప్పకూలిపోయారు. దీంతో కార్యక్రమానికి కొద్ది సేపు అంతరాయం కలిగింది. వైట్‌హౌస్‌ వైద్య బృందం వెంటనే స్పందించి చికిత్స అందించినట్లు ప్రెస్ సెక్రటరీ కరోలినా లీవిట్ తెలిపారు. మొత్తంగా ట్రంప్ ప్రకటన ఇరు దేశాల మధ్య వాణిజ్య మరియు వ్యూహాత్మక సంబంధాలు మరింత మెరుగుపడేందుకు సంకేతాలుగా నిలుస్తున్నాయి.