ఒకే టెస్ట్‌లో 2 సెంచరీలు.. కెప్టెన్, కోచ్‌కు తలనొప్పిగా మారిన ధ్రువ్ జురెల్‌

దక్షిణాఫ్రికాతో టెస్ట్ సిరీస్‌కు ముందు టీమిండియా యంగ్ బ్యాటర్ ధ్రువ్ జురెల్ సత్తాచాటుతున్నాడు. దక్షిణాఫ్రికా ఏతో జరుగుతున్న అనధికారిక టెస్ట్ సిరీస్‌లో అదరగొడుతున్నాడు. ముఖ్యంగా తాజాగా జరుగుతున్న రెండో అనధికారిక టెస్ట్‌లో ఏకంగా రెండు శతకాలు సాధించాడు. తొలి ఇన్నింగ్స్‌లో అజేయ శతకం సాధించిన అతడు.. రెండో ఇన్నింగ్స్‌లోనూ అదే రిపీట్ చేశాడు. దీంతో రెండో అనధికారిక టెస్ట్‌లో భారత్ పట్టుబిగించింది.

నవంబర్ 14 నుంచి భారత్, దక్షిణాఫ్రికా జట్ల మధ్య తొలి టెస్ట్ జరగనుంది. అయితే ఈ సిరీస్‌కు సన్నాహకంగా ప్రస్తుతం ఇండియా ఏ, దక్షిణాఫ్రికా ఏ రెండు మ్యాచ్‌ల అనధికారిక టెస్ట్‌లు ఆడుతున్నాయి. తొలి మ్యాచ్‌లో భారత్ విజయం సాధించింది. రెండో మ్యాచ్‌లోనూ ధ్రువ్ జురెల్ శతకాల మోతతో విజయం దిశగా అడుగులు వేస్తోంది.

రెండో అనధికారిక టెస్ట్‌లో తొలుత బ్యాటింగ్ చేసిన భారత్.. 77.1 ఓవర్లలో 255 పరుగులకు ఆలౌట్ అయింది. అయితే మిగతా బ్యాటర్లు విఫలమైన చోట ధ్రువ్ జురెల్ సత్తాచాటాడు. 175 బంతుల్లో 132 రన్స్ చేసి అజేయంగా నిలిచాడు. జట్టుకు మెరుగైన స్కోరు అందించాడు. ఇక రెండో ఇన్నింగ్స్‌లోనూ అతడు సత్తాచాటాడు. 170 బంతుల్లో 127 రన్స్ చేసి అజేయంగా నిలిచాడు. దీంతో భారత్ రెండో ఇన్నింగ్స్‌లో 89.2 ఓవర్లలో ఏడు వికెట్ల నష్టానికి 382 పరుగులు చేసి, ఇన్నింగ్స్‌ను డిక్లేర్డ్ చేసింది. అనంతరం మూడో రోజు ఆట ముగిసే సమయానికి దక్షిణాఫ్రికా వికెట్ నష్టపోకుండా 25 పరుగులు చేసింది. ఆ జట్టు గెలవాలంటే చివరి రోజు 392 పరుగులు చేయాల్సి ఉంది.

జురెల్ జోరు..

గత కొన్ని రోజులుగా ధ్రువ్ జురెల్ అద్భుత ప్రదర్శన చేస్తున్నాడు. ముఖ్యంగా ఫస్ట్ క్లాస్ క్రికెట్‌లో పరుగుల వరద పారిస్తున్నాడు. గత 8 ఫస్ట్ క్లాస్ ఇన్నింగ్స్‌లలో అతడు.. 140, 1, 56, 125, 44, 6*, 132* & 127* పరుగులు చేశాడు. చివరి 14 ఇన్నింగ్స్‌లలో 90కి పైగా సగటుతో 911 పరుగులు చేశాడు. ఇందులో నాలుగు సెంచరీలు.. నాలుగు హాఫ్ సెంచరీలు ఉన్నాయి. అత్యధిక స్కోరు 140.

ప్రస్తుతం ధ్రువ్ జురెల్ తన ఫామ్‌తో కెప్టెన్, కోచ్‌కు సవాల్ విసురుతున్నాడు. దక్షిణాఫ్రికాతో తొలి టెస్టులో కచ్చితంగా చోటు ఇవ్వాల్సిన పరిస్థితి తీసుకొచ్చాడు. దీనిపై స్పందించిన మాజీ క్రికెటర్ రవిచంద్రన్ అశ్విన్.. జురెల్ తన ఫామ్‌తో రాబోయే టెస్ట్‌ మ్యాచ్‌ తుది జట్టు నుంచి తనను తప్పించలేని పరిస్థితి తీసుకొచ్చాడని ట్వీట్ చేశాడు. మరి దక్షిణాఫ్రికాతో నవంబర్ 14 నుంచి జరిగే తొలి టెస్టులో జురెల్‌కు చోటు దక్కుతుందా? లేదా అన్నది తేలాల్సి ఉంది.