యూఎస్ షట్‌డౌన్‌కు తెర.. ప్రభుత్వ నిధులపై డెమోక్రాట్‌లు, రిపబ్లికన్‌ల కీలక ఒప్పందం

అమెరికా చరిత్రలోనే అత్యంత సుదీర్ఘమైన 40 రోజుల ప్రభుత్వ కార్యకలాపాల నిలుపుదలకు ముగింపు పలికే దిశగా యూఎస్ సెనేట్‌లో కీలక ఒప్పందం కుదిరింది. ఉభయపక్షాలకు చెందిన సెనేటర్ల బృందం.. ప్రభుత్వాన్ని జనవరి 30వ తేదీ వరకు నిధులు సమకూర్చేందుకు వీలు కల్పించే ఒక ఒప్పందాన్ని చేసుకుంది. ఈ ఒప్పందాన్ని ఆమోదించడానికి సెనేట్ ఆదివారం రాత్రి ఓటింగ్‌కు సిద్ధమైంది.

ఒప్పందంలో కీలక అంశాలు..

సెనేటర్లు ఆంగస్ కింగ్, జీన్ షాహీన్, మాగీ హస్సన్ సహా పలువురు రిపబ్లికన్ సెనేటర్లు సంయుక్తంగా ఈ డీల్‌ను రూపొందించారు. ఈ ప్రణాళికను ఆమోదించడానికి సెనేట్ డెమోక్రాటిక్ కాకస్‌లో తగినంత మందికి మించి సభ్యులు సిద్ధంగా ఉన్నారని ఈ విషయం తెలిసిన వర్గాలు తెలిపాయి. ఈ ఒప్పందం ద్వారా.. హౌస్ ఆమోదించిన స్టాప్‌గ్యాప్ ఫండింగ్ (తాత్కాలిక నిధుల) చర్య ముందుకు సాగనుంది. ఈ డీల్ ప్రకారం కీలకు విభాగాలకు సంబంధించిన అంటే వ్యవసాయ శాఖ, ఆహార, ఔషధ పరిపాలన (FDA), వెటరన్స్ వ్యవహారాల శాఖ, సైనిక నిర్మాణ ప్రాజెక్టులు ఉన్నాయి. వీటన్నింటికీ ప్రస్తుత ఆర్థిక సంవత్సరం మిగిలిన కాలానికి పూర్తిగా నిధులు పొందుతాయి. అయితే మిగిలిన అన్ని ఫెడరల్ ఏజెన్సీలకు జనవరి 30వ తేదీ వరకు నిధులు సమకూరుతాయి.

ఈ డీల్‌లో భాగంగా షట్‌డౌన్ సమయంలో ఫర్లో (నిర్బంధ సెలవు)పై వెళ్లిన ఫెడరల్ ఉద్యోగులు అందరినీ తిరిగి విధుల్లోకి తీసుకోవడం, వారికి కార్యకలాపాలు పునఃప్రారంభమైన వెంటనే వెనుకటి జీతం చెల్లించాల్సి ఉంటుంది. రాజకీయంగా ఈ ఒప్పందంలో డెమోక్రాట్‌లకు అనుకూలమైన ఒక కీలక హామీ దక్కింది. సెనేట్ మెజారిటీ నాయకుడు జాన్ థూన్.. ఈ ఏడాది చివరిలో గడువు ముగియనున్న అఫర్డబుల్ కేర్ యాక్ట్  సబ్సిడీలను పొడిగించడానికి వీలుగా డిసెంబర్‌లో డెమోక్రాట్‌లకు అనుకూలంగా ఒక బిల్లుపై ఓటు వేస్తామని హామీ ఇచ్చారు.

ఈ పరిణామంపై స్పందించిన అధ్యక్షుడు డొనాల్డ్ ట్రంప్.. ప్రభుత్వ కార్యకలాపాల నిలుపుదల ముగింపు దశకు చేరుకుందని సానుకూలంగా ప్రకటించారు. "షట్‌డౌన్ ముగింపుకు దగ్గరగా వస్తున్నట్లు కనిపిస్తోంది. త్వరలోనే మీకు తెలుస్తుంది" అని ఆయన వైట్‌హౌస్‌కు తిరిగి వస్తూ విలేకరులతో అన్నారు. ఈ ఓటింగ్ యూఎస్ చరిత్రలో సుదీర్ఘమైన షట్‌డౌన్‌ను పరిష్కరించడానికి తీసుకున్న అత్యంత ముఖ్యమైన అడుగుగా అంతా భావిస్తున్నారు.