ఎస్ఐఆర్‌తో పని ఒత్తిడి.. ఉద్యోగానికి మహిళా టీచర్ రాజీనామా

కేంద్ర ఎన్నికల కమిషన్ చేపట్టిన ఓటర్ల జాబితా ప్రత్యేక ముమ్మర సమీక్ష ( ఎస్ఐఆర్ ) కోసం బూత్ లెవెల్ అధికారిగా నియమితులైన ఓ మహిళా టీచర్ పనిభారంతో ఒత్తిడికి గురై ఉద్యోగానికి రాజీనామా చేశారు. నొయిడాకు చెందిన టీచర్ రాజీనామా లేఖ సోషల్ మీడియాలో ప్రస్తుతం వైరల్ అవుతోంది. టీచింగ్, ఎస్ఐఆర్ రెండింటినీ మేనేజ్ చేయడం తనవల్ల కావడం లేదని ఆమె వాపోయారు. వివరాల్లోకి వెళ్తే.. నొయిడా సెక్టార్ 94లోని గేజా హయ్యర్ ప్రైమరీ స్కూల్‌లో అసిస్టెంట్ టీచర్‌గా పనిచేస్తోన్న పింకీ సింగ్‌ను.. 1,179 మంది ఓటర్లు ఉన్న సెక్టార్ 33లో బీఎల్‌గా అదనపు బాధ్యతలు అప్పగించారు. ఇందులో భాగంగా ఇప్పటి వరకూ ఆన్‌‌లైన్ ద్వారా ఆమె 215 దరఖాస్తులను పూర్తిచేశారు.

‘‘నేను నా ఉద్యోగానికి రాజీనామా చేస్తున్నాను.. ఇకపై నేను ఈ పనిచేయలేను.. బీఎల్ఓ పని, నా ఉపాధ్యాయ వృత్తిని నిర్వహించలేను.. ఎన్నికల సామగ్రిని ఎవరికి అందజేయాలో దయజేసి నాకు తెలియజేయండి’’ అంటూ ఎన్నికల అధికారికి పింకీ సింగ్ లేఖ రాశారు. ఎస్ఐఆర్ ప్రక్రియలో నిర్లక్ష్యంగా వ్యవహరిస్తున్నారని ఆరోపిస్తూ 60 మంది బీఎల్ఓ‌లు, ఏడుగురు సూపర్‌వైజర్లపై ఎఫ్ఐఆర్ నమోదయిన సందర్భంలో పింకీ సింగ్ రాజీనామా చేయడం చర్చనీయాంశంగా మారింది. నొయిడా జిల్లాలో నవంబరు 4న మొదలైన ఎస్ఐఆర్.. డిసెంబరు 4తో ముగియనుంది.

 ‘‘దాద్రి నియోజకవర్గంలో ప్రత్యేక ఇంటెన్సివ్ రివిజన్ కార్యక్రమంలో నిర్లక్ష్యం, ఉదాసీనత, సీనియర్ అధికారుల సూచనలను పాటించకపోవడంపై ఎఫ్ఐఆర్ నమోదు చేశాం’’ అని ఎస్డీఎం, ఆ నియోజకవర్గ ఎలక్ట్రోల్ రిజిస్ట్రేషన్ ఆఫీసర్ అశుతోష్ గుప్తా అన్నారు. అలాగే, ఎస్ఐఆర్ ప్రక్రియలో మార్గదర్శకాలను పాటించని 11 మంది బీఎల్ఓలు, ఆరుగురు సూపర్‌వైజర్లపై దాద్రి పోలీస్ స్టేషన్‌లో ఎఫ్ఐఆర్ నమోదయ్యింది.

బీఎల్ఓ అనేది ఎన్నికల కమిషన్ క్షేత్రస్థాయి ప్రతినిధి. ఆయన/ ఆమెకు కేటాయించిన పోలింగ్ బూత్‌కు సంబంధించిన ఓటర్ జాబితా సవరణ ప్రక్రియ, ఓటర్లకు సంబంధించిన స్థానిక వాస్తవ సమాచారాన్ని సేకరించడం వంటి కీలక బాధ్యతలు ఉంటాయి. 2006 ఆగస్టు నుంచి ఓటర్ జాబితా (ఎలక్టోరల్ రోల్) ఖచ్చితత్వాన్ని నిర్ధారించేందుకు బీఎల్వోలను నియమించాలని ఈసీ నిర్ణయించింది. ఇదేమీ శాశ్వత లేదా ప్రత్యేక ఉద్యోగం కాదు. ప్రభుత్వ ఉద్యోగులకు దీనిని అదనంగా అప్పగిస్తారు. ఎస్ఐఆర్ ప్రక్రియలో బీఎల్వోలు వేలాదిగా ఫామ్స్ సేకరించడం, పాత జాబితాలోని సమాచారంతో సరిపోల్చడం, ఫిజికల్ వెరిఫికేషన్ వంటి పలు విధులు నిర్వర్తించాల్సి ఉంటుంది.