రెండు తుఫానుల ద్వంద్వ హెచ్చరిక.. ‘సెన్యూర్’ బలహీనం.. కొత్త వాయుగుండం రాక!

మలక్కా జలసంధి ప్రాంతంలో ఏర్పడిన తీవ్ర వాయుగుండం ఇప్పటికే తుఫానుగా మారి రౌడీ రూపం దాల్చింది. ఆంధ్రప్రదేశ్ రాష్ట్ర విపత్తుల నిర్వహణ శాఖ (APSDMA) దీనికి అధికారికంగా ‘సెన్యూర్’ అనే పేరు పెట్టింది. ప్రస్తుతం ఇది గంటకు 100 కిలోమీటర్లకు పైగా వేగంతో ప్రయాణిస్తోందని, అయితే మరో 24 గంటల్లో క్రమంగా బలహీనపడి అల్పపీడనంగా మారే అవకాశం ఉందని అధికారులు తెలిపారు.
అదే సమయంలో నైరుతి బంగాళాఖాతంలో మరో కొత్త అల్పపీడనం ఏర్పడింది. ఇది చాలా వేగంగా బలపడుతూ కేవలం కొన్ని గంటల్లోనే తీవ్ర అల్పపీడనంగా, తర్వాత 24 గంటల్లో వాయుగుండంగా మారే అవకాశం ఉందని వాతావరణ శాఖ హెచ్చరించింది. ఈ రెండు వ్యవస్థలూ ఒకేసారి యాక్టివ్‌లో ఉండటంతో రాష్ట్రంలో వాతావరణం తీవ్రంగా మారనుంది.
ఈ రెండు వ్యవస్థల ప్రభావంతో రాష్ట్రవ్యాప్తంగా మోస్తరు నుంచి భారీ వర్షాలు కురుస్తాయని APSDMA అంచనా వేసింది. ముఖ్యంగా ఉత్తర కోస్తా, దక్షిణ కోస్తా, రాయలసీమ జిల్లాల్లో ఈ రోజు నుంచి రెండు మూడు రోజుల వరకు భారీ నుంచి అతి భారీ వర్షాలు పడే పరిస్థితి ఉంది. కొన్ని చోట్ల గంటకు 50-60 కి.మీ వేగంతో ఈదురు గాలులు కూడా వీస్తాయని అధికారులు హెచ్చరిస్తున్నారు.
మత్స్యకారులు ఈ మూడు రోజులు సముద్రంలోకి వెళ్లొద్దని, తమ పడవలను సురక్షిత స్థలాల్లో ఉంచుకోవాలని అధికారులు సూచించారు. అలాగే ప్రజలు అనవసరంగా బయటకు రాకుండా జాగ్రత్తలు తీసుకోవాలని, అధికారులు జారీ చేసే హెచ్చరికలను ఎప్పటికప్పుడు పాటించాలని APSDMA కోరింది. రాష్ట్రంలో ఎక్కడికక్కడ ఎలాంటి పరిస్థితి నెలకొందో దగ్గరగా పర్యవేక్షిస్తున్నట్లు తెలిపింది.