“భార్య పుట్టింట ఉన్నా… DNA టెస్టు రొటీన్‌గా కాదు: అలహాబాద్ హైకోర్టు కీలక తీర్పు”

అలహాబాద్ హైకోర్టు ఇటీవల ఒక ముఖ్యమైన తీర్పు ఇచ్చింది. దంపతుల మధ్య సాధారణ వైవాహిక వివాదాలు ఉన్నంత మాత్రమే పిల్లలకు DNA పితృత్వ పరీక్ష రొటీన్‌గా చేయడానికి అవకాశం లేదని స్పష్టం చేసింది. ఇలాంటి పరీక్షలు కేవలం అత్యంత అరుదైన, అనివార్య పరిస్థితుల్లోనే అనుమతించాలని న్యాయస్థానం దృఢంగా వ్యాఖ్యానించింది. ఈ తీర్పు దేశవ్యాప్తంగా కుటుంబ న్యాయస్థానాలకు దిశానిర్దేశం చేసే అవకాశం ఉంది.
కేసు వివరాల ప్రకారం, ఒక వ్యక్తి తన భార్య 2011 మే నుంచి పుట్టింట్లోనే ఉంటూ, 2012 డిసెంబర్‌లో బిడ్డకు జన్మనిచ్చిందని పేర్కొన్నాడు. తనకు చదువు తక్కువ కావడంతో భార్య తనతో కలిసి జీవించడానికి ఇష్టపడలేదని, దాంపత్య సంబంధాలు లేని సమయంలోనే బిడ్డ పుట్టిందని ఆరోపించాడు. అందుకే బిడ్డ తన సొంతమేనా కాదా అనే సందేహం వ్యక్తం చేస్తూ DNA పరీక్షకు ఆదేశించాలని కోర్టును కోరాడు.
అయితే జస్టిస్ సిద్ధార్థ నేతృత్వంలోని ధర్మాసనం ఈ వాదనను తోసిపుచ్చింది. భార్యభర్తల మధ్య దాంపత్య సంబంధాలు కలిగే అవకాశం పూర్తిగా లేనప్పుడు మాత్రమే DNA పరీక్ష అనుమతించవచ్చని స్పష్టంగా తెలిపింది. కేవలం భార్య పుట్టింట్లో ఉందనే కారణంతో ఆమె నైతికతపై సందేహం వ్యక్తం చేసి, బిడ్డపై అనుమానం పెంచడం సరికాదని పేర్కొంది. ఇలాంటి ఆరోపణలు సమాజంలో మహిళల పరువు, బిడ్డ భావోద్వేగాలపై తీవ్ర ప్రభావం చూపుతాయని హెచ్చరించింది.
ఈ తీర్పు ద్వారా DNA పరీక్షలను ఆయుధంగా మలచి వైవాహిక వివాదాల్లో ప్రత్యర్థిని ఇరక్కోట్టే ప్రయత్నాలకు హైకోర్టు గట్టి అడ్డుకట్ట వేసింది. భవిష్యత్తులో ఇలాంటి కేసుల్లో న్యాయస్థానాలు మరింత జాగ్రత్తగా వ్యవహరించే అవకాశం ఉంది. పితృత్వ సందేహం నిజంగా అత్యంత బలమైన ఆధారాలతో రుజువయ్యే వరకు ఈ పరీక్షలు సాధారణం కాకూడదనే సందేశం ఈ తీర్ప ఇస్తోంది.