ఇది ఫాలో అయితే తెల్ల జుట్టు కాస్తా నల్లగా మారుతుంది

వృద్ధాప్యంలో జుట్టు నెరవడం సర్వసాధారణం. అయితే, ఈ రోజుల్లో చిన్న వయసులోనే చాలా మంది తెల్ల జుట్టు సమస్యతో బాధపడుతున్నారు. నిండా ముప్పై ఏళ్లు నిండకముందే తల మొత్తం తెల్ల జుట్టుతో నిండిపోతుంది. అనారోగ్యకరమైన జీవనశైలి, సరైన ఆహారం లేకపోవడం, రోజువారీ తప్పులు దీనికి కారణమని చెప్పొచ్చు.

భారతదేశంలో నిరంతరం మారుతున్న వాతావరణం, కాలుష్యం కూడా తెల్ల జుట్టుకు అతిపెద్ద కారణాల్లో ఒకటి కావచ్చు. ఇక, తెల్ల జుట్టును నల్లగా మార్చుకోవడానికి చాలా మంది మార్కెట్లో దొరికే కెమికల్ డైలు వాడుతుంటారు. జుట్టుకు పదే పదే రంగు వేస్తుంటారు. ఇవి తాత్కాలికంగా జుట్టుకు రంగు ఇచ్చినప్పటికీ.. ఆ తర్వాత సమస్య మళ్లీ మొదటికొస్తుంది.

అంతేకాకుండా జుట్టుకు రసాయన ఉత్పత్తులు వాడటం వల్ల.. భవిష్యత్తులో ఇబ్బందులు ఎదురవచ్చు. జుట్టు బలహీనపడటం, నిర్జీవమైన జుట్టు, జుట్టు రాలడం వంటి సమస్యలు తలెత్తవచ్చు. ఇక, AIIMSతో పాటు హార్వర్డ్‌లో శిక్షణ పొందిన డాక్టర్ సౌరభ్ సేథి తన యూట్యూబ్ ఛానెల్‌లో ఒక వీడియోను పంచుకున్నారు. ఇందులో నాలుగు విషయాలపై శ్రద్ధ పెట్టడం ద్వారా చిన్న వయసులోనే తెల్ల జుట్టు సమస్యను నివారించవచ్చని చెప్పారు. పూర్తి వివరాలపై ఓ లుక్కేద్దాం.

 విటమిన్ బి12, ఫోలేట్ లోపాన్ని భర్తీ చేయండి

డాక్టర్ సౌరభ్ సేథీ ప్రకారం.. శరీరం విటమిన్ బి12, ఫోలేట్ లోపం ఉంటే జుట్టు తెల్లబడవచ్చు. ఎందుకంటే ఈ రెండు పోషకాలు మెలనిన్ ఉత్పత్తికి సాయపడతాయి. మెలనిన్ జుట్టుకు నల్ల రంగును ఇస్తుంది. దీంతో, ఇవి రెండు తగ్గితే జుట్టు తెల్లబడుతుంది. అందుకే వీటి లోపాన్ని భర్తీ చేయాలి. విటమిన్ బి12 కోసం చేపలు, గుడ్లు, పాల ఉత్పత్తులు (పాలు, పెరుగు, జున్ను వంటివి) మీ ఆహారంలో భాగం చేసుకోండి. ఇక.. ఫోలేట్ కోసం, ఆకుకూరలు, కాయధాన్యాలు, శనగలు వంటివి తినాలని డాక్టర్ సూచించారు.

ప్రీరాడికల్స్, ఆక్సీకరణ ఒత్తిడిని తగ్గించుకోండి

ఫ్రీ రాడికల్స్ అనేవి శరీరంలోని కణాల్ని దెబ్బతీసే పదార్థాలు. ఇవి జుట్టు కుదుళ్ల ప్రభావితమైనప్పుడు.. మెలనిన్ ఉత్పత్తిని ఆపేస్తాయి. దీంతో, చిన్న వయసులోనే జుట్టు నెరవడం మొదలవుతుంది. ఈ సమస్యను నివారించడానికి బెర్రీలు, గింజలు, డార్క్ చాక్లెట్ వంటి యాంటీఆక్సిడెంట్లు అధికంగా ఉండే ఆహారాల్ని భాగం చేసుకోండి. ఇవి ఫ్రీ రాడికల్స్‌ను తొలగించి జుట్టు మూలాల్ని బలోపేతం చేయడానికి సాయపడతాయి. అంతేకాకుండా ఆక్సీకరణ ఒత్తిడిని తగ్గిస్తాయి.

ఒత్తిడికి దూరంగా ఉండండి

ఈ రోజుల్లో వర్క్ లైఫ్‌స్టైల్ కారణంగా చాలా మంది ఒత్తిడితో బాధపడుతున్నారు. జుట్టు తెల్లబడటానికి ఒత్తిడి కూడా ఒక ప్రధాన కారణం అంటున్నారు డాక్టర్ సేథీ. అధిక ఒత్తిడి శరీరంలో జుట్టు పెరుగుదల, మెలనిన్ ఉత్పత్తిని ప్రభావితం చేసే హార్మోన్లను విడుదల చేస్తుంది.

అందుకే ఒత్తిడిని నిర్వహించడం చాలా ముఖ్యం. ఇందుకోసం ప్రతిరోజూ కనీసం 7 నుండి 8 గంటలు నిద్రపోవడానికి ప్రయత్నించండి. ధ్యానం, యోగా, వ్యాయామం వంటి వాటిని జీవనశైలిలో భాగం చేసుకోండి. ఇవి ఒత్తిడిని తగ్గించడంలో సాయపడతాయి.

ధూమపానం మానేయండి

ఈ రోజుల్లో చాలా మంది స్మోకింగ్ అలవాటు ఉంది. ఈ అలవాటు కారణంగా మీ జుట్టు తెల్లబడుతుంది. ధూమపానం శరీరంలో ఆక్సీకరణ ఒత్తిడిని పెంచుతుందని, ఇది మెలనిన్ ఉత్పత్తిని తగ్గిస్తుందని డాక్టర్ సేథి వివరిస్తున్నారు. ఫలితంగా జుట్టు బూడిద రంగులోకి మారి పెళుసుగా మారుతుంది. మీరు నిజంగా జుట్టును నల్లగా, ఆరోగ్యంగా ఉంచుకోవాలనుకుంటే ధూమపానం పూర్తిగా మానేయండి.

అలాంటి జుట్టు రంగులు వద్దు

నిపుణుల అభిప్రాయం ప్రకారం, చిన్న వయస్సులోనే జుట్టు తెల్లబడటం వెనుక కాలుష్యం, ఒత్తిడి, అనారోగ్యకరమైన ఆహారం, జీన్స్, మానసిక ఒత్తిడి, అనేక ఇతర కారణాలు ఉన్నాయి. చాలా మంది తెల్ల జుట్టును నల్లగా మార్చుకోవడానికి మార్కెట్లో దొరికే కెమికల్స్‌తో నిండి ఉన్న డైలు వాడతారు.

వీటిని ఉపయోగించకూడదని నిపుణులు అంటున్నారు. ఇవి మీ జుట్టును బలహీనపరుస్తాయి. జుట్టు సహజ మెరుపు కోల్పోతుంది. అంతేకాకుండా రసాయనాలతో నిండి ఉన్న ఈ రంగుల వల్ల ఆరోగ్యంపై కూడా ప్రతికూల ప్రభావం పడుతుంది.