'జైల్లో ఇమ్రాన్ ఖాన్ ఏకాంత నిర్బంధాన్ని ఎత్తివేయాలి': పాక్‌కు ఐక్యరాజ్యసమితి హెచ్చరిక

పాకిస్థాన్ మాజీ ప్రధాని ఇమ్రాన్ ఖాన్ జైలులో ఎదుర్కొంటున్న పరిస్థితులు, ముఖ్యంగా ఆయన్ను ఏకాంత నిర్బంధంలో ఉంచడం హింసించడంతో సమానం అని.. ఇది క్రూరమైన, అమానవీయ శిక్షలకు దారి తీయవచ్చని ఐక్యరాజ్యసమితి మానవ హక్కుల నిపుణురాలు ఆందోళన వ్యక్తం చేశారు. పాకిస్థాన్‌లో రాజకీయ సంక్షోభం తీవ్రంగా ఉన్న నేపథ్యంలో.. ఐక్యరాజ్యసమితి జోక్యం అంతర్జాతీయ దృష్టిని ఆకర్షించింది.

ఏకాంత నిర్బంధంపై తీవ్ర హెచ్చరిక..

ఏకాంత నిర్బంధం హింసించడంతో సమానం అన్న ఐక్యరాజ్య సమితి స్పెషల్ రాపోర్టెర్ ఆలిస్ జిల్ ఎడ్వర్డ్స్.. పాక్ అధికారులు ఖాన్ నిర్బంధాన్ని అంతర్జాతీయ మానవ హక్కుల ప్రమాణాలకు అనుగుణంగా ఉండేలా చూడాలని కోరారు. 72 ఏళ్ల ఇమ్రాన్ ఖాన్.. 2023 సెప్టెంబర్ 26వ తేదీ నుంచి రావల్పిండిలోని ఆదియాల జైలులో ఉన్నారు. ఆయనపై ఉన్న కేసులు రాజకీయ ప్రేరేపితమైనవని మద్దతుదారులు ఆరోపిస్తుండగా.. ప్రభుత్వం, సైన్యం ఆ వాదనను ఖండిస్తూ వస్తోంది. అయితే ఇమ్రాన్ ఖాన్‌కు సంబంధించిన తనకు విశ్వసనీయ సమాచారం అందినట్లు ఎడ్వర్డ్స్ తెలిపారు. ఆ సమాచారం ప్రకారం.. ఖాన్ రోజుకు 23 గంటల వరకు ఏకాంత నిర్బంధంలో గడుపుతున్నారని, బయటి ప్రపంచంతో పరిమిత సంబంధాలు మాత్రమే ఉన్నాయని పేర్కొన్నారు.ఇదీ చూడండి: పాకిస్థాన్ మాజీ ప్రధాని ఇమ్రాన్ ఖాన్ మృతి..? జైలు అధికారులు ఏం చెప్పారంటే?

అంతర్జాతీయ చట్టాల ప్రకారం.. 15 రోజుల కంటే ఎక్కువ ఏకాంత నిర్బంధం మానసిక హింసగా పరిగణించబడుతుందని ఎడ్వర్డ్స్ గుర్తు చేశారు. ఇమ్రాన్ ఖాన్‌పై విధించిన ఏకాంత నిర్బంధాన్ని ఆలస్యం చేయకుండా ఎత్తివేయాలని సూచించారు. దీర్ఘకాలిక ఒంటరితనం తీవ్రమైన శారీరక, మానసిక ఆరోగ్య సమస్యలకు దారితీస్తుందని హెచ్చరించారు. ఏకాంత నిర్బంధమే కాకుండా ఖాన్ సెల్‌లోని భౌతిక పరిస్థితులపై కూడా స్పెషల్ రాపోర్టెర్ తీవ్ర ఆందోళన వ్యక్తం చేశారు. ఖాన్ ఉంటున్న సెల్.. చిన్నగా, సరిగా వెంటిలేషన్ లేక, సహజ కాంతి లేకుండా ఉందని పేర్కొన్నారు. వేసవి, చలికాలాల్లో అధిక ఉష్ణోగ్రతలు, దుర్వాసన, కీటకాల కారణంగా ఆయన వాంతులు, వికారం, తీవ్ర బరువు తగ్గడాన్ని ఎదుర్కొన్నారని తెలిపారు.

అంతేకాకుండా ఇమ్రాన్ ఖాన్‌కు 2013లో వెన్నెముక గాయం, 2022లో హత్యాయత్నం కారణంగా బుల్లెట్ గాయాలు వంటి తీవ్రమైన ఆరోగ్య సమస్యల చరిత్ర ఉన్నప్పటికీ.. ఆయనకు సరైన వైద్య సంరక్షణ నిరాకరించబడిందని ఎడ్వర్డ్స్ పేర్కొన్నారు. స్వాతంత్య్రం కోల్పోయిన ఏ వ్యక్తి అయినా మానవత్వంతో, గౌరవంతో చూడబడాలని ఎడ్వర్డ్స్ ఉద్ఘాటించారు. ఖాన్ ఆరోగ్య సమస్యల దృష్ట్యా.. ఆయన వ్యక్తిగత వైద్యులను సందర్శించడానికి అనుమతించాలని పాక్ అధికారులను కోరారు. పాకిస్థాన్ ప్రభుత్వాన్ని అధికారికంగా హెచ్చరిస్తూ.. ఎడ్వర్డ్స్ ఈ పరిణామాలను నిరంతరం పర్యవేక్షిస్తానని తెలిపారు.