ఉషా చిలుకూరిపై జాత్యంహాకార దూషణలు,,,వ్యాఖ్యత నిక్ ఫ్యూయెంటెస్‌‌పై వాన్స్ ఆగ్రహం

అమెరికా సెకెండ్ లేడీ, తన భార్య భారత సంతితకి చెందిన ఉషా చిలుకూరిపై జాత్యంహార దూషణలకు అమెరికా ఉపాధ్యక్షుడు జేడీ వాన్స్ తీవ్రంగా స్పందించారు. తన భార్యను ఎవరైనా దూషిస్తే, వారు జెన్ సాకి అయినా, నిక్ ఫ్యూయెంటెస్ అయినా సరైన గుణపాఠం చెప్పడమే తన విధానమని, జాతి వివక్షను తాను సహించబోనని ఆయన స్పష్టం చేశారు. కామెంటరేటర్ నిక్ ఫ్యూయెంటెస్, మాజీ అధ్యక్షుడు జో బైడెన్ ప్రెస్ సెక్రటరీ జెన్ సాకీలు చేసిన వ్యాఖ్యలకు వాన్స్ కౌంటర్ ఇచ్చారు. ఒక ఇంటర్వ్యూలో అమెరికా వైస్-ప్రెసిడెంట్ జేడీ వాన్స్ మాట్లాడుతూ.. తన భార్యపై జాతి వివక్ష చూపడం, ముఖ్యంగా యూదు, భారత వ్యతిరేకత వంటివి తన దృష్టిలో చాలా తప్పు అని విరుచుకుపడ్డారు. ఎవరైనా వారి శరీర రంగును బట్టి, లేదా వారి జాతిని బట్టి దూషించడం చాలా అసహ్యకరమైన చర్య అని జేడీ వాన్స్ దుయ్యబట్టారు.

ఉషా చిలుకూరిపై నిక్ ఫ్యూయెంటెస్ తరుచుగా జాత్యంహకార దూషణలకు పాల్పడుతున్నాడు. నల్లజాతీయురాలిని వివాహం చేసుకున్న వాన్స్ ‘జాతి ద్రోహి’ అని తీవ్రస్థాయిలో వ్యాఖ్యలు చేస్తున్నాడు. అక్టోబరులో జెన్ సాకి కూడా ఉషా వాన్స్‌పై విమర్శలు చేశారు. తన షోలో మాట్లాడుతూ.. ‘ఆమె భర్త మనసులో ఏముందో అని నేను ఎప్పుడూ ఆలోచిస్తుంటాను. మీరు బాగానే ఉన్నారా? దయచేసి నాలుగు సార్లు కన్ను కొట్టండి, మేము వస్తాం... మేము మిమ్మల్ని రక్షిస్తాం’ అని సాకి వ్యాఖ్యానించింది.

జాతి వివక్ష క్రూరత్వమని, వ్యక్తులను వారి పనులు, జాతి లేదా వంశం ఆధారంగా కాకుండా వారి వ్యక్తిత్వం ఆధారంగా అంచనా వేయాలని వాన్స్ హితవు పలికారు. ఫ్యూయెంటెస్, అతడి అనుచరులు.. తన స్నేహితులు, కుటుంబ సభ్యులను, ముఖ్యంగా ఉషా వాన్స్‌ను చాలా కాలంగా లక్ష్యంగా చేసుకుంటున్నారని ఆయన ఆరోపించారు.

సోషల్ మీడియాలో ఇన్‌ఫ్యూయెన్సర్ల కంటే అధికారంలో ఉన్న వ్యక్తులే పెద్ద సమస్య అని వాన్స్ అభిప్రాయపడ్డారు. గత ఐదు పదేళ్లుగా చాలా మంది రాజకీయ నాయకులు, కాలేజీ ప్రవేశాలు, ఉద్యోగాలలో శ్వేతజాతీయులపై వివక్షను అనుమతించే లేదా ప్రోత్సహించే విధానాలకు మద్దతు ఇచ్చారని ఆయన ధ్వజమెత్తారు.

సగం శ్వేతజాతి, దక్షిణాసియా సంతతికి చెందినవారైన తన పిల్లలు జాతి ఆధారిత విధానాల వల్ల ప్రముఖ కాలేజీలు, ఉద్యోగ వ్యవస్థలలో వివక్షను ఎదుర్కొన్నారని ఆయన చెప్పారు. బైడెన్ ప్రభుత్వం డెమొక్రాట్ల మద్దతుతో ఉన్న ఈ విధానాలు, తమ పిల్లల చర్మం రంగు కారణంగా వారికి ప్రతికూలంగా మారాయని ఆయన ఆరోపించారు.

‘‘జాతి వివక్ష చెడ్డదని మీరు విశ్వసిస్తే ఫ్యూయెంటెస్ మీ దృష్టిలో ఒక్క సెకను మాత్రమే ఉండాలి.. కానీ శ్వేతజాతీయుల వివక్షకు తీవ్రంగా కృషి చేసిన నిజమైన రాజకీయ అధికారం ఉన్న వ్యక్తులు మీ దృష్టిలో చాలా గంటల పాటు ఉండాలి’’ అని వాన్స్ అన్నారు. అమెరికన్ గుర్తింపు గురించి మాట్లాడుతూ.. ‘అమెరికా వారసత్వవాదులు జన్యుశాస్త్రంపై ఎక్కువగా, అమెరికా ఆదర్శాలపై తక్కువగా దృష్టి పెడతారు’ ఆయన ఆరోపించారు.

గతంలో భారత సంతతికి చెందిన వివేక్ రామస్వామి కూడా అమెరికన్ గుర్తింపుపై ప్రశ్నలు లేవనెత్తారు. వంశం లేదా వారసత్వం కంటే అమెరికన్ ఆదర్శాలు, విలువలకు ప్రాధాన్యత ఇవ్వాలని ఆయన కన్జర్వేటివ్‌లను కోరారు. ‘హెరిటేజ్ అమెరికన్’ అనే భావనను ఆయన ‘పిచ్చి’ అని కొట్టిపారేశారు. ఒక వ్యక్తి వంశం, వారసత్వం, తొలి అమెరికా చరిత్రతో వారి సంబంధం ఆధారంగా నిర్వచించే భావన, ప్రాథమికంగా లోపభూయిష్టమైందని రామస్వామి అన్నారు. ‘ఒక అమెరికన్ కంటే మరొక అమెరికన్ ఎక్కువ కాదు. మీరు అమెరికన్ అయితే, అమెరికన్, లేకపోతే కాదు’ అని వివేక్ రామస్వామి పేర్కొన్నారు.